وتىرار مەملەكەتتىك ارحەولوگيالىق قورىق-مۇراجايىنىڭ بازاسىندا ورنالاسقان «وتىرار قولونەر شەبەرلەرىنىڭ ورتالىعى» ءوز جۇمىسىن باستاپ، اۋدانىمىزداعى وتىزدان استام ءتۇرلى سالاداعى قولونەر شەبەرلەرىنەن قۇرالعان تىڭداۋشىلارىنا ەسىگىن اشتى.

بۇگىنگى تاڭدا وتىرار اۋدانىندا قولونەر سالاسىنىڭ دامۋىنا ءمان بەرىلىپ وتىر. وسى ماقساتتا اشىلعان ورتالىق قولونەر دۇنيەلەرىن توپتاستىرىپ، جيناقتاپ، جۇيەلەپ زامان تالابىنا ساي تۇرلەندىرىپ تۇرعىندار اراسىندا ناسيحاتتاماق.

قولونەر – ءداستۇرلى تۇتىنۋ جانە ساندىك بۇيىمدار جاسايتىن ۇساق ءوندىرىس ءتۇرى. ءاربىر قولونەر تۋىندىسى ءوز زامانىنىڭ مادەنيەت ۇلگىسىن، ۇلتتىڭ قوعامداعى جاعدايىن، ءدىني سەنىمىن، سالت-ءداستۇرىن ايقىن اڭعارتىپ تۇرادى. ەرتەدە قازاق اۋىلىنداعى قولونەر شەبەرلەرى قولدارىنان كەلگەن ونەرلەرىن اكەسى بالاسىنا، ەنەسى كەلىنىنە ۇيرەتىپ، ۇرپاقتان ۇرپاققا قالدىرىپ وتىرعان. وسى ءۇردىستى شەبەرلەرىمىز پ.سادىقوۆ، ن.وسپانوۆتار جالعاستىرىپ، اۋدانىمىزدىڭ وزگە دە شەبەرلەرىمەن ونەردىڭ قىر-سىرىمەن بولىسپەك.

شەبەرلىك دارىسىندە پ.سادىقوۆ «اتا كورگەن وق جونار، شەشە كورگەن تون پىشەر» دەگەن حالىق دانالىعىن باسشىلىققا الىپ، جاس ۇرپاقتى تاربيەلەۋدە، دامىتۋدا، قالىپتاستىرۋدا حالقىمىزدىڭ عاسىرلار بويى قالىپتاسقان تاربيە قۇرالدارىن ء(تىل، ءدىن، ونەر، ۇلگى ونەگە) ورنىمەن پايدالانۋ، بۇگىنگى كۇن ءۇشىن دە ەرەكشە ماڭىزعا يە ەكەندىگىن ايتىپ ءوتتى. سونىڭ ىشىندە ەڭ ءبىرىنشى شيكى زاتتى قالاي تاڭداۋ قاجەتتىلىگى مەن ونى وڭدەۋدەن باستادى. ساباق بارىسىندا قاتىسۋشىلار شەبەرلەرگە ءتۇرلى سۇراقتارىن قويىپ بەلسەندىلىك تانىتىپ وتىردى. شەبەر پ.سادىقوۆ كەلەسى ساباق جوسپارىن تانىستىرىپ، بىرقاتار تاپسىرمالار بەردى.

اۋدان اكىمدىگىنىڭ باستاماسىمەن قولعا الىنعان ورتالىق جۇمىسىنا شەبەرلىك دارىستەرىنە قاتىسۋشىلار ريزاشىلىقتارىن بىلدىرۋدە. ۇلتتىق قولونەر مەن داستۇرلەر ساباقتاستىعىن ناسيحاتتايتىن ورتالىقتا شەبەرلىك دارىستەرى جوسپارعا سايكەس ءار اپتا سايىن جالعاسىن تاۋىپ وتىراتىن بولادى.

Abai.kz