1 ماۋسىم كۇنى استانا قالاسىندا «شابىت» ونەر اكادەمياسىندا «اۋىل» حدپپ-نىڭ ۇيىمداستىرۋىمەن «ازاتتىعىم - عاجاپ كۇنىم» اتتى جىر انتولوگياسىنىڭ تۇساۋكەسەرى جانە جىر ءمۇشايراسى ءوتتى دەپ حابارلايدى «اۋىل» حدپپ ءباسپاسوز قىزمەتى.

شارانى «اۋىل» پارتياسى قازاقستان تاۋەلسىزدىگىنىڭ 25 جىلدىق مەرەيتويىنا وراي ارنايى ۇيىمداستىرىپ وتىر. القالى جيىنعا 300-دەن استام دەلەگات قاتىستى. ولاردىڭ اراسىندا الىس جاقىن شەتەلدەن كەلگەن 100-گە جۋىق قانداسىمىز دا بار.

تۇساۋى كەسىلگەن «ازاتتىعىم - عاجاپ كۇنىم» جيناعىنا الەمنىڭ ءار تۇكپىرىندە جۇرگەن قازاق اقىن-جازۋشىلارىنىڭ قازاقستان تاۋەلسىزدىگىنە، تۋعان ەلگە، پاتريوتيزمگە باعىتتالعان  ولەڭ جىرلارى ەنگەن. انتولوگياعا مونعوليادا تۇرىپ جاتقان 15 قازاق اقىنىنىڭ, قىتايداعى  قازاق دياسپوراسىنىڭ 40 وكىلىنىڭ, رەسەيلىك 5 قازاق اقىنىنىڭ ءان-جىرلارى مەن قازاقستاندىق 45 اقىن-جازۋشىنىڭ ەڭبەكتەرى جيناقتالىپ وتىر.

جيىنعا قاتىسۋشىلاردى قۇتتىقتاعان «اۋىل» حدپپ-نىڭ توراعاسى ءالي بەكتاەۆ «تاۋەلسىزدىك – ەش نارسەمەن سالىستىرۋعا كەلمەيتىن ۇلى نىعمەت. تەك تاۋەلسىز ەل عانا ويىنداعى اسقاق ارماندارىن جۇزەگە اسىرىپ، جارقىن ءومىر سۇرە الادى» دەپ،  اتاپ ءوتتى. ونىڭ ايتۋىنشا، «قازاق ەلى تاۋەلسىزدىك العان ساتتە، اسىرەسە شەتەلدە جۇرگەن قاراكوز قانداستارىمىز بوركىن اسپانعا اتىپ قۋاندى. تاۋەلسىزدىك جات جۇرتتا جۇرگەن زامانداستارىمىزدىڭ كەلەشەك تاعدىرىن ايقىنداپ بەردى. شەتتە جۇرگەن قانداس باۋىرلار سول كەزەڭنەن باستاپ لەك-لەگىمەن اتامەكەنىنە ورالا باستادى». «قازاقستان تاۋەلسىزدىگىنىڭ قادىر-قاسيەتىن شەتتە جۇرگەن قانداستارىمىز ەرەكشە ءتۇسىنىپ، جوعارى باعالايدى»، دەدى ول.  

سوندىقتان دا، شەتەلدىك قانداستاردىڭ قالامىنان توگىلگەن ەلى مەن جەرىنە، اتامەكەنىنە دەگەن ساعىنىشى مەن ۇلتىنا دەگەن ىستىق سەزىمى قاتار ورىلگەن جىر مونشاقتارى ءاربىر جاننىڭ جۇرەگىن ءدىر ەتكىزىپ، ساناسىن سىلكىنتەتىن كۇشكە يە.

«ازاتتىعىم - عاجاپ كۇنىم» جىر انتولوگياسىنىڭ تانىستىرىلىمىنان سوڭ، اقىن-جىرشىلار تاۋەلسىزدىككە ارناعان ولەڭ جىرلارىن وقىپ، جينالعانداردىڭ قوشەمەتىنە بولەندى. جىر ءمۇشايرادا ەرەكشە سۋىرىلىپ كوزگە تۇسكەن قالام يەلەرىنە ارنايى ديپلومدار مەن سىيلىقتار تابىستالدى.

 اباي-اقپارات