ازاتتىق راديوسىنىڭ ءتىلشىسى گەورگي كوبالادزەنىڭ حابارلاۋىنشا، رەسەيلىك جانە ۋكراينالىق دەلەگاتسيا "تبيليسي دەكلاراتسياسىن" تالقىلاۋ بارىسىندا داۋلاسىپ قالدى. ءسوز تالاستىرۋ كەزىندە ۋكراينا جوعارعى راداسىنىڭ دەپۋتاتى يگور پوپوۆ رەسەيدى ۋكرايناعا قارسى اگرەسسيا جۇرگىزدى، ەگەمەندى مەملەكەتتىڭ الەمدىك قاۋىمداستىق تانىعان اۋماعىنىڭ ءبىر بولىگىن اننەكتسيالادى جانە باسىپ الدى دەپ ايىپتادى. پوپوۆتىڭ پىكىرىنشە، سول ارقىلى ماسكەۋ حالىقارالىق قۇقىقتى ورەسكەل بۇزدى، ال قازىر دونباستا "سەپاراتيستىك سايلاۋ" وتكىزۋ ارقىلى "اننەكتسيانى زاڭداستىرۋعا" تىرىسىپ جاتىر. ۋكراينالىق دەپۋتات رەسەي فەدەراتسياسىنا قىسىم رەتىندە سانكتسيالاردى ودان سايىن قاتايتۋدى ۇسىندى.

رف مەملەكەتتىك دۋماسىنىڭ دەپۋتاتى ليۋدميلا كوزلوۆا بۇل ايىپتاۋلارعا ۋكراينادا عانا ەمەس، سونداي-اق تاياۋ شىعىستاعى مەملەكەتتەردەگى جاعدايدىڭ ۋشىعۋىنا "سىرتقى كۇشتەردىڭ" ىقپالى اسەر ەتتى، ال رەسەي "قىرىم تۇبەگى تۇرعىندارىنىڭ ەركىن قالاۋى بويىنشا قوسىپ الدى" دەپ جاۋاپ بەردى. پارلامەنتتىك قاۋىمداستىق "تبيليسي دەكلاراتسياسىن" جانە ونىڭ اجىراماس بولىگى سانالاتىن "قىرىمداعى ادام قۇقىعىنىڭ جانە ەركىندىك نەگىزدەرىنىڭ جانە قىرىم-تاتارلارى حالقىنىڭ قۇقىقتارىنىڭ بۇزىلۋى تۋرالى" قاراردى اقىرى بەكىتتى.

وسىنىڭ الدىندا رەسەيلىك دەلەگاتسيا قارار جوباسىنىڭ كوپشىلىك قولداۋعا يە بولۋىنا نارازالىق تانىتىپ، ەقىۇ تۇراقتى كەڭەسىنىڭ ءماجىلىس وتىرىسىن تاستاپ شىققان ەدى.

اباي-اقپارات