جاڭادان سايلانعان دەپۋتاتتار تاۋلىگىنە 120 مىڭ تەڭگە تۇراتىن قوناقۇيدە تۇرىپ جاتىر. بۇگىن ءماجىلىستىڭ التىنشى شاقىرىلىمى رەسمي جۇمىستارىن باستادى. جاڭادان سايلانعان ءماجىلىس العاشقى جالپى وتىرىسىنا قىزۋ دايىندالۋدا. 107 دەپۋتات جەكە كابينەتتەرىنە جايعاسىپ تا ۇلگەردى دەپ حابارلايدى كتك ارناسى.

قازىر پارلامەنت اكىمشىلىگى حالىق قالاۋلىلارىنىڭ قۇجاتتارىن جيناپ، قىزمەتتىك پاتەرلەرىن دە ازىرلەۋدە. ال، ۋاقىتشا باسپاناسىز جۇرگەن ماجىلىسمەندەر استاناداعى بەسجۇلدىزدى قىمبات قوناقۇيدە تۇرىپ جاتىر.

ءماجىلىستىڭ دالىزىندە تاڭنان بەرى ابىر-سابىر. جۇمىسقا جاڭادان كىرىسىپ جاتقان دەپۋتاتتار جەكە كابينەتتەرىندەگى جيھازداردى اۋىستىرىپ الەك. قازاقستان حالقى اسسامبلەياسىنىڭ اتىنان سايلانعان ناتاليا جۇمادىلداەۆاعا ەكس-ماجىلىسمەن ورازكۇل اسانعازىنىڭ كابينەتى بۇيىرىپتى.

"كابينەتتە جۇمىسقا كەرەك نەگىزگى زاتتىڭ ءبارى بار. قازىر مەن جالپى وتىرىسقا قىزۋ دايىندالۋدامىن. دەمالىسسىز زاڭ جوبالارىمەن تانىسىپ جاتىرمىن. جەكە ۇسىنىستارىمدى دايىنداپ تا قويدىم", - دەيدى ءماجىلىس دەپۋتاتى ناتاليا جۇمادىلداەۆا.

30 جىل پەداگوگ بولعان ناتاليا جۇمادىلداەۆا كيىم ۇلگىسىن دە اۋىستىرمايمىن دەپ وتىر.

ءومىرى كۇرت وزگەرگەن ەڭ جاس دەپۋتات گەننادي شيپوۆسكيح دا جەكە كابينەتىن كورسەتىپ ماقتاندى.

"مەنىڭ جەكە كابينەتىم. وزدەرىڭىز كورىپ تۇرعانداي، وسى قازىرگى تاڭدا جۇمىس بارىسىنا كىرىسىپ جاتىرمىز. بۇل جەردە قۇجاتتار، دوكۋمەنتتەرىمىز جۇمىس بارىسىندا دايىندالىپ جاتقان", - دەيدى ءماجىلىس دەپۋتاتى گەننادي شيپوۆسكيح.

ءماشينيستىڭ كومەكشىسى بولىپ جۇرگەن جەرىنەن ماجىلىستەن ءبىر-اق شىققان گەننادي شيپوۆسكيح وزىمەن بىرگە قازاق تىلىندە جازىلعان كىتاپتى عانا الا كەلىپتى. ۋاقىتى وتە تىعىز، كەۋدەسىنە دەپۋتاتتىق توسبەلگىسىن تاعىپ، پارتيانىڭ العاشقى فراكتسيالىق وتىرىسىنا اسىقتى. ال، قايتا سايلانعان ەسكى دەپۋتاتتار سول بۇرىنعى جۇمىس ورىندارىندا وتىر. 80-گە تاياپ قالعان كوممۋنيستەر كوسەمى قايتىپ كەلەتىنىنە سەنىمدى بولسا كەرەك، 5-ءشى شاقىرىلىم تاراعاندا كابينەتىندەگى جەكە زاتتارىن جيناستىرماعان دا.

"قوناەۆتىڭ پورترەتى. ديماش احمەتۇلىنا 100 جىل تولعاندا تاپسىرىس بەرىپ سالدىرتقانمىن", - دەيدى ءماجىلىس دەپۋتاتى ۆلاديسلاۆ كوسارەۆ.

كوسارەۆ كابينەتىندە تۇرىپ، بيىل اۋىل شارۋاشىلىعىنا ارنالعان جەر تەلىمدەرىن جاپپاي ساتۋعا شىعارعالى جاتقان ۇكىمەتكە قارسىلىق بىلدىرەتىنىن ايتتى. كەيىن قىزمەتتىك پاتەرىنە قوناققا شاقىرىپ، كوفە ازىرلەۋدىڭ قۇپياسىمەن ءبولىستى.

بۇرىنعى دەپۋتاتتاردىڭ بارلىعى "نۇرساياداعى" باسپانالارىندا تۇرىپ جاتىر. ماجىلىسمەندەردىڭ قىزمەتتىك كولىكتەرى دە دايىن. كەز-كەلگەن ۋاقىتتا جۇرگىزۋشىنى شاقىرتا الادى.

ال، جاڭادان سايلانعان دەپۋتاتتار ازىرگە قىزمەتتىك پاتەرلەرگە جايعاسىپ ۇلگەرگەن جوق. ايماقتاردان كوشىپ كەلگەندەرى استاناداعى بەسجۇلدىزدى قىتايلىق قوناق ۇيدە مەملەكەت ەسەبىنەن تۇرىپ جاتىر. ەليتالىق قوناقۇيدە ءبىر كۇن تۇنەپ شىعۋ 120 مىڭ تەڭگە. بيۋدجەتكە شىعىن بولماسى ءۇشىن، مۇنداعى حالىق قالاۋلىلارىنىڭ قۇجاتتارى دايىن بولعاندا، ولار دا تەگىس "نۇرساياعا" كوشەدى.

ەسكە سالا كەتەيىك، دەپۋتاتتاردىڭ قىمبات قوناقۇيگە جايعاساتىنىن ءبىز بۇدان بۇرىن حابارلاعان بولاتىنبىز.

Abai.kz