قازاقستان ۇلتتىق قاۋىپسىزدىك كوميتەتى (ۇقك) اقتوبە وبلىسى بويىنشا دەپارتامەنتىنىڭ باستىعى نۇرلان قادىرباەۆتىڭ "وتستاۆكاعا كەتكەنى" تۋرالى اقپاراتقا كوممەنتاري بەرمەدى.

بۇگىن قاۋىپسىزدىك ورگاندارىنداعى دەرەككوزى ازاتتىققا اقتوبەدەگى ۇقك دەپارتامەنتى باستىعى نۇرلان قادىرباەۆتىڭ وتستاۆكاعا كەتكەنىن ايتقان.

نۇرلان قادىرباەۆ وتكەن اپتادا اقتوبەدە پرەمەر-مينيستر كارىم ماسىموۆپەن وتكەن جيىندا وبلىستا راديكالدىق ۇستانىمداعى 1665 ادام بارىن، ولاردىڭ 90-ى "قاۋىپتى جيھادشىل" ەكەنىن مالىمدەگەن . ول "ساۋاتتى تەولوگتار مەن بەدەلدى يمامدار اسا تاپشى بولعاندىقتان ولاردى رايىنان قايتارۋ كوبىنە قيىن ەكەنىن" ايتقان. نۇرلان قادىرباەۆ اقتوبەدە 5 ماۋسىمدا بولعان شابۋىلدار مەن ودان كەيىنگى ارنايى وپەراتسيالاردا ۇقك دەپارتامەنتى مەن ىشكى ىستەر دەپارتامەنتى ماتەريالدىق-تەحنيكالىق قامتاماسىز ەتىلۋ جاعىنان قيىندىق كورگەنىن دە جەتكىزگەن.

5 ماۋسىمدا اقتوبەدە 26 ادام ەكى قارۋ-جاراق دۇكەنىن توناپ، ۇلتتىق گۆارديانىڭ اسكەري ءبولىمىن باسىپ الۋعا تىرىسقان. شابۋىل مەن اتىستان رەسمي مالىمەت بويىنشا 7 ادام قازا تاۋىپ، 40 شاقتى ادام جارالانعان. التى كۇنگە سوزىلعان ارنايى وپەراتسيادا شابۋىلعا كۇدىكتى دەلىنگەن 18 ادامنىڭ كوزى جويىلىپ، بىرنەشە ادام ۇستالعان.

قازاقستان پرەزيدەنتى نۇرسۇلتان نازارباەۆ شابۋىل جاساعانداردىڭ "راديكالدىق ءدىني توپ وكىلدەرى" بولعانىن جانە ولاردىڭ "شەتەلدەن نۇسقاۋ العانىن" مالىمدەگەن.

اباي-اقپارات