بيلىكتى  باسىپ الۋعا ارەكەت ەتتى دەپ ايىپتالىپ وتىرعان بۇرىنعى بيزنەسمەن توقتار تولەشەۆ قازاقستاننىڭ ۆيتسە-پرەزيدەنتى بولۋعا ۇمتىلىپ، ارتىنشا مەملەكەتتى باسقارعىسى كەلگەن دەپ حابارلايدى قازاقپارات. 

اتىراۋ مەن اقتوبەدە باستالىپ، بۇكىل قازاقستان اۋقىمىن قامتىعان جەردى جالعا بەرۋگە قارسى وتكەن ميتينگىلەر ۇمىتىلا باستاعان تۇستا بيلىك ەسىمىزگە توقتار تولەشوۆتىڭ ءىسىن قايتادان سالدى. 

شەندىلەردىڭ ءسوز ىڭعايىنا قاراساڭىز، تولەشوۆ توڭكەرىس جاساپ، ەلدىڭ بيلىگىن باسىپ الماق بولعان. 

بۇل تۋرالى بۇگىن ۇلتتىق قاۋىپسىزدىك كوميتەتىنىڭ ءباسپاسوز قىزمەتىنىڭ وكىلى رۋسلان كاراسەۆ ءمالىم ەتتى.

رۋسلان كاراسەۆتىڭ ايتۋىنشا، بيلىكتى باسىپ الۋ ءۇشىن توقتار تولەشەۆ الدىمەن ەلدەگى جاعدايدى تۇراقسىزداندىرۋعا ارەكەت جاساعان. بۇل ءۇشىن توقتار تولەشەۆ 2005 جانە 2010 جىلى قىرعىز رەسپۋبليكاسىندا بولعان جاعدايدى وتە مۇقيات زەرتتەگەن. ءتىپتى، قىرعىزستانعا ءوزى بارىپ، كەرەكتى ماتەريالدار مەن دەرەك-دايەكتەر ىزدەگەن.

«بيلىككە حالىق اراسىندا جاپپاي تارتىپسىزدىك ورناتىپ، حالىقتى نارازىلىققا ازعىرۋ ارقىلى كەلۋگە بولاتىنىن تۇسىنگەن ول بۇل ارام پيعىلىن قازاقستاننىڭ باتىسىندا تەز جۇزەگە اسىرۋعا بولادى دەگەن بولجام جاساعان. تولەشەۆ قازاقستاننىڭ  باتىس وڭىرىندە نارازى توپتار بار دەپ پايىمداپ، الەۋمەتتىك-ەكونوميكالىق جانە وزگە دە ماسەلەلەردى العا تارتا وتىرىپ، نارازى توپتاردى ءوز مۇددەسى ءۇشىن پايدالانباق بولعان. جاپپاي تارتىپسىزدىك پەن ادەيى ۇيىمداستىرىلعان نارازىلىق اكتسيالارىنىڭ بارىسىندا ول بيلىككە ۋلتيماتۋم قويىپ، ءوزى  ءۇشىن ۆيتسە-پرەزيدەنت لاۋازىمىن ەنگىزۋدى كوزدەگەن. ارتىنشا، مەملەكەتتى ءوزى باسقارۋدى ويلاعان»، - دەپ حابارلادى رۋسلان كاراسەۆ.

وسى رەسمي اقپاراتتاعى "الدىمەن ۆيتسە-پرەزيدەنت بولۋدى ماقسات ەتىپ" دەگەندى قالاي تۇسىنۋگە بولادى؟ سوندا ەلدە توڭكەرىس بولسا، تۇرمەدەگى تولەشوۆ بوستاندىققا ۆيتسە-پرەزيدەنت بولىپ شىعار ما ەدى؟ ونى كىم، قالاي تاعايىنداماق؟ 

"ارتىنشا مەملەكەتتى باسقارۋدى ويلاعان". توقتار تولەشوۆتىڭ ءسوزىن سويلەمەك ەمەسپىز. سوندا دا 300-گە جۋىق ادامدى تەرگەپ، "شىندىقتىڭ" شىمىلدىعىن اشپاق بولعان قۇزىرەتتى ورگاندار ميفتەنگەن اڭىز ايتۋدان اۋلاق بولسا دەگەن نيەتىمىز بار. ەگەر دە تولەشوۆتىڭ كۇشى 25 جىل ىشىندە اياعىنان تىك تۇرعان، اسكەري كۇشى مىعىم، ەكونوميكاسى قارىشتاپ دامىعان قازاق مەملەكەتىنىڭ شاڭىراعىن شايقالتۋعا جەتسە، ميللياردتاردى قالتاسىنا باسىپ الىپ، جالعاندى جالپاعىنان باسىپ جۇرگەن وزگە ازاماتتارىمىز الەمگە ويران سالۋعا قابىلەتتى بولار...

