امستەردام سوتى تەرگەۋ دەرەكتەرىندە Takilant كومپانياسىنىڭ وزبەكستاننىڭ بايلانىس نارىعىندا Unitel ي Ucell ەنشىلەس وپەراتورلارى ارقىلى جۇمىس ىستەگىسى كەلگەن Vimpelcom جانە سكانديناۆالىق TeliaSonera كومپانياسىنان ءىرى كولەمدە پارا العاندىعى دالەلدەندى دەيدى. سوت شەشىمىن شىعارعان ەكى سۋديا Takilant-قا قوسىمشا 1,7 ميلليون دوللار كولەمىندە ايىپپۇل تولەۋدى مىندەتتەدى. مۇنان بولەك Ucell-ءدىڭ 6 پروتسەنت اكتسياسى تاركىلەنەدى.

وسىنىڭ الدىندا بۇل ءىس بويىنشا جۇمىس ىستەپ جاتقان پروكۋرورلار نەگىزگى ايىپتار گۇلنار كاريموۆانىڭ تىكەلەي وزىنە ەمەس، وعان تيەسىلى كومپانيانىڭ ءىس-ارەكەتىنە قاتىستى بولعانىن ايتقان. ۇستىمىزدەگى جىلدىڭ اقپان ايىندا بلۋمبەرگ اگەنتتىگى Vimpelcom Ltd. اقش پەن نيدەرلاند بيلىگىنىڭ كوررۋپتسياعا قاتىستى ايىپتاۋلارىنان كەيىن 795 ميلليون دوللار تولەۋگە كەلىسكەنىن جازعان.

اقش بيلىگى گوللاندىق پروكۋراتۋرامەن بىرلەسىپ وزبەكستان پرەزيدەنتى گۇلنار كاريموۆاعا تيەسىلى دەلىنەتىن Takilant كومپانياسىنا ءىرى كولەمدە پارا بەردى دەپ Vimpelcom, متس جانە سكانديناۆالىق TeliaSonera كومپانيالارىنا قارسى قىلمىستىق ءىس قوزعاعان. بۇل ءىستىڭ قوزعالۋىنا ستوكگولم سوتىنىڭ Vimpelcom Ltd. ۆيرگينيا ارالىنداعى Water Trail Industries كومپانياسى ارقىلى 2007 جانە 2011 جىلدارى Takilant-قا 55 ميلليون دوللار اقشا قۇيعانى سەبەپ بولعان.

وزبەك سوتى گۇلنار كاريموۆانىڭ سىبايلاسى Takilant كومپانياسىنىڭ قوجايىنى گايان اۆاكياندى ەكونوميكالىق قىلمىسپەن ايىپتاپ، ۇزاق مەرزىمگە تۇرمە جازاسىنا كەسكەن. رەسمي ەمەس مالىمەتتەر بويىنشا، يسلام كاريموۆتىڭ ۇلكەن قىزى وزبەكستاندا ۇيقاماقتا وتىر.

اباي-اقپارات