وسىدان ءبىر اي بۇرىن ۇلىستىڭ ۇلى كۇنى ناۋرىز مەيرامىن الماتىلىق بودي-ارتشىلار جالاڭاش تويلاۋدى جوسپارلاپ جاتقانىن حابارلاپ، "ەندىگى جەتپەگەنى ۇلىستىڭ ۇلى كۇنىن جالاڭاش تويلاۋ ەدى" (http://abai.kz/post/view?id=6787) دەگەن ماقالا جاريالاعان ەدىك. استانادا تۇرعان الدەبىر ەسكەرتكىشكە كيىم كيگىزۋگە قۇمار قوعام سەلك ەتپەدى. جانسىز تاس ءمۇسىندى اجۋالاۋعا دايىن ازاماتتاردىڭ كەۋدەسىندە جانى بار قىزدارىمىزعا ءلام دەي المادى.   

قازىر قازاقستاندا قازاقتى جۇيەلى تۇردە ماسقارالاۋ "ويىنى" ءجۇرىپ جاتىر. الاش جۇرتىنىڭ قىزدارىن ۇلتىمىزدىڭ ءتول جاڭا جىلىنىڭ قارساڭىندا جالاڭاشتاۋ ارقىلى بودي-ارتشىلار نەنى دالەلدەدى؟ قازاق قىزىنىڭ، الاش ارۋىنىڭ جەزوكشەگە اينالعانىن با؟ جوق، الدە كۇن مەن ءتۇن تەڭەلەتىن قاسيەتتى مەيرامىمىزدى مانسۇقتادى ما؟ 

ءبىر قىزىمىز "ونەر دەگەن وسى ەكەن" دەپ جالاڭاش دەنەسىن جۇرت الدىندا كورسەتسە، بار بويجەتكەنىمىزدىڭ تىر جالاڭاش قالعانى ەمەس پە؟  

بۇل شارانىڭ قازاقتى ماسقارالايتىن شوۋ ەكەنى وسى سۋرەتتەن-اق كورىنىپ تۇرعان جوق پا؟ قازاقتىڭ ويۋ-ورنەگى، دومبىراسى، بورىگى... مىڭ جىلدىق تاريحى بار قاسيەتتى دومبىرانى بۇلاي ماسقارالاعاندار جازالانۋى كەرەك قوي. "ناعىز قازاق - قازاق ەمەس، ناعىز قازاق - دومبىرا" دەپ ەدى قادىر اقىن. دومبىرا مەن قازاق ەگىز ۇعىم بولىپ كەتكەلى قاشان؟ ەندى مىنە، قىزىڭنىڭ دا، دومبىراڭنىڭ ارى ساۋداعا سالىنىپ جاتىر. ءبىر كەزدەرى اراق بولىپ، قازاقتى "القاش" رەتىندە كورسەتۋگە پايدالانىلعان دومبىرا، ەندى باسقا سىپاتتا ساحناعا شىقتى. ماسقارا ما؟ ماسقارا! 

ەندى رەسمي تاراعان اقپاراتتارعا كەزەك بەرەيىك.

23 ناۋرىز كۇنى بۇل شارا، ياعني ءتورتىنشى فەستيۆال الماتىداعى تۇنگى كلۋبتاردىڭ بىرىندە ءوتتى. وعان تۇڭعىش رەت قىرعىزستان، ۋكراينا جانە فرانتسيا سەكىلدى شەتەلدەن كەلگەن سۋرەتشىلەر قاتىستى.