جاقىندا قازاقستاننىڭ جاڭادان تاعايىندالعان ەنەرگەتيكا ءمينيسترى (ەسىم-سويى ەل-قاۋىمعا اكىمدىكتەگى قىزىمەتى ارقىلى ەتەنە تانىس) قانات بوزىمباەۆ جۋرناليستەرگە قازاق تىلىندە سۇحبات بەرۋدەن باس تارتىپتى.

Baq.kz جاريالاعان اقپاراتقا سۇيەنسەك، استانادا وتكەن بالامالى ەنەرگەتيكا بويىنشا I سامميتتە ەكس-اكىم، ەندىگى مينيستر قانات الدابەرگەنۇلى «ەنەرگەتيكا سالاسىندا تەرميندەردىڭ كوپتىگىنەن، قازاق تىلىندە ايتۋىم قيىن» دەپ، قيىلىپ تۇرىپ، رەسمي تىلگە جۇگىنىپتى. ءوزىنىڭ ءسوزى ەكەن: «بۇل سالادا تەرمينولوگيا كوپ. سوندىقتان مەن ورىسشا سويلەيىنشى؟..» ونداعى قازاق ءتىلدى جۋرناليستەر مينيستر مىرزا جالىنعان سوڭ، قارسىلىق تانىتپاعان. سودان ءارى قاراي قانات الدابەرگەنۇلى سۇحباتىن رەسمي تىلدە جۇرگىزگەن.

وسى ماسەلەنىڭ انىق-قانىعىن بىلەيىك دەپ، ءبىز قر ەنەرگەتيكا مينيسترلىگىنە حابارلاستىق. مينيسترمەن بايلانىس ورناتا الماعانىمىزبەن، قانات الدابەرگەنۇلىنىڭ قابىلاۋ بولمەسىندەگى حاتشى قىزبەن تىلدەستىك.

-ءبىز  «Abai.kz» پورتالىنان حابارلاسىپ تۇرمىز، قانات الدابەرگەنۇلىمەن تىلدەسسەك دەپ ەدىك.

-ول كىسى قازىر بوس ەمەس، نە ماسەلە بويىنشا سۇراقتارىڭىز بار ەدى؟

-قانات الدابەرگەنۇلى جاقىندا جۋرناليستەرگە قازاق تىلىندە سۇحبات بەرۋدەن باس تارتىپتى. وسىنىڭ سەبەبىن سۇرايىق دەپ ەدىك، مۇمكىن ءبىز بوس داۋرىعىپ وتىرعان شىعارمىز... ءمينيستردىڭ ءوز ايتارى بار شىعار؟..

-بۇل ماسەلەمەن ءبىزدىڭ مينيسترلىكتىڭ ءباسپاسوز قىزمەتى اينالىسادى. سول جاققا حابارلاسساڭىز دۇرىس بولادى.

-بىزگە ءباسپاسوز حاتشىسى ەمەس، ءمينيستردىڭ ءبىر اۋىز ءسوزى كەرەك. ەلباسى اشىق ساياساتتى وتكەن جولى عانا ايتتى ەمەس پە؟ ءمينيستردىڭ قازاق تىلىندە سۇحبات بەرۋدەن باس تارتقانى راس پا؟

-«مىنا نومىرگە» حابارلاسساڭىز، بارلىعىن ءتۇسىندىرىپ بەرەدى (حاتشى قىز بىزگە ءباسپاسوز قىزمەتىنىڭ ءنومىرىن ۇسىندى)

-جاقسى...

-ايتپاقشى، ول جاققا كەلەر اپتادا حابارلاسقانىڭىز ءجون. قازىر ولاردىڭ قولدارى تيمەيدى. سوندىقتان، بۇگىن-ەرتەڭ ولار مۇلدە جاۋاپ بەرە المايدى. كەلەر اپتادا حابارلاسىڭىز...

-كەلەر اپتا؟ قالجىڭداپ وتىرعان جوقسىز با؟

-ولار قازىر سىزگە جاۋاپ بەرمەيدى ءبارى-ءبىر (قاتۋلى ۇنمەن).

-جاقسى تۇسىنىكتى، كەشىرىڭىز، ءسىزدىڭ اتى-ءجونىڭىزدى بىلسەم بولا ما؟،-دەگەنىمىز سول-اق ەكەن، تەلەفون تۇتقاسىن قويا سالدى. قانات الدابەرگەنۇلىنىڭ قابىلداۋ بولمەسىندەگى تەلەفون ارقىلى تىلدەسكەن سوڭ، حاتشىسى بولار دەپ توپشىلادىق.

ايتپاقشى، جاڭاعى حاتشى قىزدىڭ بەرگەن ەكى نومىرىنە دە حابارلاسىپ ەك، ء«لام-ميم» دەگەن جاۋاپ بولمادى.

مينيستر قانات بوزىمباەۆتىڭ قازاق تىلىنەن باس تارتىپ، رەسمي تىلگە جۇگىنگەندىگىنىڭ راس وتىرىگىن اشىپ ايتار ەنەرگەتيكا مينيسترلىگىندە ءتىرى جاننىڭ تابىلماعانى وكىنىشتى، ارينە.

دەسەك تە، بوزىمباەۆ - مەملەكەتتىك تىلدە سويلەپ، مەملەكەتتىك تىلدە قويىلعان جۋرناليستەردىڭ ساۋالىنا جاۋاپ بەرۋدى قيىنسىناتىن اقوردا توڭىرەگىندەگى شەندىلەردىڭ ءبىرىنشىسى ەمەس. ءبىر قىزىعى: وزگە مەملەكەتتىڭ تىلىندە قويىلاتىن ساۋالعا قۇلشىنا جاۋاپ بەرەتىن اق جاعالى ۇلىقتىڭ سوڭى دا بوزىمباەۆ ەمەس. سونىسىنا قاراعاندا، وسى كىسىلەر قاي زاماندا، قانداي ەلدە، قانداي ەلدىڭ  ۇكىمەتىندە لاۋازىمدى قىزمەت اتقارىپ جۇرگەنىن بىلمەيتىن بولسا كەرەك...

ايسۇلۋ تۇرسىنباەۆا

Abai.kz