تاڭەرتەڭ ەرتە ۇشىرىلعان "ماسۋدان" زىمىران جاپون تەڭىزىنە قۇلاعان سوڭ وڭتۇستىك كورەيالىق جانە امەريكالىق سپۋتنيكتەر ەكىنشى زىمىران ۇشىرىلعانىن ءتۇسىرىپ العان. ەكىنشى زىمىران شامامەن 400 كيلومەتر ۇشىپ بارىپ قۇلاعان. سولتۇستىك كورەيا ءساۋىردىڭ ورتاسىنان بەرى جاڭا "مۋسۋدان" بالليستيكالىق زىمىرانىن التى رەت سىناپ، ونىڭ تورتەۋى ءساتسىز بولعان. باتىس ەلدەرىنىڭ باعالاۋىنشا، زىمىراننىڭ ۇشۋ قاشىقتىعى ءتورت مىڭ كيلومەترگە دەيىن جەتۋى مۇمكىن.

ساراپشىلار پحەنياننىڭ زىمىران سىناعىن اسىعا جاساۋىن سولتۇستىك كورەيا پرەزيدەنتى كيم چەن ىننىڭ اقش تەرريتورياسىنا يادرولىق جانە حيميالىق قارۋدان سوققى بەرە الۋعا قابىلەتتى ەكەنىن كورسەتۋ نيەتىمەن بايلانىستىرادى.

جاڭا زىمىراننىڭ ۇشۋ راديۋسى اقش-تىڭ ءىرى اسكەري بازاسى ورنالاسقان امەريكالىق گۋام بازاسىنا جەتەدى. پحەنيان بۇعان دەيىن زىمىرانعا ارنالعان يادرولىق وقتۇمسىق جاساعانىن ايتىپ، اقش-قا يادرولىق سوققى بەرەتىنى تۋرالى بىرنەشە دوق كورسەتكەن. قاڭتاردا سولتۇستىك كورەيا ءتورتىنشى رەت يادرولىق زاريادىن ءساتتى سىناقتان وتكىزگەن.

اباي-اقپارات