ۋاقىتتىڭ قۇندىلىعى ونىڭ ۇنەمى جاڭارىپ وتىرۋىندا بولسا كەرەك. ۋاقىتتىڭ جاڭارۋى ءوز تالاپتارىن قويىپ، ونىمەن ساناسۋعا اكەلەدى. ءسويتىپ، قوعام دا، جۇيە دە ورنىنان قانشا اۋىر قوزعالسا دا ۋاقىتقا مويىنۇسىنادى. بۇل - وزگەرمەيتىن، وزگەرتۋگە كەلمەيتىن زاڭدىلىق. وسى زاڭدىلىقتىڭ ولشەمىمەن الساق، قوعاممەن بىرگە قازاقستانداعى مەملەكەتتىك قىزمەت قۇرىلىمى دا تۇلەپ كەلەدى. ياعني، جاسارىپ كەلەدى. ءارتۇرلى دەڭگەيدەگى باسشىلىق قىزمەتتەرگە جاس ازاماتتار كەلىپ، ولار ءوز كەزەگىندە، اركىم ءوزىنىڭ قىزمەت قۇزىرەتى اياسىندا جاڭا تاسىلدەرمەن وسى كۇنگى ماسەلەلەردى شاما-شارقىنشا شەشىپ جاتىر.

جاس ازاماتتار قازىرگى كۇنى ايماقتارداعى باسشىلىق قىزمەتتەر دە ءپىسىپ-جەتىلىپ، شىڭدالىپ كەلەدى. ءبىز، ۇلكەن قالالاردا، ورتالىقتا استانانىڭ اۋزىن باعىپ وتىرىپ، ايماقتارداعى بولىپ جاتقان وزگەرىستەردى، ىستەلىپ جاتقان جۇمىستاردى بىلە بەرمەيمىز. ماسەلەن، شىعىس قازاقستان وبلىسى شەكارالىق ايماققا جاتاتىن ءوڭىر. ەلدىڭ شەتىندە، جەلدىڭ وتىندە تۇرعان جەر. ايماقتىڭ ۇلتتىق، مادەنيە الا-قۇلالىعى تاعى بار. بۇرىنعى ەكى وبلىس بىرىككەن سوڭعى ۇلكەن تەرريتوريا، ونىڭ اۋىل شارۋاشىلىعى، حالقى، الەۋمەتتىك-ەكونوميكالىق احۋالىنىڭ ءوزى ايتۋعا عانا وڭاي نارسە. مىنە، وسىنداي وڭىردە شىعىس قازاقستان وبلىسى اكىمىنىڭ ورىنباسارى قىزمەتىن اتقارىپ وتىرعان جاقسىلىق ومار دا ۋاقىتتىڭ جاڭارۋمەن شىققان جاس توپ-مەنەدجەرلەردىڭ ءبىرى.

جاقسىلىق مۇقاشۇلى توپ-مەنەدجەر بولىپ توپ ەتە تۇسكەن جوق. جاستايىنان مەملەكەتتىك قىزمەتكە ارالاسىپ، وسى سالانىڭ ءار باسپالدىعىنان ءوتىپ، ءوسىپ جەتتى. جاقسىلىق مىرزانىڭ جانە ونىڭ زامانداستارىنىڭ ءبىر ەرەكشەلىگى ولار – تاۋەلسىزدىكتىڭ بۋىنى. بۇل دەگەنىڭىز، ساناسى تازا ءارى ەركىن ازامات دەگەن ءسوز. تاپ وسىنداي ازاماتتاردىڭ بيلىكتىڭ ءتۇرلى دەڭگەيىنە كەلىپ، وزدەرىن سوزبەن ەمەس، بارىنشا ىسكەرلىگىمەن، تىندىرىمدىلىعىمەن كورسەتە ءبىلۋى ول – مەملەكەتتىك قىزمەتتىڭ ەرتەڭگى كۇنىنەن جاقسى حابار بەرەدى. ال، لاۋازىمدى مەملەكەتتىك قىزمەت دەگەنىڭىز، قوعام-ساياسي جۇيەنىڭ جۇلىنى.

قازاقستان مەملەكەتتىك تاۋەلسىزدىگىن جاريالاعاندا جاقسىلىق وماروۆ 11 جاستاعى بالا ەكەن. تاۋەلسىزدىكتىڭ 25 جىلدىعىندا سول بالا ءوز قىزمەتى شەگىندە ۇلتىنىڭ، حالقىنىڭ يگىلىگى ءۇشىن قىزمەت ەتىپ وتىر.

