جەر رەفورماسى تۋرالى كوميسسيانىڭ كەزەكتى، كوشپەلى وتىرىسى قىزىلوردا وبلىسىندا وتكەنى بەلگىلى. التىنشى وتىرىستىڭ الدىندا عانا اقوردانىڭ پارمەنىمەن كوميسسيانىڭ باسى ءبۇتىن جەتەكشىسى جانە ۇكىمەت باسشىسىنىڭ ورىنباسارى اتانعان ءارى اۋىلشارۋاشىلىق ءمينيسترى اسقار يسابەكۇلى اتالعان كوميسسيانىڭ قازىرگى جۇمىسىنا كوڭىلى تولمايتىندىعىن ءبىلدىردى.

اۋىلشارۋاشىلىق مينيسترىنە كوميسسياداعى كوپ مىرزانىڭ كوپىرىپ سويلەگەنى ۇناماسا كەرەك، «جەرسابەتكە» سوزدەن ىسكە كوشۋ كەرەكتىگىن اشىق ايتتى. ۇرانداتىپ سويلەگەندەردىڭ ۇرتىن باسۋعا بەك نيەتتى ەكەندىگىن دە جاسىرمادى.

ء«بىز بۇگىنگى وتىرىستى باسقاشا فورماتتى وتكىزۋگە تىرىستىق. ەندى لاجى بولسا، قايتالاپ ايتا بەرمەي، سول تۋىنداپ وتىرعان پروبلەمالار، كوتەرىپ وتىرعان ماسەلە بويىنشا قانداي شەشىم قابىلداۋىمىز كەرەك؟ قولدانىستاعى زاڭداردى قالاي جاقسارتۋىمىز كەرەك؟ سونىڭ ىشىندەگى حالىقتىڭ دا كوكەيىندە جۇرگەن ماسەلەلەردى قالاي وڭتايلاندىرۋ كەرەك؟ وسى ماقساتتا ۇشى شىعىپ تۇرعان ماسەلەلەردى توپتاستىرىپ، وسى جيىنعا دايىندادىق. بىراق، بۇل ۇسىنىستار بويىنشا ەشقانداي تالقىلاۋلار بولعان جوق. ءبىز كۇتكەندەي وسى جەردەگى تاۋار وندىرۋشىلەر، كوميسسيا مۇشەلەرى ناقتى ۇسىنىستار بىلدىرە مە دەپ ەدىك، ونداي ۇسىنىستار ايتىلمادى. تاعى دا سول ايتىلىپ جۇرگەن ماسەلەلەر قايتا-قايتا ايتىلدى. ونىڭ ۇستىنە كەيبىر ماسەلەلەرگە كەلگەندە ناقتى ۇسىنىس ەمەس، سول ۇرانداتىلعان، پوپۋليزمگە جاقىنداۋ سوزدەر ايتىلدى. سوندىقتان ءبىز وسىعان جاقسىلاپ كوڭىل اۋدارۋىمىز كەرەك سياقتى»،-دەدى اسقار مىرزاحمەتوۆ.

«اتالعان كوميسسيا ساياسي الاڭعا اينالدىرۋ ءۇشىن قۇرىلماعاندىعىن» جانە ءبىر مارتە ەسكەرتكەن اۋىلشارۋاشىلىق ءمينيسترى، ۆيتسە-پرەمەر اسقار يسابەكۇلى جەردى ساتۋ جانە شەتەلدىكتەرگە جالعا بەرۋ تۋرالى ەكىۇشتى پىكىر ءبىلدىردى.

«جالپى ءبىز ايتامىز، «ساتىلماسىن، ساتىلماسىن»، دەپ. ال نەگە ساتىلماسىن؟ سىزدەر ايتتىڭىزدار عوي، ساتۋ مەن جالدىڭ ايىرماسى قانداي دەپ. ايىرماسى – ساتىلعاننان كەيىن ونىڭ ەگەسى بولادى. وزدەرىڭىزگە وزدەرىڭىز قارسى ارگۋمەنت ايتىپ وتىرسىزدار. جەردى ساتقان كەزدە – سىبايلاس جەمقورلىق بولادى دەپ. ال ەندى ونى جالعا بەرگەندە جاڭاعى سىبايلاس جەمقورلىق بولماي ما؟! ول بولۋى مۇمكىن عوي. ءبىز ەكەۋىنىڭ ايىرماسىن كورىپ وتىرمىز. مىنداعى تاۋار وندىرۋشىلەر دە ايتىپ وتىر. ونى دا ەسكەرۋىمىز كەرەك. شىن مانىندە جاڭاعى ەكىنشى دەڭگەيلى بانكتەر جالعا الىپ وتىرعان جەرگە نەسيە بەرۋ ءۇشىن كەپىلدىك سۇرايدى. ەكەۋىنىڭ ايىرماسى جەر مەن كوكتەي. ال ەندى ول جەردىڭ ەگەسى بولمايتىن بولسا، ءبىز ول جەرلەرگە قاي جاقتان قارجى تارتامىز؟ قاي جاقتان ينۆەستيتسيا تارتامىز؟ سىبايلاس جەمقورلىق دەپ قالدىڭىزدار. جاڭاعى شارۋا قوجالىعىنىڭ يەسى ول جەرگە اقشا سالۋدان قاشۋى دا مۇمكىن. «نەسىنە مەن ول جەرگە اقشا سالۋىم كەرەك، ەگەر ول جەردى 1-2 جىلدان سوڭ شەنەۋنىكتەر تارتىپ الاتىن بولسا»، دەۋى دە مۇمكىن عوي. سوندىقتان مۇنداي ماسەلەلەر بار، ءبىز ونى ەسكەرۋىمىز كەرەك»،-دەيدى اسقار يسابەكۇلى.

ءتۇيىن: اسقار يسابەكۇلى ءوز ءىسىنىڭ كاسىبي شەبەرى ەكەنىن وقو-نى باسقارعان كەزىندە، باس پارتيادا باسشىلىق قىزمەتتە جۇرگەنىندە دالەلدەگەنى راس. اۋىلشارۋاشىلىعىنىڭ مامانىنا پرەزيدەنت قر اۋىلشارۋاشىلىعى مينيسترلىگىن باسقارۋدى تاپسىرعاندا جۇرت اسقار مىرزادان قوعامداعى وتە نازىك تاقىرىپقا اينالعان «جەردى ساتۋ مەن ونى شەتەلدىكتەرگە جالعا بەرۋ» ماسەلەسىندە كوپ ءۇمىت ارتقان. ارنايى قۇرىلعان كوميسسيانىڭ تىزگىنىن نىق ۇستاعاندا دا حالىق «حالىقشىل» مينيستر جەردى لاتيفۋنديستەر مەن شەتتەن كەلەتىن شۇرەگەيلەردەن قورعاپ قالادى دەپ سەندى. اۋەلدە 75 مۇشەدەن قۇرالعان، كەيىن بەلگىلى، بەلگىسىز سەبەپتەرمەن قاتارى سيرەگەن كوميسسيانىڭ التىنشى وتىرىسىندا اسقار مىرزاحمەتوۆ مىرزا «جەر نەگە ساتۋلماۋى كەرەك» دەپ شىققاندا ءدۇيىم جۇرتتىڭ سەنىمى سەلدەي اققانى دا جاسىرىن ەمەس. سونىمەن، مىرزاحمەتوۆ مىرزانىڭ «جەر ماسەلەسىندە»ۇستانىمى قانداي؟ مينيستر مىرزا جوعارىداعى سوزىمەن نەنى مەڭزەپ وتىر؟

نۇرگەلدى ابدىعانيۇلى

Abai.kz