نەسيە كوميتەتىنىڭ ءبىرىنشى وتىرىسىندا 20 ءوتىنىش قارالىپ، ولارعا جالپى سوماسى 75,8 ملن تەڭگە ءبولىندى.

«اتامەكەن» ۇكپ مەن  الماتى وبلىسىنىڭ اكىمدىگى شاعىن بيزنەس سۋبەكتىلەرىنە ارناپ 600 ملن تەڭگە بولگەن بولاتىن. ەندى كاسىپكەرلەر پالاتاسىندا جاڭا شاعىن نەسيە بەرۋ باعدارلاماسىنا قاتىسۋشى كاسىپكەرلەردىڭ وتىنىشتەرىن قاراۋ باستالدى. وسى وڭىردەگى نەسيە بەرۋ وپەراتورى   – «اۋىل شارۋاشىلىعىن قارجىلاي قولداۋ قورى» (اشققق)  اق.

پالاتانىڭ ماماندارى قۇجاتتاردى جيناستىرىپ، راسىمدەۋگە جانە سۇيەمەلدەۋگە كومەكتەسسە، اشققق مالىمەتتەردى تالدايدى، ال وكپ جانىنداعى نەسيە كوميتەتى وتىنىشتەردى قاراپ، ماقۇلدايدى.

 سونداي-اق، جوبانىڭ اشىقتىعىن قامتاماسىز ەتۋ جانە ونى ودان ارى قاراي تابىستى جۇزەگە اسىرۋ ءۇشىن كاسىپكەرلەردىڭ وتىنىشتەرىن قابىلدايتىن نەسيە كوميتەتى وبلىستىڭ بيزنەس-قاۋىمداستىقتارىنىڭ وكىلدەرىنەن جاساقتالعان.

سونىمەن، كوميتەتتىڭ ءبىرىنشى وتىرىسىندا 20 ءوتىنىش قارالىپ، بارلىعى ماقۇلداندى. قارىز الۋشىلار قانت قىزىلشاسىن وسىرۋمەن اينالىساتىن شارۋا قوجالىقتارىنىڭ وكىلدەرى ەكەنىن اتاپ ءوتۋىمىز كەرەك.  كوميتەت مۇشەسى ءارى الماتى وبلىسى كاسىپكەرلەر پالاتاسىنىڭ ديرەكتورى ءلاززات شىڭعىسباەۆانىڭ ايتۋىنشا، ەڭ از نەسيە سوماسى 1,2 ملن تەڭگە بولسا، ەڭ كوبى 6 ملن تەڭگە بولىپتى.

«20 ءوتىنىش بويىنشا بارلىعى 75 ملن 800 مىڭ تەڭگە بەرىلەدى. ەندى قۇجاتتاردى اۋىل شارۋاشىلىعىن قارجىلاي قولداۋ قورىنا تاپسىرۋدى جوسپارلاپ وتىرمىز.  ولار قاراجاتتى ءبولۋ ءۇشىن قارىز الۋشىلارمەن قارىز الۋ جانە كەپىلگە قويۋ شارتىن جاساسادى. ء بىر اپتادان كەيىن-اق شارۋالار قاراجاتقا قول جەتكىزە الادى دەپ كۇتىلۋدە»، – دەدى ل.شىڭعىسباەۆا.

شاعىن نەسيە بەرۋ باعدارلاماسىنىڭ باستى ەرەكشەلىگى – كەپىل رەتىندە جەر تەلىمدەرى، تۇرعىن-جاي قۇرىلىستارى  مەن باسقا دا جىلجىمايتىن مۇلىكتەر قابىلدانادى.  

رەتتەمە بويىنشا سىياقى مولشەرلەمەسى جىلىنا 6% بولسا، جىلدىق ءتيىمدى سىياقى مولشەرلەمەسى 6,7%-دان كوپ ەمەس.  نەسيە 4 جىل 6 اي مەرزىمگە دەيىن بەرىلەدى.  قارىزدى اي سايىن، توقسان سايىن، جارتى جىلدا ءبىر رەت جانە جىلىنا ءبىر رەت وتەۋگە بولادى.

Abai.kz