استانا قاالسىنداعى №2 ەسىل اۋداندىق سوتىندا سەيىتقازى جانە اسەت ماتاەۆتاردىڭ ءىسى بويىنشا سوت وتىرىسى ودان ءارى جالعاسۋدا. بۇگىن سوتقا شاقىرىلعان كۋاگەرلەر «سالىق تولەۋدەن جالتاردى» دەگەن ەكىنشى ەپيزود بويىنشا سوتقا تۇسىنىك بەردى. «سەيىتقازى ماتاەۆ ءوزىنىڭ تابىسىن جاسىرۋ نيەتىمەن تەك «كوممەرتسيالىق ەمەس ۇيىمنىڭ تابىسى» دەگەن دەكلاراتسيا تاپسىرىپ كەلگەن. زاڭ بويىنشا قىزمەتتىڭ بۇل تۇرىنە سالىق سالىنبايدى. «ۇلتتىق ءباسپاسوز كلۋبى» قوعامدىق بىرلەستىگى قۇرىلعاننان بەرى ونىڭ س. ماتاەۆ دەگەن جالعىز عانا قىزمەتكەرى، جەتەكشىسى بولعان»،- دەپ حابارلادى سوتتا الماتى قالاسىنىڭ مەملەكەتتىك كىرىستەر دەپارتامەنتى اۋديت باسقارماسىنىڭ باس مامانى نۇرلان سەركەەۆ.

«مەن «ۇلتتىق ءباسپاسوز كلۋبى» قب-نە سالىق تولەۋى بويىنشا تەكسەرۋ جۇرگىزدىم. ول ءۇشىن اۋەلى س. ماتاەۆتان سالىق تولەمدەرى بويىنشا قۇجاتتاردى سۇرادىم. س. ماتاەۆ ماعان «ۇلتتىق ءباسپاسوز كلۋبى» قوعامدىق بىرلەستىگىندە  ەسەپشى قىزمەتى جوق ەكەنىن، سول سەبەپتى بۋحگالتەرلىك ەسەپ-قيساپ جۇرگىزىلمەيتىنىن ايتتى»،-دەدى كۋاگەر سوتتاعى سوزىندە. ونىڭ ايتۋىنشا، سالىق تولەمدەرى بويىنشا تەكسەرۋدەن انىقتالعانداي، سەيىتقازى ماتاەۆ زاڭدى تۇلعا رەتىندە بيۋدجەتكە 168 730 897 مىڭ تەڭگە كورپوراتيۆتىك تابىس سالىعىن تولەۋدەن جالتارعان. سونىمەن قاتار، جەكە تابىس سالىعى بويىنشا 2011- 2015 جىلدارى 65 420 741 تەڭگە، رەزيدەنت بولىپ تابىلمايتىن تۇلعالار ءۇشىن 2011- 2014 جىلدارى 8 578 748 تەڭگە تولەنبەگەن.

«ۇلتتىق ءباسپاسوز كلۋبى» قوعامدىق بىرلەستىگى جۋرناليستيكا سالاسىندا قىزمەت ەتەتىن كوممەرتسيالىق ەمەس ۇيىم رەتىندە قۇرىلعان. وسىعان سايكەس، «ۇلتتىق ءباسپاسوز كلۋبى» قوعامدىق بىرلەستىگىنىڭ جەتەكشىسى سەيىتقازى بەيسەنعازىۇلى ماتاەۆ «قوعامدىق بىرلەستىك كوممەرتسيالىق قىزمەتپەن اينالىسپايدى» دەگەندى راستاپ، كوممەرتسيالىق ەمەس ۇيىم رەتىندە دەكلاراتسيا تاپسىرىپ وتىرعان. بىراق «ۇلتتىق ءباسپاسوز كلۋبى» استانا جانە الماتى قالالارىندا عيماراتتاردى جالعا بەرىپ، اقپاراتتىق ماتەريالداردى ازىرلەۋمەن اينالىسقانىن، ءباسپاسوز ءماسليحاتتارىن وتكىزگەنىن، تەلەديدار ەفيرىنەن جانە باسپا باق-تاردان اقپارات تاراتقانىن، سونىمەن قاتار بايلانىس قىزمەتىن كورسەتكەنىن ەسكەرسەك، بۇلاردان تابىس تاپقانىن كورەمىز. الايدا قوعامدىق بىرلەستىكتىڭ كوممەرتسيالىق ەمەس ۇيىم مارتەبەسىن پايدالانىپ،ءىس جۇزىندەگى تابىستارىن جاسىرعان»،- دەدى كۋاگەر سوتتا.

 تەرگەۋدىڭ نۇسقاسى بويىنشا، سەيىتقازى ماتاەۆ 2011-2015 جىلدارى ءوزىنىڭ تۋىستارى مەن «ۇلتتىق ءباسپاسوز كلۋبىنىڭ» مۇشەسى بولىپ تابىلمايتىن باسقا دا ازاماتتاردىڭ كارتوچكاسىنا 264, 7 ملن. تەڭگە اۋدارعان. الايدا س. ماتاەۆ جاۋاپتى تۇلعا رەتىندە ول اقشادان جەكە تابىس سالىعىن تولەۋى ءتيىس بولعان، ول ءۇشىن دەكلاراتسيا تاپسىرۋ مىندەتتى. سايىپ كەلگەندە، تەرگەۋدىڭ نۇسقاسى بويىنشا سەيىتقازى ماتاەۆ 2011-2015 جىلدارى 300 ملن. تەڭگەدەن استام سالىق تولەۋدەن جالتارعان.

اتاپ ايتارلىعى، بۇل جولعى سوت وتىرىسىندا استانا قالالىق سوتىنىڭ فەلدشەرى سەيىتقازى ماتاەۆتىڭ دەنساۋلىعى جونىندە مىناداي اقپارات بەردى: «بۇگىن ساعات 09.45.-تە س. ماتاەۆتىڭ قان قىسىمى 220-دا 120-نى كورسەتتى. ال قازىر 11.30-دا 180-دە 105-ءتى كورسەتتى. ناۋقاس فيزيوتەنز ءدارىسىن قابىلدادى. سونىڭ اسەرىنەن قان قىسىمى تومەندەدى». فەلدشەر وعان ءدارىنى سوتتىڭ ۇستىندە ەمەس، وتىرىس باستالعانعا دەيىن قابىلداۋدى ۇسىندى. ال س. ماتاەۆتىڭ ءوزى كارديولوگ دارىگەردىڭ كومەگىنە جۇگىنگىسى كەلەتىنىن جەتكىزدى. الايدا سوتقا توراعالىق ەتۋشى سۋديا اقبولات قۇرمانتاەۆ وتكەن اپتادا بىرنەشە رەت س. ماتاەۆقا ءوز دەنساۋلىعىنا نەمقۇرايدىلىقپەن قاراماۋدى ەسكەرتكەن ەدى. ماسەلەن، س. ماتاەۆ وتكەن اپتانىڭ بەيسەنبى، جۇما كۇندەرى اۋرۋحاناعا بارماعان.

ءامىرلان ءالىمجان

Abai.kz