باق وكىلدەرى سوت ءماجىلىسى زالىنا كىرگىزىلمەدى; ۇكىمدى جاريالاۋ ءساتىن ولار باسقا بولمەدەگى بەينەمونيتور ارقىلى باقىلادى.

سوت كامەلەت جاسقا تولماعان بالالاردى جاسىرىن تۇردە ءسوز بايلاسىپ ساتقان، جالعان قۇجاتتار جاساعان جانە پايدالانعان دەپ ايىپتالعان سوتتالۋشىلاردى كىنالى دەپ تانىدى. 15 سوتتالۋشى جازاسىن تۇرمەدە وتەيتىن بولدى. قىلمىستىق ىستە بەلسەندىلىك تانىتقان دەلىنگەن مەديتسينالىق مەكەمە قىزمەتكەرلەرى بەس جىلدان توعىز جىلعا سوتتالدى; ال مەكەمەنىڭ قالعان قىزمەتكەرلەرى ەكى جىل تۇرمەدە وتىرادى. جاڭا تۋعان سابيلەرىن ادەيى ساۋدالاعان دەپ تانىلعان انالار دا ەكى جىل تۇرمە جازاسىنا كەسىلدى. نارەستەلەردى اسىراپ الۋشىلار كىنالارىن مويىنداۋىنا بايلانىستى قىلمىستىق جاۋاپكەرشىلىكتەن بوساتىلدى.

32 سوتتالۋشىنىڭ تۇرمە مەرزىمىن العان 15-ءى سوت زالىندا كىسەندەلدى. جازانى وتەۋ مەرزىمى 2016 جىلدىڭ 5 شىلدەسىنەن باستالادى. ۇكىم وقىلىپ جاتقاندا سوتتالۋشىلاردىڭ ءبىرىنىڭ دەنساۋلىعى سىر بەرىپ، سوت زالىندا بولعان جەدەل جاردەم دارىگەرلەرى وعان العاشقى مەديتسينالىق كومەك كورسەتتى.

سوت شەشىمى بويىنشا، الماتى وبلىستىق كوپسالالى اۋرۋحاناسىنىڭ پەرزەنتحانا ءبولىمىنىڭ قىزمەتكەرلەرى سەگىز جىل بويى جاڭا تۋعان نارەستەلەردى ساتۋمەن اينالىسقان. ولار كەيبىر جاس انالاردى سابيدەن باس تارتۋعا ۇگىتتەپ، نارەستەلەرگە جاڭا اتا-انا ىزدەستىرگەن. سوت ۇكىمىندە كورسەتىلگەندەي، سابيلەردىڭ قۇجاتتارى ولاردى تۋعان انالارعا ەمەس، بىردەن ساتىپ الۋشىلاردىڭ اتىنا راسىمدەلگەن. ساۋداعا تۇسكەن نارەستەلەردىڭ جاڭا اتا-انالارى ولاردى تۋ تۋرالى كۋالىكتەرىمەن بىرگە ساتىپ الىپ جۇرگەن.

اباي-اقپارات