قازاق كوركەمسوزىنىڭ شەبەرى، زامانىمىزدىڭ زاڭعار جازۋشىسى دۇكەنباي دوسجاننىڭ قالامىنان 11 رومان، 24 حيكايات، 100-دەن استام اڭگىمە 7,7 ملن تيراجبەن جارىققا شىققان ەكەن.

جازۋشىنىڭ بۇل ەڭبەكتەرى قولدان-قولعا تيمەي وقىلىپ، قالامگەرگە «ەڭ كوپ وقىلاتىن جازۋشى» دەگەن حالىقتىڭ ءوز اتاعىن الىپ بەرگەنى بەلگىلى. بۇگىندە قازاق اتتى ۇلى دالا يەسىنىڭ تامىرى تەرەڭ تاريحىن قالام قۋاتىمەن الەمگە تانىتىپ، تۋعان حالقىنىڭ بولمىس-بىتىمىنە كوركەم كورمە قۇرعان دارا دا سارا قالامگەردىڭ جارقىن بەينەسىنە، ارتىنا قالدىرعان شىعارماشىلىق باي مۇراسىنا دەگەن قۇرمەت ۋاقىت وتكەن سايىن ارتا تۇسۋدە.

جازۋشى رۋحىنا دەگەن ەلىنىڭ وسىناۋ ماحابباتى، وزگەشە ءىلتيپاتى وتكەن سەنبىدە ەلورداداعى ۇلتتىڭ رۋحىن كوتەرەر ۇلاعاتتى ىستەردىڭ ورداسىنا اينالعان ۇلتتىق اكادەميالىق كىتاپحاناداعى تاعى ءبىر تاعىلىمدى باسقوسۋعا باي مازمۇن بەرىپ، ورەسى جوعارى تاعىلىمدى اڭگىمەگە وزەك بولعان ەدى. وندا دۇكەنباي دوسجاننىڭ ءومىرى مەن شىعارماشىلىعىنا ارنالعان ء«داستۇر» باسپاسىنان شىققان «تارلانبوز» كىتابى مەن قالامگەردىڭ جان سەرىگى، جازۋشى-اقىن، قازاقستاننىڭ ەڭبەك سىڭىرگەن قايراتكەرى، وسى يگىلىكتى شارانىڭ ۇيتقىسى ساۋلە دوسجانوۆانىڭ «مەنىڭ جالعىز سەرىگىم» اتتى دۇنيەسىنىڭ تۇساۋكەسەرى جانە ۇلتتىق اكادەميالىق كىتاپحاناداعا جازۋشىنىڭ وقۋ زالى-مۇراجايىنىڭ اشىلۋ سالتاناتى ءوتتى. 

باسقوسۋعا جيىلعان پارلامەنت دەپۋتاتتارى، اقىن، جازۋشىلار، قوعام قايراتكەرلەرى، زامانداس دوستارى كوزىنىڭ تىرىسىندە-اق شىعارماشىلىعى حالقىنىڭ ىستىق ءىلتيپاتىنا، سۇيىسپەنشىلىگىنە بولەنىپ، قر مەملەكەتتىك سىيلىعىنىڭ جانە اۋەزوۆ اتىنداعى ۇلتتىق سىيلىقتىڭ لاۋرەاتى اتانعان دارا تۇلعانىڭ شىعارماشىلىق دەڭگەيى، ازاماتتىق قىرى، ەرەكشە بولمىسى، تىلسىم جاندۇنيەسى حاقىندا ەستەلىكتەرىن، سىر-ساعىنىشتارىن ورتاعا سالدى. ساۋلە دوسجانوۆانىڭ سوزىنە جازىلعان قايرات تەمىرعاليدىڭ «ساعىنىش» اتتى جازۋشى رۋحىنا ارنالعان ءاندى تاعى ءبىر تىڭداپ، سۇيىكتى قالامگەرلەرىن تولعانا ەسكە الدى.

مۇراجايعا جازۋشىنىڭ ءوزى جۇمىس جاساعان كابينەتى تۇگەلدەي وقۋ زالىنا كوشىرىلىپ اكەلىندى. جۇمىس ۇستەلى، ورىنتاعى، كومپيۋتەرى، ۇستاعان زاتتارى مەن كيىمدەرى جانە ماراپاتتارى قويىلعان. ءومىر بويى جيناعان كىتاپتارى مەن كارتينا، سۋۆەنيرلەرى ءبارى ءوزىنىڭ پايدالانعان جيھازدارىمەن وتباسىنان حالىقتىڭ پايدالانۋىنا سىيعا تارتىلعان.

ءيا، ۇندەمەي ءجۇرىپ قالامىنان ۇلكەن ءىس جاساعان، نەبىر اسىل دۇنيەلەردى تۋدىرعان قالامگەر «تەرەڭ وزەننىڭ تىنىپ اعاتىنىنىڭ» بىردەن-ءبىر ۇلگىسى ەدى. سونىسىمەن كۇردەلى، جۇمباق ءارى اسقاق جازۋشىنىڭ ءومىرى مەن شىعارماشىلىعى الدا تالاي سىندارلى زەرتتەۋگە وزەك بولارى حاق. ەڭ باستىسى، دارا تۇلعانىڭ قالامىنان تۋعان مول مۇراسى، ونىڭ ازاماتتىق، جازۋشىلىق وي-ءورىسىن، ۇستانىمىن شىڭداعان دۇنيەلەرى ۇلتتىڭ رۋحاني ورداسى ارقىلى وقىرمان قاۋىممەن تابىستى، ءوزىن سۇيگەن، ارداق تۇتقان زامانداستارىنىڭ قاستەرلەپ تۇتىنار قاسيەتتى بۇيىمىنا اينالدى. ۇلى قالامگەرگە سەرىك بولعان بۇل قۇندىلىقتاردىڭ ءسوز كيەسىن، ۇلت رۋحىن قادىر تۇتقان قاۋىم ءۇشىن باعاسى ەش ۋاقىتتا تومەندەمەيتىنى حاق.

Abai.kz