وڭتۇستىك قازاقستان وبلىسىندا وسى جىلدىڭ سەگىز ايىندا 53051 نارەستە دۇنيە ەسىگىن اشقان. ونىڭ ىشىندە 521-ءى ەگىز بولسا، تورتەۋى ۇشەم.
ايتا كەتەيىك، ەلىمىزدە ءاربىر بەسىنشى بالا وڭتۇستىك قازاقستاندا ومىرگە كەلەدى.
وڭىردە تاۋەلسىزدىك العان جىلداردان كەيىن جاڭا مەديتسينالىق نىسان سالىنىپ، سالانى قارجىمەن قامتۋ ەكى ەسەگە ارتقان. ال ماتەريالدىق-تەحنيكالىق جابدىقتالۋى اناعۇرلىم جاقسارعان. زاماناۋي قۇرال-جابدىقتار مەن قوندىرعىلار تەك وبلىس ورتالىعىندا عانا ەمەس، اۋداندار مەن قالالاردا دا ورناتىلىپ جاتىر. وسىنىڭ ناتيجەسىندە، بۇگىندە وڭىردە انا مەن بالا ءولىمى ازايىپ، تۋ كورسەتكىشى كوبەيىپ كەلەدى.

ەسكە سالايىق، وتكەن جىلدىڭ ءتيىستى كەزەڭىندە وڭتۇستىك قازاقستان وبلىسىندا 52636 ءسابي تۋعان.

حالىق سانىنىڭ كوپ بولۋى ەكونوميكا كولەمىنىڭ ۇلكەن بولۋىنا بەلگىلى ءبىر سەپتىگىن تيگىزەدى. ەكونوميكانىڭ كولەمى G20 قاتارىنا كىرەتىن مەملەكەتتەردىڭ نەگىزگى كريتەريى بولىپ تابىلادى. مىسالى، قىتايدا ادام باسىنا شاققانداعى ىشكى جالپى ءونىم 6 مىڭ دوللار عانا، سالىستىرمالى تۇردە قازاقستانداعى بۇل كورسەتكىش 13 مىڭ دوللار. بىراقتان حالقىنىڭ كوپتىگى ولاردىڭ ەكونوميكاسىنىڭ كولەمىنە اسەر ەتىپ وتىر.

توقتالا كەتەتىن جايت، قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ الدىن الا مالىمەتىنە قاراعاندا، قازاقستاندا 2015 جىلعى 31 جەلتوقساندا 909 ءسابي دۇنيەگە كەلدى. جاڭا تۋعان نارەستەلەر سانى جاعىنان ءبىرىنشى ورىندا وڭتۇستىك قازاقستان وبلىسى تۇر. مۇندا جىلدىڭ ەڭ سوڭعى كۇنى 235 بالا دۇنيە ەسىگىن اشتى. ودان كەيىنگى ورىنداردا تۇرعان الماتى وبلىسىندا - 106, الماتى قالاسىندا - 83, استانا قالاسىندا - 74, جامبىل وبلىسىندا - 72 بالا دۇنيەگە كەلدى.

Abai.kz