تابيعينداردىڭ ءبىرى ءاسۋاد يبن يازيد دە ءوز زامانىنىڭ ەڭ بيىك تاقۋالارىنان بولعان. ەكى كۇندە ءبىر قۇران حاتىم شىعارعان. اسىرەسە، تۇنىمەن تام توبەسىندە تىكەسىنەن-تىك نامازدا تۇرىپ قۇران وقيتىن.

ءاسۋادتىڭ كورشىسىنىڭ ءبىر جاس بالاسى بار ەدى. ول ىلعي دا ءتۇن جارىمىندا دالاعا شىعا قالسا كورشى ۇيدەگى تام توبەسىندە قاداۋلى باعانا كورەتىن. ءبىر كۇنى ول ءتۇن جارىمىندا دالاعا شىققانىندا الگى باعانانى كورە المايدى. ەرتەڭىنە اناسىنا: «اناۋ كورشىنىڭ تامىنىڭ توبەسىندەگى باعانا جوق» دەيدى. اناسى: «بالام، ول قاداۋلى باعانا ەمەس، كورشىمىز ءاسۋاد دەگەن كىسى عوي. ول كەشە قايتىس بولدى» دەپ جاۋاپ قاتادى.

مىنە، ءاسۋاد يبن يازيد وسىنداي كىسى ەدى. ول حاق تاعالانى تەرەڭ سۇيگەن، سول ءۇشىن دە كۇنى-ءتۇنى وعان كوپ قۇلشىلىق جاساعان ادام ەدى. ونىڭ حاققا كوپ قۇلشىلىق جاساپ، كوز جاسىن توككەنى سونشا زامانداستارىنىڭ ىشىندە ەڭ اتاقتى تاقۋا ادامداردىڭ وزدەرى كەلىپ بۇعان ء«وز-ءوزىڭدى مۇنشاما قاتتى قيناي بەرمە» دەيتىن. ولاردىڭ بۇل سوزىنە ول: «قيامەتتە ەسەپ بەرۋ اسا قيىن» دەپ جاۋاپ قايىراتىن. وسىلايشا ءومىر باقي حاق تاعالاعا قۇلشىلىق جاساپ ءبىر كۇنى اجال ساعاتى دا تاياپ، ەرىكسىز توسەككە تاڭىلادى. وعان سول زاماننىڭ ەڭ اتاقتى عۇلاماسى ءھام تاقۋاسى، ءوزىنىڭ تۋىسى القاما كەلەدى. اقتىق ساعاتى جاقىنداي تۇسكەندە ءاسۋاد كوزىنە جاس الىپ جىلاي باستايدى. القاما وعان: «نەگە جىلايسىڭ؟ جوق الدە كۇنالارىم كوپ دەپ قورقاسىڭ با؟» دەپ سۇرايدى. ءاسۋاد سوندا: «جو-جوق باۋىرىم، مەن كۇنالارىما جىلاپ جاتقانىم جوق. كۇنالارىم كوپ بولىپ ولسەم مەندە ارمان بار ما؟! مەن كاپىر بولىپ ءولىپ، ارعى جاعالاۋعا يمانسىز كەتەمىن دەپ قاتتى قورقىپ جىلاپ جاتىرمىن» دەپ جاۋاپ قاتادى. مىنە، ءومىر باقي حاققا باس ءيىپ، قۇلشىلىق قىلىپ وتسە دە ولەرىندە يمانمەن كەتۋدى ارمان ەتكەن تاقۋانىڭ بىزدەرگە وشپەس ونەگەسى وسى.

مۇحيتددين يساۇلى

Facebook-تەگى پاراقشاسىنان