وقيعا ورنىنا كەزدەيسوق تاپ بولىپ، وققا ۇشا جازداعان ادام ايتادى: ء«وتىپ بارا جاتسام، پاترۋل ماشيناسىنىڭ ارتقى ەسىگى اشىق، پوليتسەي فورماسىنداعى ەكى ادام قانسىراپ جاتىر. توقتاپ تۇسە بەرگەنىم سول ەدى، اتىس باستالىپ كەتتى. ماشينانىڭ ىشىنە كىرىپ تىعىلىپ جاتتىم. شامامەن جارتى ساعات وتكەندە جولاۋشى ەسىگىنەن شىعا سالىپ قاشتىم. سول كەزدە كوشەدە ءبىر ايەل جاتقانىن كوردىم، 2-3 جەرىنەن وق تيگەن، ءولىپ قالعان سياقتى كورىندى. ماشينامدى وقيعا ورنىنان تۇنگى ساعات ون جارىمداردا بارىپ الدىم. بامپەرىنە جانە الدىڭعى نومەرىنە وق ءتيىپتى».

ىشكى ىستەر مينيسترلىگىنە كەلىپ تۇسكەن جانە الەۋمەتتىك جەلىدەگى ۆيدەوماتەريالدارعا قاراعاندا 5 ماۋسىم كۇنى اقتوبەدەگى وقيعالار بىلاي بولعان.

ساعات 15.45 شاماسىندا ءبىر توپ ادام ءا. مولداعۇلوۆا كوشەسى 12 ءۇي، 106 پاتەردە ورنالاسقان «پاللادا» قارۋ-جاراق دۇكەنىنە شابۋىل جاسادى. دۇكەننىڭ كۇزەتشىسى مەن ساتۋشىسىن ءولتىرىپ، 11 سايلى، 15 تەگىس ۇڭعىلى – بارلىعى 26 اڭشى مىلتىعىن الىپ كەتكەن. سول ماڭداعى ءبىر ءۇيدىڭ ىشىنەن تۇسىرىلگەن ۆيدەودا شامامەن 20-داي جاس ادام بار، ونىڭ 12-ءسى اڭشى مىلتىعىنا ۇقساس قارۋ ۇستاعان. قىلمىسكەرلەر وسى جەردە وقيعا ورنىنا كەلگەن ءۇش پوليتسيا قىزمەتكەرىن جارالاعان.

15.55. ارادا ون مينۋتتاي ۋاقىت وتكەندە سودىرلار، شامامەن 10-15 ادام، ەسەت باتىر 39-دا ورنالاسقان ۇلتتىق ۇلاننىڭ №6655 اسكەري بولىمىنە شابۋىل جاسادى. (ەسەت باتىر كوشەسى مولداعۇلوۆا داڭعىلىمەن «پاللادا» دۇكەنىنىڭ قاسىنان قيىلىسادى. ال اسكەري ءبولىم وسى جەردەن سولتۇستىككە قاراي ون كۆارتالداي جەردە). تەررورشىلار مان اۆتوبۋسىمەن اسكەري بولىمشەنىڭ قاقپاسىن بۇزىپ كىرگەن. اۆتوبۋس وسى جەردە تۇرىپ قالعان دا شابۋىلشىلار ءتۇسىپ قارۋ-جاراق قويمالارىنا جۇگىرگەن. كەزەكشى مايور تاستانبەكوۆ دابىل كوتەرىپ، قارۋ-جاراق قويمالارىن جاۋىپ ۇلگەرگەن. قارۋ الا الماعان شابۋىلشىلار ءبولىمنىڭ اۆتوپاركىنە قاراي بەتتەپ، وسى جەردە الدىلارىنان شىققان مايور مايلىباەۆتى ولتىرەدى جانە تاعى ءبىر ساربازدى جاراقاتتايدى. ودان كەيىن بولعان اتىستا سەرجانت قاليەۆ ولگەن. ءارى قاراي شابۋىلشىلار اسكەري ءبولىمنىڭ شىعىس جاعىنداعى تۋرگەنەۆ كوشەسىنە شىعىپ كەتەدى. وسى جەردەن ولار 16-مارشرۋتتى اۆتوبۋستى توقتاتىپ جولاۋشىلارىن تۇسىرەدى جانە اسكەري بولىمنەن 15 شاقىرىمداي جەردەگى ماحامبەت اۋىلىنا قاراي بەت بۇرادى. اۆتوبۋستىڭ ىشىندەگى بىرنەشە ادامدى كەپىلگە الدى دەگەن دەرەكتەر بار، بىراق ءىىم مۇنى راستاعان جوق.

