قىتايلىق ۇيعىرلار سيريا باسشىسى باشار اساد رەجيمىنە قارسى سوعىستىڭ قۇرالىنا اينالدى، - دەپ جازادى  InoPressa.ru باسىلىمى  La Stampa گازەتىنە سىلتەمە جاساپ.

سيريادا سوعىسىپ جۇرگەن ۇيعىرلار مىڭداپ سانالاتىن كورىنەدى. اۋعانستان، ورتالىق ازيا جانە تۇركيا اۋماعى ارقىلى سيرياعا جەتكەن ولار الاۆيتتەر تاستاپ شىققان تاۋلى اۋىلداردى مەكەن ەتىپ، الىس ستراتەگيالىق پوزيتسيالاردى باقىلاۋلارىنا العان.

«بۇگىندە سيريانىڭ يدليب پروۆينتسياسىنا (سيريانىڭ سولتۇستىك-باتىسىندا ورنالاسقان پروۆينتسيا) مىقتاپ ورنىققان ۇيعىرلار – سۇننيتتىك سەنىمدەگى تۇركىتىلدەس حالىق» دەپ جازادى باسىلىم.

ء«بىر جىل بۇرىن «ان-نۋسرا مايدانىنىڭ» وداقتاسى Turkistan Islamic Party (TIP) قۇرامىنا كىرگەن ۇيعىرلار بىرنەشە ءجۇز ادام ەدى. يدليب الىنعان سوڭ ۇيعىرلاردىڭ ۇيىمعا كەلىپ قوسىلۋى ارتىپ، شەتەلدىك سودىرلار ىشىندەگى سانى جاعىنان ەڭ كوپ توپقا اينالدى. بۇگىندە ولاردىڭ سانى 4 مىڭنان 5 مىڭعا دەيىن جەتەدى»، دەپ جازادى La Stampa.

بۇل ميگراتسيا يدليب پروۆينتسياسىن تولىقتاي باقىلاۋىنا العان «ان-نۋسرا» اسكەرىمەن وداقتاستىق ارقاسىندا جانە قىتاي مەن پاكىستان تاراپىنان جۇرگىزىلىپ جاتقان لاڭكەستىككە قارسى وپەراتسيالار سالدارىنان ورىن الىپ وتىرعان سەكىلدى. پاكىستتان مەن قىتاي قىسپاعىنان قاشششناقن ۇيعىرلار گيندۋكۋشتى تاستاپ سيريا اسقان سياقتى.

باسىلىم سونداي-اق، سيرياداعى راديكالدى ەمەس كوتەرىلىسشىلەردىڭ ۇيعىرلاردىڭ كەسىرىنەن قىتاي سيرياداعى جاعدايعا ارالاسىپ، رەسەيگە قولداۋ ءبىلدىرۋى مۇمكىن دەپ قاۋىپتەنەتىنىن جازادى. سيريا ۇكىمەتى قحر-دىڭ داماسكىدەگى ەلشىلىگى عيماراتىنىڭ قاۋىپسىزدىگىن كۇشەيتىپ جاتقاندىعىن جانە مەززە اۋەجايىنا قىتايلىق اسكەري مامانداردىڭ كەلەتىنىن راستاعان.

La Stampa سونىمەن قاتار، ۇيعىرلاردىڭ دەنى سيرياعا وتباسىلارىمەن بىرگە بارعانىن، بۇل ولاردىڭ وسى ايماقتا ءبىرجولا قالۋدى ماقسات تۇتاتىنىن بىلدىرەدى دەپ جازادى. ونداعى ۇيعىرلار باسقا «شەتەلدىكتەر» سياقتى ەمەس، وزدەرىنىڭ جۇزدەرىن جاسىرمايدى جانە ەلدەرىنە ەشقاشان ورالمايتىندىقتارىن، ورالعان جاعدايدا ولاردى قاتاڭ جازا كۇتىپ تۇرعانىن اشىق ايتاتىن كورىنەدى.

«قامشى» سىلتەيدى