پۋتين سيريادان اسكەرىن شىعارۋدى بۇيىردى
رەسەي پرەزيدەنتى ۆلاديمير پۋتين 15 ناۋرىزدان باستاپ سيرياداعى اسكەردىڭ نەگىزگى بولىگىن شىعارۋ جونىندە بۇيرىق بەردى. ونىڭ مالىمدەۋىنشە، رەسەي اسكەرىنىڭ ارالاسۋى ارقىلى سيرياداعى ەكسترەميستەردىڭ ازايۋىنا بەلگىلى ءبىر سەپتىگىن تيگىزدى.
ول بۇل جونىندە 14 ناۋرىزدا كرەملدە قورعانىس جانە سىرتقى ىستەر مينيسترلەرىمەن كەزدەسۋ كەزىندە مالىمدەدى. پۋتين سونىمەن بىرگە سيرياداعى سوعىستى توقتاتىپ، بەيبىتشىلىك ورناتۋعا رەسەيدىڭ بەلگىلى ءبىر سەپتىگى ءتيدى دەپ ەسەپتەيدى.
كرەمل ءباسپاسوز حاتشىسى دميتري پەسكوۆ پۋتين سيريا پرەزيدەنتى باشار اسادقا قوڭىراۋ سوعىپ، رەسەي شەشىمىن حابارلايدى دەدى.
سوعان قاراماستان پۋتين تارتۋستاعى جانە حمەيميمدەگى اسكەري بازالارى بۇرىنعى رەجيمدە جۇمىس ىستەي بەرەتىندىگىن مالىمدەدى.
ال قالعان اسكەرلەر سوعىستى توقتاتۋ جونىندەگى كەلىسىمنىڭ ورىندالۋىن باقىلايتىن بولادى دەپ اتاپ ءوتتى.
اباي-اقپارات
