بۇگىن الماتى قالاسىنداعى بالۋان شولاق اتىنداعى سپورت كەشەنىندە شىلدەنىڭ 18 كۇنى بولعان اتىس كەزىندە قازا تاپقان پوليتسيا قىزمەتكەرلەرىن اقتىق ساپارعا شىعارىپ سالۋ ءراسىمى ءوتتى. قوشتاسۋ راسىمىنە «Abai.kz» ءتىلشىسى دە بارىپ كەلدى.

شەتىن وقيعا كەزىندە شەيىت بولعان ساقشىلار – زەينەتتەگى پوليتسيا پودپولكوۆنيگى نۇريمانوۆ عاني ايتبايۇلى مەن پوليتسيا قىزمەتكەرى، ستارشينا ايان عاليەۆتى الماتى جۇرتى اقتىق ساپارعا شىعارىپ سالدى.

مارقۇمدارمەن قوشتاسۋعا الماتى قالاسى اكىمى باۋىرجان بايبەك، قالالىق ءىىد باسشىلارى مەن ءىىم وكىلدەرى، المالى، الاتاۋ، تۇركسىب اۋداندارىنىڭ اكىمدەرى جانە ساياساتكەرلەر مەن قوعام قايراتكەرلەرى دە قاتىستى.

تاڭعى 09:00-دەن باستاپ باۋلان شولاق سپورت كەشەنىنىڭ الدىنا جينالعان جۇرتتىڭ قاراسى مول بولدى. بەيبىت كۇندە قاندى قول سودىرمەن ايقاسىپ، ەل تىنىشتىعى ءۇشىن  كەۋدەسىن وققا توسقان وتانداستارىنا سوڭعى قۇرمەتىن كورسەتۋگە كەلگەن قالا تۇرعىندارىنىڭ سانى شامامەن بىرنەشە مىڭ ادامنان اسىپ جىعىلدى.

قارالى جيىندا ءسوز العان قالا اكىمى مارقۇمداردىڭ وتباسىلارىنا الەۋمەتتىك كومەك كورسەتىلەتىنىن جەتكىزىپ، تۋىستارىنا كوڭىل ايتتى.

باۋىرجان بايبەك، الماتى قالاسى اكىمى:

- بەيبىت كۇندە كەۋدەلەرىن وققا توسىپ، قالامىزدىڭ، ەلىمىزدىڭ تىنىشتىعى ءۇشىن اقتىق دەمى ۇزىلگەنشە قاندى قول قىلمىسكەرمەن ايقاسقان باتىرلارىمىزدىڭ ەرلىگى ۇمىتىلمايدى. اينالاسى 25 مينۋتتىڭ بىرنەشە جەردە اتىس جاساعان قىلمىسكەر جازاسىن الادى.

ال 18-كۇنگى شەتىن وقيعا كەزىندە ەرلىكپەن قازا تاپقان پوليتسيا قىزمەتكەرلەرى بۇگىن جەر قوينىنا تاپسىرىلماق. بۇگىن ءبىز وسى جەرگە باۋىرلارىمىز ايان عاليەۆ پەن عاني ايتبايۇلىن اقتىق ساپارعا شىعارىپ سالۋعا جينالىپ وتىرمىز. اياننىڭ ارتىندا ورىمدەي ەكى بالاسى قالدى. قىلمىسكەرمەن اتىسىپ، ءوز كەۋدەسىن وققا توسقان پوليتسيا قىزمەتكەرى ايان عاليەۆ قاندى قول قىلمىسكەردى اتىس كەزىندە اۋىر جارالاعان ەدى. سونىڭ ارقاسىندا قىلمىسكەر تۇتقىندالدى. وسى وقيعادان سوڭ مەملەكەت باسشىسى مارقۇم بولعان پوليتسيا قىزمەتكەرلەرىنىڭ وتباسىنا كوڭىل ايتىپ، قولدان كەلەر كومەكتىڭ بارلىعىن كورسەتۋدى تاپسىردى.  

سايان عاليەۆ، قازا تاپقان پوليتسيا قىزمەتكەرى ايان ەربولعانۇلىنىڭ اعاسى:

- ايان سول وقيعا كەزىندە ءوزىنىڭ انتىنا ادالدىعىن كورسەتىپ، ءوزى اۋىر جارالانسا دا، قىلمىسكەردى قۇرىقتاعان ەكەن. سول كۇنى كۇزەتتە بولعان. كۇندەلىكتى جۇمىسقا بارىپ جۇرگەندەي، ەرتەڭگىسىن ۇيدەن شىعىپ كەتكەن ەدى. اتىس باستالعاندا ول كۇزەتتە تۇرىپتى. كەيىن جاڭاعى قىلمىسكەر ايانعا وق اتقان. سوندا اياننىڭ بىرنەشە جەرىنە وق ءتيىپ، قۇلاپ بارا جاتىپ، قىلمىسكەرگە قارسى وق اتىپتى. اياننىڭ قۇلاپ بارا جاتىپ اتقان ەكى وعى تيگەن ەكەن. ارتىندا ايەلى مەن شيتتەي بالا-شاعاسى قالدى، شەشەم قالدى. شەشەمنىڭ جاسى سەكسەننەن اسىپ كەتكەن. اياننىڭ ۇلكەن قىزى 10 جاستا، ال كىشى ۇلى بار بولعانى 7 ايدان ەندى استى. باۋىرىم وسى ۇلدى ۇزاق جىل كۇتكەن ەدى، قىزىعىن دا كورە المادى. زەينەتكە شىعۋىنا ەكى-اق جىل قالىپ ەدى...

بالۋان شولاق اتىنداعى سپورت كەشەشىندە وتكەن قارالى جيىننان سوڭ مارقۇمدار الماتىداعى كەڭساي-2 زيراتىنا جەرلەندى.

ايتا كەتەيىك، شىلدەنىڭ 18-كۇنى بولعان اتىس كەزىندە قازا تاپقان تاعى ءۇش پوليتسيا قىزمەتكەرىنىڭ ءمايىتى وتباسىلارىنىڭ قالاۋىمەن تۋعان جەرلەرىنە جىبەرىلدى. سونداي-اق، بۇگىن الماتى وبلىسىنىڭ پانفيلوۆ اۋدانىندا، ۇزىناعاش قالاسىنا قاراستى قاراقاستەك اۋىلىندا جانە قورداي قالاسىندا دا مارقۇمدارمەن قوشتاسۋ ءراسىمى وتۋدە.

ال اتىس كەزىندە اۋىر جارالانىپ، اۋرۋحانادا قايتىس بولعان تاعى ءبىر پوليتسەيدىڭ جەرلەۋ ءراسىمى ەرتەڭ وتەدى.  

Abai.kz