بۇگىن الماتى قالاسىنداعى «رەسپۋبليكا» جانە «الماتى» الاڭدارىنىڭ توڭىرەگىنەن جارىلعىش زاتتار مەن  جانارماي قۇيىلعان بوتەلكەلەر تابىلىپتى دەگەن اقپارات «Abai.kz» پوشتاسىنا كەلىپ ءتۇستى.

الماتىلىق پوليتسەيلەر جەدەل جۇرگىزگەن شارا بارىسىندا «رەسپۋبليكا» جانە «الماتى» الاڭدارى ماڭىنداعى بىرنەشە قالتارىس جەرلەردەن جاندىرعىش سۇيىق زات قۇيىلعان بوتەلكەلەر، ونشاقتى ارماتۋرا كەسىندىلەرى مەن ىشىندە بەنزينى بار كانيسترلەر تابىلىپتى. سونىمەن قاتار، المالى جانە مەدەۋ اۋداندارىنداعى 2 پاتەردى تىنتىگەن پولتسەيلەر ماكاروۆ جانە «تت» تاپانشالارىن، بىرنەشە وندىق وق-ءدارىسى بار تەگىس ۇڭعىلى شولاق مىلتىقتاردى، رگد-5 ءتورت گراناتى، سونداي-اق جالپى سوماسى 5 ميلليون تەڭگەنى قۇرايتىن اقشالاي قاراجات تاۋىپ، تاركىلەپتى. جەدەل جۇرگىزگەن جۇمىستاردىڭ ناتيجەسىندە 5 ادام كۇدىكتى رەتىندە ۇستالىپ، قاماۋعا الىنعانى تاعى راس ەكەن.

سودان، ماسەلەنىڭ انىق-قانىعىن بىلمەك بولىپ، الماتى قالالىق ءىىد-ءنىڭ ءباسپاسوز حاتشىسى سالتانات ازىربەككە حابارلاستىق.

-ساكە، اياق-استىنان «رەسپۋبليكا» مەن «الماتى» الاڭدارىنان جارىلعىش زاتتار تابىلىپتى دەگەن اقپارات قايدان شىقتى؟

-راس، الماتىنىڭ ەكى ۇلكەن الاڭىنا جاقىن ماڭايدان جارىلعىش زاتتار مەن جانارماي قۇيىلعان بوتەلكەلەر، شولاق كەسىلگەن تەمىر-تەرسەكتەر تابىلدى، تاركىلەندى.

-بۇل نەگە بۇگىن تابىلىپ وتىر؟ بۇل  تۋرالى سىزدەرگە كىمدەر حابارلادى؟

-جالپى اقپاراتتاردى بىزگە قالا تۇرعىندارى حابارلاپ ايتتى. كەيىن تەرگەۋ جۇمىستارى جۇرگىزىلگەندە، اقپارتتىڭ راس ەكەندىگى انىقتالىپ، شىن مانىندە اتالىپ كورسەتىلگەن ورىنداردان جارىلعىش زاتتار تابىلدى.

-ناقتى قاي ۋاقىتتا؟

-ناقتى قاي ۋاقىتتا حابارلانعانى تۋرالى مەندە اقپاراتتار جوق. ونى  تەك تەرگەۋ توبى عانا بىلەدى. سونىمەن قاتار قالامىزداعى ەكى اۋدانداعى پاتەرلەردى ءتىنتۋ بارىسىندا قىلمىسقا قاتىسى بار دەگەن كۇدىكپەن 5 ادام ۇستالدى.

-ۇستالعان ازاماتتار كىمدەر جانە ولار قالاي انىقتالدى؟

-وكىنىشكە وراي بۇل تۋرالى مەندە مالىمەتتەر جوق.

-بۇل ادەيى قولدان جاسالعان اقپارات ەمەس پە؟ ەرتەڭ مىنا حالىقتى الاڭعا شىعارماۋ ءۇشىن، ۇركىتىپ، قورقىتۋ ءۇشىن جاسالىپ وتىرعان جوق پا؟

-بۇل رەسمي تىركەلگەن اقپارات. ادەيى بۇرمالاپ، جالعان اقپارات تاراتاتىنداي ءبىزدىڭ دە باسىمىز ەكەۋ ەمەس قوي. سوندىقتان، تۇرعىنداردان حاباردىڭ كەلىپ تۇسكەنى دە راس، جارىلعىش زاتتاردىڭ تابىلعانى دا راس.

ءتىنتۋ بارىسىندا پاتەرلەردەن ماكاروۆ جانە تت ماركالى 2 تاپانشا، رگد-5 ءتورت گراناتاسى، اڭشى مىلتىعىنىڭ شولاق تۇرلەرى مەن بەس ميلليون تەڭگەگە جۋىق اقشا تابىلىپ، تاركىلەندى.

-تاركىلەنگەن اقشالار قانداي ۆاليۋتالاردا بولدى؟ دوللار ما، الدە تەڭگە مە؟

-جو-جوق، تەڭگەلەي بولدى.  قازىر اتالعان وقيعاعا قاتىستى  قر قىلمىستىق كودەكسىنىڭ 287 بابى بويىنشا قىلمىستىق ءىس قوزعالىپ، سوت الدى تەرگەۋ امالدارى جۇرگىزىلۋدە.

سۇحباتتاسقان نۇرگەلدى ابدىعانيۇلى

Abai.kz