سارسەنبى كۇنى اقش پرەزيدەنتىنىڭ كەڭەسشىسى بەن رودس تەلەفون ارقىلى ءباسپاسوز ءماسليحاتىن وتكىزىپ، ءسامميتتىڭ اسا كۇردەلى ءارى جاۋاپتى كەزەڭدە وتكەلى جاتقانىن حابارلادى. ۇلىبريتانيانىڭ ەۋروپالىق وداق قۇرامىنان شىعۋى، رەسەيمەن اراداعى قارىم-قاتىناستىڭ شيەلەنىسۋى جانە بوسقىندار ماسەلەسى وسى ءسامميتتىڭ باستى تاقىرىپتارىنا اينالادى.

پرەزيدەنت وباما ۆارشاۆادا ەۋروكەڭەس توراعاسى دونالد تۋسكپەن، ەۋروكوميسسيا باسشىسى جان-كلود يۋنكەرمەن جۇما كۇنى تاڭەرتەڭ كەزدەسىپ، ۇلىبريتانيانىڭ ەۋروپالىق وداقتان شىعۋى (Brexit) جانە رەسەيمەن قارىم-قاتىناس ماسەلەرىن تالقىلايدى. رودستىڭ ايتۋىنشا، وسى كەزدەسۋلەردەن كەيىن وباما ناتو-نىڭ باس حاتشىسى يەنس ستولتەنبەرگپەن جۇزدەسىپ، سامميتكە دايىندىق بارىسىن پىسىقتايدى. ودان سوڭ اقش پرەزيدەنتى ناتو ءسامميتىن وتكىزۋشى ەل – پولشا پرەزيدەنتى اندجەي دۋدامەن كەزدەسەدى.

بەن رودستىڭ حابارلاۋىنشا، ناتو كەڭەسىنىڭ العاشقى سەسسياسى جالپى ماسەلەلەردى، اتاپ ايتقاندا چەرنوگوريانىڭ اليانسقا قابىلدانۋى، قورعانىس شىعىندارى، كيبەرقاۋىپسىزدىك سۇراقتارىن تالقىلاۋعا ارنالادى. جۇما كۇنى كەشكىلىك اسپەن ءبىر ۋاقىتتا وتەتىن ەكىنشى وتىرىستا ناتو جەتەكشىلەرى رەسەيگە كوڭىل بولەدى.

ناتو قۇرىلعالى بەرگى ۋاقىتتا جوعارى دەڭگەيدە 27 كەزدەسۋ ۇيىمداستىرىلدى. پولشاداعى سامميتكە 58 رەسمي دەلەگاتسيا - ناتو-نىڭ بارلىق 28 وداقتاسى، اليانس قۇرامىنا قابىلدانعالى وتىرعان چەرنوگوريا، 26 ارىپتەس ەل، سونداي-اق بۇۇ، ەو، دۇنيەجۇزىلىك بانك جانە ناتو پارلامەنتتىك قاۋىمداستىعى قاتىسادى.

اباي-اقپارات