الەمدە ساعان قان تۋىستىعى جوق جەتى ميللياردتان استام ادام بار. جوق. ولاي ەمەس. الەمدەگى جەتى ميللياردتان استام ادامنىڭ ارى كەتسە جيىرما-وتىزى ساعان جاقىن تۋىس. قالعانى بوتەن. سەن ولاردىڭ ەشقايسىنىڭ وتكەنىن بىلمەيسىڭ، بىلسەڭ دە، كوڭىلىڭە المايسىڭ. سەن ولاردىڭ ەشقايسىنىڭ بۇگىنى مەن ەرتەڭىنە الاڭدامايسىڭ. ولار - بولەك الەم، بوتەن ءومىر. 

ولاردىڭ جاقسى بولعانىنان ساعان كەلىپ-كەتەر پايدا، جامان بولعانىنان كەلىپ-كەتەر زيان جوق. ولاردىڭ ءومىرى قالاي قالىپتاسىپ، قالاي ءوتىپ جاتقانىنىڭ ساعان تيەتىن اسەرى جوق. ولار اۋىرسا سەنەن كومەك سۇرامايدى. قۋانسا - سەن بىرگە قۋانسىن دەمەيدى. قايعىعا دۋشار بولسا، سەنەن جۇبانىش ىزدەمەيدى. ولار بايىسا - سەنىمەن بايلىعىن بولىسپەيدى. ولار جەتىستىككە جەتسە، سەنى سوعان ورتاق قىلمايدى. ولار بارىنان ايرىلسا - قايتادان اياعىنان تىك تۇرىپ كەتۋ ءۇشىن سەنىڭ قولداۋىڭدى كۇتپەيدى. ولار دا سەنىڭ وتكەنىڭە، بۇگىنىڭ مەن ەرتەڭىڭە الاڭدامايدى.

تەك، سول جەتى ميللياردتىڭ اراسىندا ءبىر ادام بولادى. ونىڭ دا ساعان ەش قاتىسى جوق. بىراق، ونىڭ جەتكەن جەتىستىگىنە قۋاناسىڭ. ونىڭ كوڭىلىنە قاياۋ تۇسسە - سەنىڭ جانىڭ شىرقىرايدى. ول قۋانسا - توبەڭ كوككە جەتەدى. وعان قيانات جاسالسا - سەن ىزالاناسىڭ. ول نالىسا - سەنىڭ كومەيىڭە وكسىك تىعىلادى. ول اۋىرسا - اۋرۋىن ءبولىپ العىڭ كەلەدى، ول قينالسا - اۋىرتپالىعىن بىرگە كوتەرگىڭ كەلەدى. ول باقىتتى بولسا - سەن باقىتتىسىڭ، بىراق باقىت ورتاق ەمەس. جالپى، ەشتەڭە ورتاق ەمەس. ويتكەنى، ول ادام دا، اناۋ، سەنىڭ وتكەنىڭ دە، بۇگىنىڭ دە، ەرتەڭىڭ دە الاڭداتپايتىن جەتى ميللياردتىڭ بىرەۋى. ول دا - بولەك الەم، بوتەن ءومىر.

نازگۇل قوجابەكوۆا

Facebook-تەگى پاراقشاسىنان