قالمۇحانبەت قاسىموۆ: «اللا ۋاكبار» دەپ ايقايلاعاندى ەستىگەن جوقپىن

الماتى قالاسىندا 18 شىلدە كۇنى بولعان توسىن وقيعا بارىسى الدىمەن جىلدام اقپارات تاراتاتىن سايتتاردا، سودان سوڭ ىلە-شالا الەۋمەتتىك جەلىلەردە كورىنىس تاپتى. سايتتار، ارينە، ناقتى دەرەكتەرگە سۇيەنىپ، سالقىنقاندىلىق تانىتتى. بۇندايدا ەل اۋزىنداعى ءسوزدىڭ الىپقاشتى سيپات يەلەنەرىن بىلەتىن جاڭا مەديانىڭ كاسىبي جۋرناليستەرى جۇرتقا مەيىلىنشە اشىق جانە انىق اقپارات بەرۋگە بارىن سالدى. وسى رەتتە Abai.kz اقپاراتتىق پورتالىنىڭ كونتەنت-رەداكتورى، جۋرناليست نۇرگەلدى ابدىعانيۇلىنىڭ پوليتسيا جاساعىمەن بىرگە ءجۇرىپ وقيعالار بارىسىن كوزدەن تاسا ەتپەگەنىن ايتقىمىز كەلەدى. ءبىز عانا ەمەس، تاعى بىرنەشە سايتتىڭ جۋرناليستەرى ەل ءىشىن الاڭداتقان وقيعانى «ويدان شىعارا» سالماي ناقتى كورگەن بىلگەندەرىن جۇرتقا جەتكىزدى. بۇلاي ىستەۋ بىرىنشىدەن، جۋرناليستەردىڭ كاسىبي مىنەدى. كاسىبي مىندەتى بولعاندىقتان دا ءباسپاسوز وكىلدەرى قاۋىپكە باس تىگىپ «اتىس-شابىستىڭ» ورتاسىنان تابىلدى. اينالىپ كەلگەندە ارىپتەستەرىمىزدىڭ بۇل ەڭبەگى از ۋاقىتتا ناتيجە كورسەتتى: قوعام دۇرلىكپەي ساباسىنا ءتۇستى. كوپشىلىك الماتىدا نە بولىپ جاتقانىن سالقىن اقىلمەن ساراپقا سالا باستادى. جانە ءبىر ايتارلىعى: 18 شىلدە كۇنى تۇنگى ساعات 20.30-دا شۇعىل بريفينگ وتكىزگەن ءىىم ءمينيسترى قاسىموۆتىڭ مالىمەتتەرى قازاق سايتتارىندا، تەلەارنالاردا تاراعان اقپاراتتاردى رەسميلەدى دەسە بولعانداي. الايدا، ۇشقارى پىكىرگە ۇرىنىپ، جەل سوزگە ەرىك بەرىپ، وتقا ماي قۇيا تۇسكىسى كەلگەندەر دە بولدى. ءتىپتى، «پالەنباي ادامدى كەپىلدىككە الىپتى»، «تۇگىلەنباي جەردە جارىلىس بولادى ەكەن» دەيتىن ۇرەيلى قاۋەسەتتەر دە قاۋلاپ بەردى. نەگە؟ ويتكەنى ءبارى جابىلىپ «جالعىز باندىنىڭ» سوڭىنا تۇسكەن ىشكى ىستەر ورگانى دەر كەزىندە حالىققا دۇرىس اقپارات جەتكىزە المادى. ەلباسى كەشكە قاراي قاۋىپسىزدىك كەڭەسىنىڭ شۇعىل جيىنىن شاقىرعان سوڭ بارىپ سويلەۋگە، ايتۋعا ءتيىستى تۇلعالارعا ءتىل ءبىتتى. سونىڭ ءبىرى گەنارال  قالمۇحانبەت قاسىموۆ بولدى. ال ەندى كەشەلى بەرى قاسىموۆ «ينتەرنەتتە جالعان اقپارات تاراتقاندار مەن كۋاگەرلەردىڭ تەكسەرىلمەگەن سۇحباتىن جاريالاعان تۇلعالارعا قاتىستى قىلمىستىق ءىس قوزعالدى» دەپ وتىر.

ءمينيستردىڭ ايتۋىنشا، ول كەشە ءتۇن ورتاسىنا دەيىن وتىرىپ، الماتىدا ورىن العان وقيعالاردىڭ بەينە جانە فوتوجازبالارىن تۇگەل قاراپ شىققان دەپ حابارلايدى قازاقپارات ءتىلشىسى. مىسال رەتىندە مينيستر اتىس كەزىندە المالى اۋداندىق ىشكى ىستەر ءبولىمىنىڭ ماڭىندا ءجۇردىم دەگەن ايەلدىڭ سۇحباتىن ايتىپ وتىر. ول ايەلدىڭ ايتۋىنشا، قىلمىسكەر «اللا ۋاكبار» دەپ ايقايلاعان. ايتا كەتەيىك، «ترۋبينا» گازەتىنىڭ بۇرىنعى باس رەداكتورى المات ازادي دە بۇگىن ءوزى جازعان  ماتەريالىندا قىلمىسكەر «اللا ۋاكبار» دەپ ايقايلاعانىن ەستىدىم دەپ جازعان.

«بەينەكامەرانىڭ جازباسىندا مەن ونداي ەشتەڭە ەستىگەن جوقپىن... بۇل بارىپ تۇرعان وتىرىك. جانە بۇل سۇحبات ينتەرنەتكە شىققان. ودان كەيىن سۋپەرماركەتتە حالىق تۇتقىنعا الىندى دەگەن اقپارات تارادى. بۇل اقپارات تا ينتەرنەت ارقىلى تارادى. ءبىز قازىر ول اقپاراتتاردى تەكسەرۋ ءۇشىن ادامدارىمىزدى جىبەردىك. قازىر جالعان اقپارات تاراتقان ادامدارعا قاتىستى قىلمىستىق ءىس قوزعادىق جانە سول بلوگەرلەر مەن تىلشىگە ادۆوكات ىزدەي بەرۋگە كەڭەس بەرەمىن»، - دەدى ق.قاسىموۆ.

ال، بەلگىلى ساياساتكەر ءامىرجان قوسانوۆ بولسا، FB-داعى جەكە پاراقشاسىندا «اقپارات تاراتقانداردى ەمەس، الدىمەن دەر كەزىندە قاجەتتى اقپاراتتى تاراتپاعانداردى جاۋاپقا تارتۋ كەرەك» دەپ وتىر.

Abai.kz