«جاۋ جوق دەمە – جار استىندا» دەگەن قازاق ناقىلىن ەسكەرسەك، الەمنىڭ ءار تۇكپىرىندە لاڭكەستىك ارەكەتتەردىڭ بۇرق ەتە قالۋى ءبىزدىڭ دە سوعان سايكەس قامدانۋىمىزدى بىلدىرسە كەرەك. اسىرەسە، قوعامدىق ساۋدا ورىندارى – حالىق كوپ شوعىرلاناتىن جەر. وسى سالاداعى كاسىپكەرلەر ءوز بيزنەسىن قاۋىپسىز ءارى ءتيىمدى جۇرگىزۋى ءۇشىن قورعانىس جۇيەسىن نىعايتۋعا كوڭىل ءبولۋى ءتيىس

وتكەن جىلى، ياعني، 2015 جىلدىڭ 3 ساۋىرىندە ۇكىمەت «تەرروريستىك تۇرعىدان وسال وبەكتىلەردىڭ تەرروريزمگە قارسى قورعالۋ جۇيەسىنە قويىلاتىن تالاپتاردى بەكىتۋ تۋرالى» قاۋلى قابىلداعان بولاتىن. بۇل قاۋلىعا سايكەس، حالىق كوپ جينالاتىن نىساندار مىندەتتى تۇردە قاۋىپسىزدىك جۇيەسىمەن قامتاماسىز ەتىلۋى ءتيىس. ولارعا ساۋدا الاڭدارى بار ساۋدا نىساندارى، ويىن-ساۋىق ورتالىقتارى مەن قوعامدىق تاماقتاندىرۋ ورىندارى جاتادى.

قاۋلى بويىنشا، لاڭكەستىككە  قارسى قورعانىسپەن قامتاماسىز ەتۋگە قويىلاتىن تالاپتار ايتارلىقتاي كوپ تە ەمەس.  بار بولعانى تەلەۆيزيالىق باقىلاۋ جۇيەسى مەن ورتكە قارسى قورعانىس جۇيەسىن ورناتۋ قاجەت.

 «سونداي-اق، كاسىپورىندا نىساننىڭ تەرروريزمگە قارسى قورعانىسى تۋرالى قۇجات بولۋى ءتيىس. ونى مىندەتتى تۇردە جەرگىلىكتى ىشكى ىستەر باسقارماسىنىڭ باستىعى ماقۇلداۋى قاجەت.  قۇجاتتى ءبىر اپتانىڭ ىشىندە الۋعا رۇقسات ەتىلەدى.  ەرەجەگە سايكەس، قۇجات ءۇش جىلدا ءبىر رەت اۋىستىرىلادى»، – دەيدى «اتامەكەن» ۇلتتىق پالاتاسى قۇقىق ءبولىمىنىڭ ساراپشىسى راحىم جانىسوۆ.

قازىرگى ۋاقىتتا كاسىپورىننىڭ قاۋىپسىزدىگى بويىنشا تەكسەرىستەن  الماتى وبلىسىنىڭ ىلە، جامبىل، پانفيلوۆ اۋداندارى مەن قاپشاعاي قالاسى ءوتتى. تەكسەرۋ بارىسىندا وسى نىسانداردىڭ كوپشىلىگىندە بەينەباقىلاۋ كامەرالارى مەن نىساننىڭ تەرروريزمگە قارسى قورعانىسى تۋرالى قۇجاتى جوق بولىپ شىقتى. ء تيىستى ۇيىم باسشىلارى ءبىر ايدىڭ ىشىندە ولقىلىقتىڭ ورنىن تولتىرۋعا مىندەتتەلدى. ولاي بولماعان جاعدايدا، 100 ايلىق كورسەتكىش ەسەبىندە ايىپپۇل تولەۋگە ماجبۇرلەنەدى.

ەگەر كاسىپكەر تەكسەرۋشىلەردىڭ ەسكەرتپەسىنە ەكىنشى مارتە قۇلاق سالماسا، وعان 200 ايلىق كورسەتكىش ەسەبىندەگى اكىمشىلىك ايىپپۇل سالىنادى.

كوكسۋ اۋدانى بالپىق بي اۋىلىنداعى «اۋىل» بازارى بەكىتىلگەن تالاپتاردى العاشقىلاردىڭ ءبىرى بوپ ورىندادى. بازار اكىمشىسى قاجىمۇقان قاليەۆتىڭ پىكىرىنشە، باقىلاۋ جۇيەسى ىستە ءوزىنىڭ تيىمدىلىگىن دالەلدەۋدە. «بەينەباقىلاۋدىڭ تەلەۆيزيالىق جۇيەسى بازاردىڭ قاۋىپسىزدىگىن عانا قامتاماسىز ەتىپ قويمايدى، سونىمەن بىرگە، ۇرلىق جاساۋ فاكتىلەرى سياقتى زاڭعا قايشى ارەكەتتەردىڭ الدىن الادى. سونىڭ ارقاسىندا بازار اكىمشىلىگى بىرنەشە فاكتىلەردى انىقتاي الدى. ءسويتىپ ءبىز كاسىپكەرلەردى قارجىلىق زالالدان قۇتقاردىق»، – دەيدى بازار اكىمشىلىگىنىڭ وكىلى.

پالاتا ساراپشىسى بيزنەس وكىلدەرىنىڭ اراسىندا ءتۇسىندىرۋ جۇمىستارىن جۇرگىزۋدىڭ ماڭىزدىلىعىن ايتادى. «نەگىزگى مىندەت – كاسىپورىن باسشىلارىنا پروفيلاكتيكالىق شارالاردى ۇيىمداستىرۋعا كومەكتەسۋ جانە زاڭنامانى ساقتاۋ تۋرالى ءتۇسىندىرۋ جۇمىستارىن جۇرگىزۋ، سونداي-اق، ءوز كاسىپورنىن قاۋىپسىزدىك جۇيەلەرىمەن تەحنيكالىق جابدىقتاۋ بويىنشا شارالار قولدانۋ.  مەملەكەتتىڭ تالابىن ورىنداۋ حالىق پەن بيزنەستىڭ قاۋىپسىزدىگىن قامتاماسىز ەتەدى»، – دەپ ءسوزىن جالعادى ساراپشى.

وبلىستىڭ قالعان اۋداندارىندا نىسانداردىڭ تەرروريزمگە قارسى قورعانىسىن تەكسەرۋ جۇمىستارى كەلەسى ايدىڭ باسىندا قولعا الىنادى.

 Abai.kz