نەگىزى جاستىق پەن كارىلىكتىڭ ايىرماشىلىعى بولۋ كەرەك پا؟ ول ايىرماشىلىق تەك جاسىندا ما؟ جوق الدە جاستىق، كارىلىك ايىرماشىلىعى انىقتاماسىندا، ونىڭ مازمۇنىندا ما؟ بۇل ءوزى پسيحولوگيالىق ماسەلە مە جوق الدە تانىمدىق پا؟

ءبىر توپ بالانىڭ ورتاسىنداعى قاريا بالا بولسا، ءبىر توپ قاريانىڭ ورتاسىندا وسكەن بالا دانا بولادى دەيدى. قادىر اعام مارقۇم، "جاستىق شاعىڭ تەڭدەسى جوق قۇدىرەت، قۇدىرەتتى ماحابباتقا تۇعىر ەت، جاستىق ەمەي كىم دەپ ەدىڭ قۇرماندى، ءبىر تۇرمەدەن الىپ قاشقان مىڭ رەت" دەيدى. جاستىقتا جەل بار. كارىلىكتە شە؟ مەنىڭشە سول جاستىققا ونىڭ قۇدىرەتىنە دۇرىس باعىت بەرەتىن ورتاسى، ول ورتاسىنىڭ الدىڭعى بۋىنمەن ساباقتاسىپ جاتقان تاجىريبەسى مەن سارا تۇعىرلارى بەلسەندى بولۋ كەرەك سياقتى. 

ءبىز كەشە كەڭەستىك اتەيزمنەن شىققان كەزىمىزدە جاستارعا ءدىن ۇستارتار قاريا جەتىسپەدى. ءدىن تاقىرىبىندا قاريالارىمىزدىڭ بەدەلى دە بولمادى. سول ءبىر وتپەلى كەزەڭدە ءدىني ماسەلەدە جاستار مەن قاريالار اراسىنداعى التىن كوپىر قۇلاۋ الدىندا تۇردى. قارياسى، ياعني شايحى مەن ۇستازىن سىرتتان ىزدەگەن جاستار ەلگە كەلىپ، ءوزىنىڭ شىققان جەرىنە اسپانداپ قاراپ، مەنسىنبەي قارايتىن بولدى. جاستىق قۇدىرەت دەگەن راس، ول تەك بەدەلگە اۆتوريتەتكە باس يەدى. ول بىلەك بولسىن، ول جۇرەك بولسىن ايىرماشىلىعى جوق. پسيحولوگيالىق تۇرعىدان جاستىق فەنومەنى الدىندا ءبىر بەدەل ساقتالۋ كەرەك، ول بيلىك بولسىن، ءداستۇر بولسىن، ءدىن بولسىن، جۇيە بولسىن وزگەرمەيدى. جاستىق سەل سياقتى ونىڭ الدىن الۋ تەك "تەرەڭ ارنالارعا" بايلانىستى.

جاستار بۇگىن ءوزىنىڭ دىنىنە قىزىعۋشىلىق تانىتىپ جاتسا، وندا بۇل قۇبىلىس ءبىر ۇلت ءۇشىن ۇلكەن ءۇمىت دەگەن ءسوز. ء"دىني تانىمعا باسىمدىق بەرىلىپ كەتتى، جاستار ويسىزدىققا، دىنشىلدىككە بوي الدىردى" دەگەن سياقتى مازاسى قاشقان ويلار دا بار اراسىندا. جاستىق وسۋگە، ونۋگە دەگەن ۇمتىلىس پەن سۇرانىستىڭ كورىنىسى. وعان سۋ دا، جىلۋ دا، باپ تا كەرەك. ەگەر ءدىندى سۋ، عىلىمدى جىلۋ دەسەك، سۇراعانىن بەرىپ، باپتاپ وتىراتىن مىنا زايىرلى جۇيە بولۋ كەرەك. مەملەكەت جاستارعا ءوزى قامقور بولىپ، ونىڭ بويىنا ءۇمىت پەن سەنىم ۇيالاتا الاتىن بەدەل كورسەتە السا، جاستىق ول مەملەكەت ءۇشىن التىن تۇعىر بولماق.

ءدىن ول بولمىستىق قاباتتى كۇشەيتەتىن، "مەن" دەگەن ورتالىقتى ناقتىلايتىن ينستيتۋت. ول "مەن" ۇلتتىق "مەندى" دە انىقتايدى. قازىرگى جاستارىمىز تۋرالى كەيبىر اقپارات بەتتەرىندە راديكالدانىپ بارادى دەگەن پىكىرلەر وقىپ قالام. ول پىكىرلەردىڭ وڭ جانە سول جاعالاۋى بار ەكەندىگىن سەزەم. سەبەبى ارينە ۋاحابيلىك تەندەنتسيا جەتەگىندە كەتكەندەردى ءبىلىپ، وقىپ، كورىپ ءجۇرمىز. ولارعا دەگەن مەملەكەتتىك تەتىكتەر كورىنىس تاپسا، باسقالار دا سوعان قاراي بوي تۇزەيدى. جاستىققا "باپ" كەرەك. ول مەملەكەت پەن قوعامنىڭ ورتاقتاسا اتقاراتىن ءىسى. ەر مەن ايەلدىڭ بالالارىن ورتاق تاربيەلەگەنى سياقتى.

اباي-اقپارات