16.05-تە قىلمىسكەرلەر جانقوجا باتىر 24-تە ورنالاسقان «پانتەرا» قارۋ-جاراق دۇكەنىنە شابۋىل جاساعان. دۇكەنگە كەلىپ تۇرعان ءبىر ادامدى ءولتىرىپ، تاعى بىرەۋىن جارالاعان. وسى جەردە پوليتسيا ناريادى مەن سودىرلار اراسىندا اتىس بولىپ، ءۇش قىلمىسكەر ولتىرىلگەن. اسكەري ءبولىم العاش شابۋىل جاسالدى دەلىنگەن «پاللادا» دۇكەنىنىڭ سولتۇستىگىندە بولسا، «پانتەرا» وڭتۇستىك-شىعىسقا قاراي شامامەن 10-15 كۆارتال جەردە. سوعان قاراعاندا «پاللادا» دۇكەنىنەن شىققان سوڭ سودىرلار ەكىگە بولىنگەن سياقتى.

تەنگرينيۋس العاش «اقتوبەدە ءۇش جەردە: 5-ميكرواۋدان، فيلارمونيا جانە «پاللادا» دۇكەنى ماڭىندا اتىس بولىپ جاتىر» دەگەن حابار تاراتقان بولاتىن. مۇندا فيلارمونيا دەپ ۇلتتىق گۆارديا اسكەري بولىمىنە جاسالعان شابۋىلدى ايتىپ وتىر، ويتكەنى ول ەكەۋى ءبىر-بىرىنە قاراما-قارسى ورنالاسقان. ال «پاللادا» دۇكەنى 5-ميكرواۋداندا، سوعان قاراعاندا ءبىر مەزگىلدە ءۇش ەمەس، ەكى جەردە اتىس بولعان.

رەسمي مالىمەت بويىنشا، سودىرلاردىڭ قولىنان 6 ازامات ولگەن. ولار: 3 اسكەري، "پاللادا" دۇكەنىنىڭ ساتۋشىسى مەن كۇزەتشىسى، «پانتەرا» دۇكەنىنە كەلىپ تۇرعان ءبىر ازامات. قىلمىسكەرلەردەن 4 ادام ءولدى: بىرەۋى اسكەري بولىمدەگى اتىس كەزىندە، ۇشەۋىن «پانتەرا» دۇكەنىنىڭ جانىندا پوليتسيا ءولتىردى.

«پاللادا» دۇكەنىنە بارلىعى 27 ادام شابۋىل جاساعان. «راتەل» سايتى ءولىپ جاتقان ەكى سودىردىڭ ءىرى پلانداعى سۋرەتىن جاريالادى. سۋرەتتەگىلەردىڭ ءبىرى 35-40 جاس شاماسىنداعى سەلدىر ساقالدى ادام.

وقيعانىڭ وربۋىنە قاراعاندا، قىلمىسكەرلەر الدىمەن قارۋ-جاراق دۇكەنىن باسىپ الىپ، سوسىن اڭشى مىلتىقتارىنىڭ كومەگىمەن اسكەري بولىمگە شابۋىل جاساۋدى، ءسويتىپ ونداعى سوعىس قارۋلارىن يەمدەنۋدى جوسپارلاعان. ال "پانتەرا" دۇكەنىنە نەگىزىنەن پاترون الۋ ءۇشىن شابۋىل جاساعان بولۋى مۇمكىن. 

بۇدان باسقا ەسەت باتىر مەن مولداعۇلوۆانىڭ قيىلىسىنداعى ءبىر پاتەردى پوليتسيانىڭ تەكسەرگەنى الدە تىنتىگەنى تۋرالى اقپارات بار. جانە اۆتوبۋسپەن ماحامبەت اۋىلىنا قاراي كەتتى دەگەن قىلمىسكەرلەر قازىر قايدا، پوليتسيا ولاردان ايىرىلىپ قالدى ما، الدە سولاردىڭ سوڭىندا ما - بۇل جاعى دا بەلگىسىز.

ەرجان ءابدىرامان

Facebook-تەگى پاراقشاسىنان