پرەمەر-مينيستر باقىتجان ساعىنتاەۆ ۇكىمەتتىڭ قايتا جاساقتالعان ءام جاڭارتىلعان قۇرامىن جيناپ، العاشقى جينالىسىن وتكىزدى. 

العاشقى وتىرىستا-اق،  جاڭا پرەمەر پارمەن بەرىپ، ەلورداداعى كوپ شەنەۋنىكتىڭ شىعىنىن ەسەپتەپ، رۇقساتسىز شەتەلگە شىعۋعا تىيىم سالدى. سويتسەك، وتكەن جىلدىڭ وزىندە ءبىزدىڭ مينيستر مىرزالار مەن حانىمدار اكىمشىلىك شىعىن رەتىندە بيۋدجەتتىڭ 119 ميلليارد تەڭگەدەن استام قارجىسىن جۇمساپ تاستاپتى.

«وزدەرىڭىز كورىپ وتىرعانداي، ءبىزدىڭ اتقاراتىن شارۋامىز وڭاي بولمايىن دەپ تۇر. قازىر جاعداي قيىن. سوندىقتان بارلىق شەتەلدىك ءىس-ساپارلار شەگەرىلەدى. تەك ەلباسىمەن بىرگە باراتىن ساپارلارعا عانا رۇقسات ەتىلەدى. جانە قاتتى مۇقتاجدىق تۋىنداپ جاتسا، مەنىڭ تىكەلەي رۇقساتىممەن عانا شەتەلگە شىعۋعا بولادى»,-دەدى پرەمەر-مينيستر ساعىنتاەۆ مىرزا.

باقىتجان ءابدىرۇلىنىڭ ايتۋىنشا، ءتىپتى ەل ىشىندەگى ءىس-ساپارلاردىڭ وزىنە شىعۋ ءۇشىن پرەمەر-ءمينيستردىڭ تىكەلەي رۇقساتى بولۋى كەرەك ەكەن.

اسىرەسە، مينيسترلەر مەن اكىم-قارالاردىڭ فورمالدى تۇردە عانا جۇمىس ىستەۋ ۇلگىسى قالىپتاسىپ قالعانى بىلاي تۇرسىن، قانعا ءسىڭىپ كەتكەنى بەلگىلى.

جاڭا پرەمەر مۇندايعا جول بەرمەيتىنىن اشىپ ايتتى. ايتقاندا دا، ەلباسى مىندەتتەپ بەرگەن تاپسىرمالاردىڭ ناقتى ىسكە اسىرىلۋىن تىكەلەي ءوزى باقىلاپ وتىراتىنىن، اسىرەسە ىسكە يكەمسىز مينيسترلەر مەن اككى اكىمدەردى قاتاڭ ءتارتىپ كۇتىپ تۇرعانىن ەسكەرتتى.

ء«بىزدىڭ قابىلداعان شەشىمدەرىمىزدىڭ بارلىعى قاراپايىم حالىققا تۇسىنىكتى ءام جەڭىل بولۋى كەرەك. سەبەبى، قازىر قاراپايىم حالىق، قازاقستاندىقتار ءبىزدىڭ نە ىستەپ، نە قويىپ جاتقانىمىزدى بىلمەك تۇگىلى تۇسىنبەيدى دە. سوندىقتان دا ءبىز «فورمالدى» ەسەپ ءۇشىن ەمەس، حالىق ءۇشىن جۇمىس ىستەۋىمىز كەرەك»,-دەدى باقىتجان ءابدىرۇلى.

بيۋدجەت قارجىسى سارقىلىپ، ەل ەكونوميكاسى قيىندىقتى باستان كەشىپ تۇرعان تۇستا الەۋمەتتىك تولەمدەر، ازىق-تۇلىك باعاسىنىڭ قىمباتتاۋى سەكىلدى تۇيتكىلدى ماسەلەلەردى شەشۋگە كىرىسكەن باقىتجان ساعىنتاەۆ باعانى ورىنسىز كوتەرمەۋگە جانە تاريفتەر باعاسىن باقىلاۋدا ۇستاۋدى ۇلتتىق ەكونوميكا مينيسترىنە تاپسىردى.

«قر ۇلتتىق ەكونوميكا مينيسترىنە مىناداي تاپسىرما بەرەمىن. وڭىرلەردەگى اكىمدىكتەرمەن بىرلەسە وتىرىپ باعا تۇراقتىلىعىن ساقتاپ قالۋ ءۇشىن بارلىق شارانى قابىلداڭىزدار. تاريفتەر باعاسى وسپەۋىن ءجىتى قاداعالاڭىزدار»,-دەدى ۇكىمەت باسشىسى.

ەڭ باستىسى باقىتجان ءابدىرۇلى كوپ شەنەۋنىكتىڭ كەرەگى جوقتىعىن كەسىپ ايتتى.

«مەملەكەت باسشىسى ۇكىمەتتىڭ كەڭەيتىلگەن وتىرىسىندا ايتقانداي، قازىرگى تاڭدا ۇكىمەتتىك اگەنتتىكتەر مەن مينيسترلىكتەردىڭ قاراماعىندا قىزمەت ەتەتىن 371 ۆەدموستۆو بار ەكەن. مۇنشا كوپ باسقارمانىڭ بىزگە نە كەرەگى بار؟ قاراپ وتىرساق، سولاردىڭ اكىمشىلىك شىعىنىنىڭ وزىنە 120 ميلليارد تەڭگەگە جۋىق قاراجات جۇمسالادى ەكەن. بۇل از  اقشا ەمەس. ال، مەن ايتقان سوما تەك ورتالىق ورگاندارداعى مەمقىزمەتكەرلەرگە جۇمسالاتىن شىعىن. بۇل سۇمدىق قوي»,-دەدى پرەمەر-مينيستر باقىتجان ءابدىرۇلى.

نۇرگەلدى ابدىعانيۇلى

Abai.kz