يگىلىك دەمەكشى، جوعارىدا ايتقانىمىزداي، جاقسىلىق ومار قىزمەت ەتىپ وتىرعان شىعىس قازاقستان وبلىسىنىڭ ماڭىزدىلىعى ەرەكشە ءوڭىر. ونى رەسەي، موڭعوليا، قىتاي سىندى كورشى ەلدەرمەن شەكارالاس جاتقانىمەن-اق تۇسىندىرۋگە بولاتىن شىعار. وسىنداي وڭىردە «التاي – تۇركى الەمىنىڭ التىن بەسىگى» سىندى حالىقارالىق شارا وتكىزۋ كوپ نۇكتەسى بار ماسەلەلەردى ءسوزسىز ءتۇسىندىرۋدىڭ نۇسقاسى. ەكىنشى جاعى، بار الاشقا مەكەن بولعان التايدىڭ قويناۋىنداعى ارحەولوگيالىق، مادەني مۇرانى كوپكە جاريا ەتۋ، اشىلماي جاتقان تىڭ زەرتتەۋلەرگە لەپ بەرۋ. مۇنداي ىستەر جاقسىلىقتاي ازاماتتاردىڭ قولىنان وتكەرىلگەنى تاۋەلسىزدىك جىلدارى وسكەن كادرلاردىڭ ارتىقشىلىعىنىڭ ءبىر كورىنىسى بولسا كەرەك.

تاۋەلسىزدىك كەزەڭىندە وسكەن ۇرپاقتىڭ دا ءوز قيىنشىلىعى، تاعدىرى بولدى. ازاتتىقتىڭ العاشقى ون جىلدىعىندا ەل باسىنا تۇسكەن قيىنشىلىقتى اۋىلداعى وماروۆتار وتباسى دا تارتتى. اتا-انانىڭ قينالعانىن، تويىپ تاماق ىشپەگەن، ءبۇتىن كيىم كيمەگەن شاقتار، كورشى-قولاڭ، اعايىن-تۋىس ءبىر-ءبىرىنىڭ جوعىن ءبىرى تولتىرىپ، اۋپىرىمدەر كۇن كەشكەن كۇندەردى كىم ۇمىتسىن. ەسەسىنە، بۇل قيىندىق جاقسىلىق مۇقاشۇلى مەن ونىڭ زامانداس، قۇرداستارىن ەرتە ەسەيتىپ، شىڭداپ جىبەردى. ومىرگە، ەڭبەككە ەرتە ارالاستى. سول ەڭبەكتىڭ ءبىر بەلەسى بۇگىندە ءۇشىنشى جىل قىزمەت ەتىپ جاتقان شىعىس قازاقستان وبلىسى اكىمى ورىنباسارى لاۋازىمى.

ءۇش جىلدا تالاي جۇمىس ىستەلدى. تىزبەلەپ ايتا بەرسەڭ، الەۋمەتتىك، ەكونوميكالىق، مادەني، دەنساۋلىق ساقتاۋ، اقپاراتتىق سالاداعى ءاربىر اتقارىلعان ءىس جاقسىلىق وماردىڭ جەتەكشىلىگىمەن جۇزەگە استى. ول ىستەردىڭ جاقسىلىعىن ايماق جۇرتشىلىعى كورىپ جاتىر.

ءار سالادا تاۋەلسىزدىكتىڭ جەمىسىندەي ەڭبەك ەتىپ جاتقان جاقسىلىق ومارداي ازاماتتار ارقىلى ەلدىڭ ۋاقىت وزگەرىپ، قوعامنىڭ باسقا فازاعا وتەتىن شاقتارىنداعى بولاشاعىنىڭ بەينەسىن كورۋگە بولادى. ارينە، ءبارى وتپەلى، وزگەرمەلى. بىراق، قاي كەزدە دە مەملەكەتتىك ءىستىڭ ۇزدىكسىز ءارى ساپالى جۇمىسى ءۇشىن ازاتتىقتى وكشەلەپ وسكەن تاجىربيەلى ىسكەر ازاماتتار كەرەك ەكەنىن ەرتەڭىن ويلايتىن ءار ادام تۇسىنسە كەرەك. دەمەك، جاقسىلىق ومار سىندى ايماقتاردا شىڭدالىپ جاتقان توپ-مەنەدجەرلەر بولاشاقتىڭ تاڭى اتىپ كەلە جاتقانىنىڭ ايعاعى.

نۇرا ماتاي

Abai.kz