موڭعوليا رەسپۋبليكاسىنىڭ پرەزيدەنتى تساحياگاين ەلبەگدورج ءوزىنىڭ بەس بالاسىنان بولەك 23 بالانى باعىپ وتىر، - دەپ حابارلايدى «قامشى» پورتالى pikabu.ru – عا سىلتەمە جاساپ.

اقپارات قۇرالدارى موڭعوليا پرەزيدەنتى مەملەكەت باسشىلارىنىڭ ىشىندەگى كوپ بالالى اكە ەكەنىن جازۋدا.

لۆوۆ اسكەري ۋچيليششەسىن «اسكەري ءتىلشى» ماماندىعى بويىنشا تامامداعان تساحياگاين ەلبەگدورج دج. كەننەدي اتىنداعى گارۆارد مەملەكەتتىك باسقارۋ مەكتەبىنىڭ دە تۇلەگى. 1963 جىلى موڭعوليانىڭ قوبدا ايماعى زەرەگ ەلدى مەكەنىندە دۇنيەگە كەلگەن ول 75 جىل مەملەكەت باسشىلىعىندا بولعان موڭعوليا حالىق پارتياسىن تايدىرعان 1990 جىلعى بەيبىت دەموكراتيالىق توڭكەرىستىڭ سەركەسى بولدى. ءار جىلدارى ەكى مارتە موڭعوليا پرەمەر-ءمينيسترى، ۇلى مەملەكەتتىك حۋرال ۆيتسە-سپيكەرى قىزمەتىن اتقاردى. قازىرگى لاۋازىمىنا 2009 جىلى 18 ماۋسىمدا سايلاندى.

تساحياگاين ەلبەگدورجدىڭ كەلىنشەگى حاجيدسۋرەنگين بولورماا لۆوۆ مەملەكەتتىك ۋنيۆەرسيتەتىن، اقش-تىڭ ۆيردجينيا شتاتىندا ۇلتتىق بيزنەس جانە تەحنولوگيا كوللەدجىن تامامداعان. "Hope-Cancer-Free" ۇلتتىق قورىنىڭ نەگىزىن قالاۋشى ءارى توراعاسى.

موڭعوليا – پارلامەنتتىك باسقارۋ جۇيەسىنە يە رەسپۋبليكا. زاڭ شىعارۋشى ورگانى 76 دەپۋتاتتان تۇراتىن ۇلى مەملەكەتتىك حۋرال اتالادى. ول ۇكىمەتتى جاساقتاۋدا دا شەشۋشى رولگە يە.

Abai.kz