«23 مامىر كۇنى "قازاقستان" كونتسەرت زالىندا قر مادەنيەت جانە سپورت ءمينيسترى ارىستانبەك مۇحامەديۇلى حالىقپەن كەزدەسىپ، 2015 جىلى اتقارىلعان جۇمىستارعا ەسەپ بەردى. سۇراق-جاۋاپ بارىسىندا مينيستر ءوزىنىڭ سۇيىكتى جازۋشىسى شىڭعىس ايتماتوۆتىڭ شىعارماشىلىعىنا قاتىستى ساۋالعا جاۋاپ بەرگەن بولاتىن. ءمينيستردىڭ وسىناۋ سوزدەرىن باق وكىلدەرى تولىق بەرمەي، ءۇزىپ الىپ تسيتاتا رەتىندە جاريالادى. سالدارىنان، ا.مۇحامەديۇلىنىڭ سوزدەرىنىڭ ماعىناسى وزگەرىپ شىعا كەلدى. ونى كەيىن باق وكىلدەرى تاعى تالقىلاپ جاتتى. شىندىعىندا، ۇلى جازۋشى شىڭعىس ايتماتوۆتىڭ الدىندا باس يە وتىرىپ، مينيستر ونىڭ شىعارمالارىنىڭ تەرەڭ ماعىنالى ەكەنىن، جۇرەگىندە ءوز ۇلتى جايلى مىڭداعان ورامنىڭ بار ەكەنىن جەتكىزگىسى كەلگەن ەدى.

مينيستر قازاقستاندىقتارعا جازۋشىنىڭ دانا سوزدەرىن ايتتى: ء"بىز - ادامدار، ءبارىمىز ءبىر قايىقتامىز، الدىمىزدا ۇلكەن مۇحيت" دەپ... ءبىز وسى قايىقتى الەمدە بولىپ جاتقان جاعدايلار شايقاماسا دەيمىز. قالاي بولعاندا دا، ءبىز ءوزىمىزدىڭ رۋحاني مۇرالارىمىزدان، مادەنيەتىمىزدەن باس تارتپاۋىمىز كەرەك، ۇلتتىق قۇندىلىقتارىمىزدى جوعالتپاۋىمىز ءتيىس.

سونداي-اق، شىڭعىس ايتماتوۆتىڭ ومىرلىك فيلوسوفياسىن مىسالعا كەلتىرە وتىرىپ، مينيستر باۋىرلاس حالىقتاردىڭ تاريحى، ءدىنى، ءداستۇرى جانە مادەنيەتى ورتاق ەكەنىن، ەندى ودان ءارى دامۋ ءۇشىن ءبىر-بىرىمىزدەن ۇيرەنەرىمىز كوپ ەكەنىن ايتتى.

ءبىز تەرەڭ تاريحى مەن كەرەمەت مادەنيەتى بار، تولومىش وكەەۆ پەن سۇيمەنقۇل چوكموروۆ سەكىلدى تالانتتاردى دۇنيەگە اكەلگەن قىرعىز حالقىن ۇلى بولاشاق پەن ەكونوميكالىق تۇراقتىلىق كۇتىپ تۇرعانىنا سەنىمدىمىز. ءبىز - قازاقستاندىقتار مەن قىرعىزستاندىقتار ءوز دانالارىمىزدىڭ سوزدەرىن ەستە ساقتاپ، ەۆوليۋتسيالىق دامۋ جولىمەن بىرگە ءجۇرۋىمىز قاجەت. ءبىز مينيستر ارىستانبەك مۇحامەديۇلىنىڭ قىرعىز حالقىنا ۇلكەن قۇرمەتپەن قارايتىنىن تاعى دا ايتقىمىز كەلەدى جانە ونىڭ كەشەگى سوزدەرىندە بىرەۋدى رەنجىتەيىن دەگەن وي بولعان جوق. ول ءوز ءسوزى مەن ويىنىڭ تەرىس ماعىنادا قابىلدانعانى ءۇشىن كەشىرىم سۇرايدى»، - دەلىنگەن ۆيتسە-ءمينيستردىڭ حاتىندا.

ايتا كەتەيىك، كەشە اتقارىلعان جۇمىستارىنا ەسەپ بەرگەن ارىستانبەك مۇحامەديۇلى ماسكەۋ دارەتحانالارىن جۋىپ جۇرگەن قىرعىزدىڭ بويجەتكەندەرى تۋرالى ايتقان بولاتىن. «جاسىراتىنى جوق، ماسكەۋگە نەمەسە وزگە قالالارعا ۇشىپ كەلسەڭ قوعامدىق دارەتحانالاردى جاپ-جاس قىرعىزدىڭ قىزدارى جۋىپ جۇرەدى. بۇل ارينە، كوڭىلگە اۋىر تيەتىنى ءسوزسىز. ناعىز جاستىق شاعىندا نەلىكتەن ولار دارەتحانا جۋىپ ءجۇر دەپ ويلايسىڭ؟ ەلىندە جۇمىس نەمەسە بولاشاق بولماسا ارينە، قىرعىزدار وزگە قالالارعا بارىپ كۇنەلتۋگە ءماجبۇر. وسىنى ەرتەرەكتە ءبىلىپ ەسكەرتكەن شىڭعىس ايتماتوۆ — ۇلى جازۋشى»، - دەگەن بولاتىن ارىستانبەك مۇحامەديۇلى سول ەسەپتىك جيىندا.

مۇنان كەيىن قازاقستاننىڭ تانىمال ازاماتتارى، قوعام بەلسەندىلەرى مادەنيەت ءمينيسترى ءۇشىن باۋىرلاس قىرعىز حالقىنان كەشىرىم سۇراعان.

اباي-اقپارات