الماتى وبلىسى، قاراساي اۋدانىنا قاراستى جاڭاتۇرمىس اۋىلىنداعى مەكتەپتىڭ ۇستازى ايمان ساعيدۋللاەۆانى وقىرمان قاۋىم جاقسى تانيدى. قاراساي اۋدانىنىڭ اتقامىنەرلەرى سول ايمان ساعيدۋللاەۆانى ءبىرجولا قىزمەتتەن قۋعا كىرىسكەن سەكىلدى.

بۇگىن ءبىزدىڭ رەداكتسيامىزعا ايمان حانىم حابارلاسىپ، ءبىر-اق كۇندە ەسكەرتۋ مەن سوگىس العانىن، ەندى ءبىر قاتاڭ سوگىس السا قىزمەتتەن بوسايتىنىن ايتىپ شاعىمداندى.

ايمان ساعيدۋللاەۆا، ۇستاز:

– 19 مامىر كۇنى مەنى قاراسايلىق اقساقالدار جينالىسقا سالىپ، ء«تارتىبىمدى» قاراعان ەدى. ونى سىزدەردىڭ پورتالدارىڭىز جازعان بولاتىن. سول كەزدە ءوزىم تانىمايتىن ادامداردىڭ نەگىزسىز جالاسىنان جۇرەگىم اۋىرىپ، جەدەل جاردەم شاقىرۋعا تۋرا كەلدى. وسىمەن ءىس بىتكەن شىعار دەپ ويلاعانمىن. 2 ماۋسىم كۇنى ماعان ديرەكتور تۇسكە دەيىن ەسكەرتۋ، تۇستەن كەيىن سوگىس جاريالادى. ەسكەرتۋ وسىدان 12 كۇن بۇرىن بولعان اقساقالدار وتكىزگەن جينالىستا بەرىلىپتى. ونى مەن كەشە عانا الدىم. ەندى، ءبىر سىلتاۋ تاۋىپ، سوگىس جاريالاپ، مەنى قىزمەتتەن قۋا سالۋعا بولادى دەگەن ءسوز.

19 مامىر كۇنگى اقساقالدار وتكىزگەن جينالىستىڭ حاتتاماسىن سۇراپ، الا الماي وتىرمىن. ۇزىنقۇلاقتان ەستۋىم بويىنشا، ەندى مەنى جاڭاتۇرمىستىڭ اقساقالدارىنىڭ جينالىسىنا سالماقشى كورىنەدى. شىندىقتى ايتىپ شىرىلداپ، مۇعالىمدەردىڭ قۇقىعىن قورعاعانىم ءۇشىن وسىنشاما سەرگەلدەڭگە سالۋعا بولا ما؟

ايمان ساعيدۋللاەۆانى جينالىسقا سالعان اقساقالداردىڭ بىرنەشەۋىمەن حابارلاسىپ، ماردىمدى جاۋاپ الا المادىق. ديرەكتور دا تەلەفونىن كوتەرمەدى. 

وسى شىناشاقتاي عانا ايمان قىز ۇستازداردىڭ سەنبىلىكتەرگە بارۋىنا، ديرەكتورلاردىڭ پارمەنىمەن ءتۇرلى كونتسەرتتەرگە بيلەت ساتىپ الۋعا، سونىمەن قاتار مۇعالىمدەردى ءماجبۇرلى تۇردە قوعامدىق جۇمىستارعا سالۋعا قارسىلىعىن ءبىلدىرىپ، وقىتۋشىلار قۇقىعىن قورعاپ ءجۇر. مۇعالىمنىڭ جانايقايى مينيسترلىكتىڭ قۇلاعىنا ءىلىنىپ، تالاي كۇرمەۋلى ماسەلەنى شەشكەنىن دە جاقسى بىلەمىز. سول سەبەپتى دە، كۇرەسكەر ۇستازدىڭ جاعدايى ءاردايىم ءبىزدىڭ نازارىمىزدا بولاتىنىن ەسكەرتكىمىز كەلەدى.

ءشارىپحان قايسار

Abai.kz