جەر ماسەلەسىنە قاتىستى داۋ-داماي ءالى بىرجاقتى بولعان جوق. قازاق حالقىنىڭ بەيبىت ميتينگكە شىعىپ، بيلىككە ءۇنىن جەتكىزگەن اق ادال نيەتىن تولەشوۆتىڭ قانجىعاسىنا بايلاي سالۋ - تىم اقىلدى شەشىم بولماسا كەرەك. ونىڭ ۇستىنە قاسيەتتى جەرىنىڭ تۇتاستىعىن ويلاپ، قازاق حالقىنىڭ بيلىككە بەيبىت تالاپ قويعانىن قايداعى ءبىر تولەشوۆكە تەلۋ - بۇل حالىقتى قورلاۋ، مازاقتاۋ، ماسقارالاۋ بولىپ تابىلادى. ەگەر دە ءبىزدىڭ جاۋاپتى ورگاندار ءدال وسى ستسەناريمەن حالىقتى قارالاي بەرۋدى جالعاسىترسا، تولەشوۆ پەن بيلىكتىڭ تۇسىنە دە كىرمەگەن "توڭكەرىستىڭ" بولىپ كەتۋى ابدەن مۇمكىن. 

وسى ورايدا تەرگەۋ كەزىندە ت.تولەشەۆتىڭ ءوز قاراماعىنداعى كۇزەت فيرماسى نەگىزىندە قارۋلى جاساق قۇرعانى انىقتالعانىن ايتا كەتەيىك. Baq.kz-ءتىڭ جازۋىنشا، اتالعان توپ ونىڭ بارلىق تاپسىمالارىن ورىنداپ وتىرعان.

تولەشەۆتىڭ قاراماعىندا 90 سارباز بولدى دەگەن مالىمەت بار. اتالعان توپتى ول باس كەزىندە «سمەرش» فيرماسى رەتىندە تىركەسە، ارتىنان «ۆىمپەلگرۋپپ» دەپ كۇزەت فيرماسىن اشقان.

وسى ىسكە قاتىسى بار باس پروكۋروردىڭ بۇرىنعى ورىنباسارى يلياس باقتىباەۆ پەن وڭتۇستىك قازاقستان وبلىستىق ىشكى ىستەر دەپارتامەنتىنىڭ ەكس-باسشىسى حيبراتۋللا دوسقاليەۆ شىمكەنتتىك كاسىپكەردىڭ بيلىكتى باسىپ الۋ مەن جاپپاي تارتىپسىزدىكتەر ۇيىمداستىرۋعا قاتىستى جوسپارلارىن قولداعانى ءۇشىن مەملەكەتتىك توڭكەرىستەن كەيىن جوعارعى سوت توراعاسى مەن ىشكى ىستەر ءمينيسترى قىزمەتتەرىنە قويىلادى دەگەن جوسپار بولعان.

ايتپاقشى,  ۇلتتىق قاۋىپسىزدىك كوميتەتى تاراتقان مالىمدەمەدە "تولەشوۆ ترانسۇلتتىق قىلمىستىق قوعامدى قارجىلاندىرعان جانە قارۋلانعان توپتى قۇرىپ، باسقارعان. ول باسقارعان قىلمىستىق توپ ادام ءولتىرىپ، قاستاندىق جاساپ، ادام ۇرلاعان، ادامنىڭ باس ەركىن بوستاندىقتان ايىرىپ، قاراقشىلىق قىلمىستار جاساعان" دەگەن سوزدەر بار. بىزدىڭشە، مىنە، تولەشوۆتىڭ وسى سۇمدىق ىستەرى بارىنشا اشكەرە تاۋىپ، كۇدىكتى  زاڭ الدىندا جاۋاپ بەرۋى كەرەك. بىراق، قاراقشىلىقپەن اينالىسقان ادامنان "قاھارمان" جاساۋدىڭ قاجەتى جوق.

ءشارىپحان قايسار

Abai.kz