وڭتۇستىك قازاقستاندا بۇگىنگى تاڭدا 21 كاسىپورىن ءوز ونىمدەرىن شەت ەل اسىرىپ، ەكسپورتتايدى. ياعني، ايماقتىڭ كاسىپكەرلەرى وزبەكستان، قىرعىزستان، اۋعانستان جانە تاجىكستان رەسپۋبليكالارىنا وسىمدىك مايى مەن ۇن، بالىق سۇبەسى مەن كونسەرۆىلەنگەن بالىق، قۇس جۇمىرتقاسىن، ماكارون، كونديتەرلىك ونىمدەردى، قوي جانە سيىر ەتىن ەكسپورتتايدى.

سونداي-اق، رەسەي نارىعىنا شىعارىلاتىن نەگىزگى ونىمدەر باقشالىق داقىلدار مەن كوكونىستەر، مال ازىعى، كونسەرۆىلەنگەن بالىق، جەمىستەر، ماقتا، قىزاناق، كۇركەتاۋىق ەتى، سۋسىندار جانە تاعى باسقا. وتاندىق ءونىمنىڭ تابيعيلىعى مەن ساپاسىنا قىزىعاتىن شەتەلدىكتەر تاراپىنان اسىرەسە باۋ-باقشا ونىمدەرىنە دەگەن سۇرانىس جوعارى. ماسەلەن، وسى جىلدىڭ التى ايىندا تەرىسكەيدەگى كورشىلەرگە 45 مىڭ توننا قاۋىن، 17 مىڭ توننا قاربىز ەكسپورتتالعان. ال وڭتۇستىكقازاقستاندىق «حاميت» كومپانياسى بالىقتىڭ سۇبە ەتىن گرۋزيا، گەرمانيا، ۋكراينا رەسپۋبليكالارىنا جانە رەسەي فەدەراتسياسىنا جونەلتەدى.

قازىرگى تاڭدا اۋىلشارۋاشىلىعى ونىمدەرى ەۋرو وداق ەلدەرىنە دە ەكسپورتقا شىعا باستادى. مىسالى، "قارشىعا" شارۋا قوجالىعى الما، قاۋىن جانە قاربىز ونىمدەرىن گەرمانيا اسىرا باستادى. الداعى ۋاقىتتا يران رەسپۋبليكاسىنا جۇگەرى جانە قوي ەتىن ەكسپورتقا شىعارۋ كوزدەلۋدە. ساۋد ارابياسىنا، ءباا جانە يراك رەسپۋبليكاسىنا كوي ەتىن ەكسپورتتاۋعا الدىن الا كەلىسىمدەر جاسالىپ، جۇمىس جۇرگىزىلىپ جاتىر. وسى باعىت بويىنشا بيىلعى جىلدىڭ ماۋسىم ايىندا ءباا-عا قويلار ەكسپورتتالعانى ەسىمىزدە.

Abai.kz