گەنەرال سيريادا رەسەيلىك جاساقتىڭ بار ەكەنىن مويىندادى
ورتالىق اسكەري وكرۋگى اسكەرىنىڭ قولباسشىسىنىڭ ءبىرىنشى ورىنباسارى گەنەرال-پولكوۆنيك الەكساندر دۆورنيكوۆ "روسسيسكايا گازەتا" باسىلىمىنا بەرگەن سۇحباتىندا رەسەيلىك اسكەردىڭ سيرياداعى قۇرلىقتاعى اسكەري قىيمىلدارى تۋرالى ايتىپ بەردى. ول سيريالىق اسكەردە "تاكتيكالىق بۋىن دەڭگەيىنە دەيىنگى" اسكەري كەڭەسشىلەردىڭ بارلىعىن جانە ارنايى جاساقتىڭ بارلاۋعا قاتىساتىنىن مويىندادى.
سيرياداعى رەسەيلىك اسكەرگە قولباسشىلىق جاساعان گەنەرال-پولكوۆنيك، سيرياداعى سوعىستاعى جاعدايدى ۇكىمەت اسكەرىن دايىنداعان، كۇردتەرگە جانە تاعى "باسقا ۇيىمدارعا" كومەكتەسكەن اسكەري كەڭەسشىلەردىڭ كۇرت وزگەرتە العانىن مالىمدەدى.
"سيريا اۋماعىندا ءبىزدىڭ ارنايى جاساقتىڭ ارەكەت ەتەتىنىن جاسىرمايمىن. ولار رەسەيلىك اۋە كۇشتەرى ءۇشىن بارلاۋ مالىمەتتەرىن دايىندايدى، شالعاي اۋدانداردا ۇشاقتاردى نىسانالارعا باعىتتايدى،باسقا دا ايرىقشا تاپسىرمالاردى ورىندايدى", – دەدى دۆورنيكوۆ.
ول سونىمەن بىرگە سيريادا اقش پەن كواليتسياداعى وزگە ەلدەردىڭ دە ارنايى جاساقتارىنىڭ ارەكەت ەتەتىنىن ايتتى.
رەسەيدىڭ سيرياداعى اسكەري وپەراتسياسى جارتى جىلعا جۋىق ۋاقىت سوزىلدى. 2016 جىلى 14 ناۋرىزدا ۆلاديمير پۋتين رەسەيلىك اسكەردىڭ ءبىر بولىگىن ەلدەن شىعاراتىنى تۋرالى مالىمدەدى. ونىڭ ايتۋىنشا سيرياداعى اسكەري شارانىڭ قۇنى 33 ملرد رۋبل بولعان. رەسەي رەسمي تۇردە بەس اسكەري قىزمەتشىسىنىڭ، ونىڭ ىشىندە ارنايى جاساق جاۋىنگەرى فەدور جۋراۆلەۆتىڭ قازا تاپقانىن مويىندادى.
اباي-اقپارات
