قازاقستان ۇكىمەتى «جەر رەفورماسىن بەلسەندى تۇردە تالقىلاۋعا» شاقىردى
ءبىرىنشى ۆيتسە-پرەمەر باقىتجان ساعىنتاەۆ، اۋىل شارۋاشىلىعى ءمينيسترى اسقار مىرزاحمەتوۆ جانە «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد استانادا ۇكىمەتتىڭ «جەر ماسەلەسىنە قاتىستى ۇسىنىس بىلدىرگىسى كەلەتىندەرگە مەيلىنشە اشىق ەكەنى تۋرالى» مالىمدەمە جاسادى.
ۇكىمەت پەن پرەزيدەنتتىك پارتيانىڭ جەتەكشىلەرى جەر رەفورماسىن ارنايى قۇرىلعان رەسپۋبليكالىق كوميسسسيا اياسىندا تالقىلاۋعا شاقىراتىندارىن مالىمدەدى. بۇل كوميسسيا اۋىل شارۋاشىلىعى جەرلەرىن جەكەشەلەندىرۋ مەن شەتەلدىكتەرگە ۇزاق مەرزىمگە جالعا بەرۋدى كوزدەيتىن جەر كودەكسىندەگى جاڭا وزگەرىستەرگە قارسى نارازىلىقتان سوڭ قۇرىلعان بولاتىن. زاڭعا ەنگەن تۇزەتۋلەر 5 مامىردا ۋاقىتشا توقتاتىلدى.
- ءاربىر سۇراققا تالداۋ جاسالادى، جەر كودەكسىنە قاتىسى بارلارى كوميسسيادا قارالادى، قالعاندارى مۇددەلى مەملەكەتتىك ورگانداردىڭ قاراۋىنا جىبەرىلەدى. ءبىز بۇل ماسەلەنى تالقىلاۋعا ءبىزدىڭ ازاماتتاردىڭ مەيلىنشە كوپ بولىگىنىڭ قاتىسقانىن قالايمىز، سوندىقتان بۇل جۇمىستارعا استانا، الماتى جانە وبلىس اكىمدىكتەرىنىڭ جانىنداعى قوعامدىق كەڭەستەر جۇمىلدىرىلعان، - دەيدى باقىتجان ساعىنتاەۆ
ۇكىمەت باسشىسىنىڭ ءبىرىنشى ورىنباسارى باقىتجان ساعىنتاەۆ جەر رەفورماسى جونىندەگى كوميسسيانىڭ كەزەكتى وتىرىسى استانادا 21 مامىردا وتەتىنىن حابارلادى.
اباي-اقپارات
