مەملەكەت باسشىسى تاپسىرمالارىنىڭ ورىندالۋ بارىسىنا ارنالعان سەلەكتورلىق ماجىلىستە وبلىس اكىمى اۋداندار مەن قالالاردا كاسىپكەرلىك پەن كووپەراتسيالاردى جاپپاي دامىتۋ ماسەلەسىنە ەرەكشە توقتالدى. وسىعان وراي، «جۇمىسپەن قامتۋدىڭ جول كارتاسى» اياسىندا وڭتۇستىك قازاقستان وبلىسىندا «اۋىل تۇرعىندارىن جۇمىسپەن قامتۋ» جوباسى قولعا الىنىپ وتىر. 

«مەملەكەت باسشىسى ۇكىمەتكە وبلىس اكىمدەرىمەن بىرلەسە ەلدى مەكەندەردە كووپەراتيۆتەر جەلىسىن ۇلعايتۋدى تاپسىرىپ وتىر. بۇل ءوز كەزەگىندە ىشكى نارىقتى جەرگىلىكتى اۋىلشارۋاشىلىق ونىمدەرىمەن قامتىپ، قايتا وڭدەۋ كاسىپورىندارىنىڭ جەلىسىن ۇلعايتپاق. بۇل جۇمىستاردى ماقتارال، قازىعۇرت، ورداباسى، تولەبي، سارىاعاش اۋداندارىندا بەلسەندى اتقارۋدى تاپسىرامىن»، - دەدى ءوڭىر باسشىسى.

سونىمەن قاتار، كورشى وبلىستاردا ءسۇت ونىمدەرىنە دەگەن سۇرانىستىڭ جوعارى ەكەنىن ايتقان وبلىس اكىمى اتالعان وڭىرلەرمەن ارىپتەستىك بايلانىس ورناتۋدى جۇكتەدى.    

ءماجىلىستى قورىتىندىلاعان ب.اتامقۇلوۆ العا قويعان مىندەتتەردىڭ بارلىعى تۇرعىنداردى جۇمىسپەن قامتۋ ەكەندىگىن قاداپ ايتتى.  

ايتا كەتەيىك، اعىمداعى جىلى اتالعان باعدارلامانى جۇزەگە اسىرۋ ءۇشىن وڭىردە رەسپۋبليكالىق بيۋدجەتتەن 9 194,3 ملن. تەڭگە بولىنگەن. 8361 ادام باعدارلامامەن قامتىلسا، ونىڭ ىشىندە 3686 ادام جۇمىسسىز، 3700 ادام ءوزىن-ءوزى جۇمىسپەن قامتاماسىز ەتكەن ەدى.

باعدارلاما اياسىندا وڭىردەگى ەڭبەك نارىعىندا وڭ ناتيجە قالىپتاسىپ وتىر. 2010 جىلداعى 5,7 پايىزدىق كورسەتكىشپەن سالىستىرعاندا 2016 جىلدىڭ 2 توقسانىندا جۇمىسسىزدىق 5 پايىزعا دەيىن تومەندەدى. حالىقتىڭ ءوزىن-ءوزى جۇمىسپەن قامتاماسىز ەتكەن بولىگى 21,8 پايىزعا تومەندەپ، از قامتىلعان ادامداردىڭ سانى 19,7 مىڭدى قۇرادى.

Abai.kz