ورتالىق سايلاۋ كوميسسياسى بيىلعى سايلاۋ ءۇشىن election2016.kz سايتىن اشقان. سايت ەكى تىلدە. بىراق، مەملەكەتتىك تىلدەگى نۇسقاسى دا ورىس تىلىندە. ءىشىنارا ءبىرلى-جارىم دۇنيەلەر عانا قازاق تىلىندە بەرىلگەن. «سايلاۋعا ەكى كۇن قالدى»، ء«ماسليحات»، «الەۋمەتتىك جەلىدە ءبولىسۋ»، «ۇمىتكەر پارتيالار» جانە تاعى باسقا بىرنەشە ءسوز مەملەكەتتىك تىلدە بەرىلگەنى بولماسا سايتتىڭ  مەملەكەتتىك تىلدەگى نەگىزگى كونتەنتى تۇگەلدەي ورىس تىلىندە.

ورتالىق سايلاۋ كوميسسياسى مەملەكەتتىك ورگان. وسك تۋرالى ەرەجەدە «كوميسسيا ءوز قىزمەتىن قازاقستان رەسپۋبليكاسىنىڭ كونستيتۋتسياسى مەن زاڭدارىنا، قازاقستان رەسپۋبليكاسى پرەزيدەنتىنىڭ اكتىلەرىنە، وزگە دە نورماتيۆتىك قۇقىقتىق اكتىلەرگە، سونداي-اق وسى ەرەجەگە سايكەس جۇزەگە اسىرادى» دەلىنگەن. ال، كونستيتۋتسيانىڭ 7 بابىندا «قازاقستان رەسپۋبليكاسىنداعى مەملەكەتتىك ءتىل - قازاق ءتىلى»، 
« مەملەكەتتىك ۇيىمداردا جانە جەرگىلىكتى ءوزىن-ءوزى باسقارۋ ورگاندارىندا ورىس ءتىلى رەسمي تۇردە قازاق تىلىمەن تەڭ قولدانىلادى» دەپ جازىلعان.

الايدا، وسك-نىڭ 2016 جىلعى ءماجىلىس جانە ءماسليحات سايلاۋى ءۇشىن اشىلعان رەسمي ۆەب-سايتىندا مەملەكەتتىك ءتىلدىڭ رەسمي تىلمەن تەڭ قولدانىلۋى بۇزىلىپ تۇر. بۇل ازاماتتاردىڭ مەملەكەتتىك تىلدە اقپارات الۋىنا كەدەرگى ەكەنىن جانە قوسىڭىز.

وسك اتالعان ۆەب-سايتتاعى مەملەكەتتىك ءتىلدىڭ ماسەلەسىن تۇسىندىرەدى دەپ ۇمىتتەنەمىز!

Abai.kz