«ماكسيمۋم» ايو جانە «ىرىس» مقۇ وسى جىلدىڭ قىركۇيەك ايىنان 2017 جىلعى كوكتەمگى ەگىن ەگۋ جۇمىستارىنا نەسيە الۋشىلاردىڭ قۇجاتتارىن قابىلداۋدى باستادى. ماقسات - ديقانداردىڭ قارجىنى دەر كەزىندە الىپ، ورىندى ءارى ءتيىمدى پايدالانۋلارىن قامتاماسىز ەتۋ.

قۇجاتتار ەشقانداي كوميسسيالىق شىعىندارسىز مۇمكىندىگىنشە ەڭ قىسقا مەرزىمدە قارالادى. ماقۇلدانسا، كەلەر جىلى اقشا بولىنىسىمەن قۇجاتى دايىن ازاماتتارعا بىردەن تاراتىلۋ جوسپارلانۋدا.

قارجىلاندىرۋدىڭ باستىشارتتارى:

• نەگىزگى قارىزدى جانە نەسيە بويىنشا پايىزداردى وتەۋ -مەرزىم سوڭىندا;
• نەسيەنى مەرزىمىنەن بۇرىن قايتارۋ – مەرزىمىنەن بۇرىن تولىق نەمەسە ءىشىنارا قايتارىلعان نەسيە ءۇشىن ايىپپۇل ەسەپتەلمەيدى.

ەگىن ەگۋ-جيناۋ جۇمىستارىنا بولىنەتىن قاراجات جەكە تۇلعالار، شارۋا قوجالىقتارى، جەكە كاسىپكەرلەر جانە زاڭدى تۇلعالارعا باسىم باعىتقا يە بارلىق داقىل تۇرلەرى ءۇشىن بەرىلەدى. نەسيەنىڭ جىلدىق پايىزدىق مولشەرلەمەسى 9%-دى قۇرايدى.

قارجىلاندىرۋ 2 تۇردە جۇزەگە اسىرىلادى:

• 2 ترانشتىق نەسيە جەلىسى;
• بىرمەزەتتىك نەسيە;

كەپىلدىككە جەر تەلىمىن نەمەسە باسقا قوسىمشا كەپىل زاتىن ۇسىنۋعا بولادى.

قازىرگى تاڭدا قارجى ورتالىعى تاراپىنان 2017 جىلعى دالا جۇمىستارىن قارجىلاندىرۋ بويىنشا بىرقاتار ءىس-شارالار جۇزەگە اسىرىلۋدا. اتاپ ايتساق، قارجىلاندىرۋدى جەدەل جۇزەگە اسىرۋ ءۇشىن وقو اۋداندارىندا سۋب-وفيستار قۇرىلدى. سونداي-اق كوكتەمگى ەگىن ەگۋ جۇمىستارىن قارجىلاندىرۋ ەڭ باسىم باعىت رەتىندە قارالىپ، اتالمىش باعىت بويىنشا كەلىپ تۇسەتىن وتىنىمدەردى قاراستىرۋ مەرزىمى مۇمكىندىگىنشە قىسقارتىلدى. وبلىس تۇرعىندارىنا جانە شارۋالارعا قارجىلاندىرۋ شارتتارىن ءتۇسىندىرۋ بويىنشا بىرقاتار ءىس-شارالار ۇيىمداستىرىلۋدا. اتاپ ايتقاندا، قىركۇيەك جانە قازان ايلارىندا ارنايى جۇمىسشى توپ قۇرىلىپ، بارلىق قالا، اۋدان ورتالىقتارى جانە اۋىلدىق وكرۋگتەردە جيىنالىستار وتكىزىپ، جيىن كەزىندە نەسيە الۋعا نيەت بىلدىرگەندەردىڭ قۇجاتتارىن قابىلداۋ دا جوسپارلانۋدا. بارلىق ديقاندار ءوز قالالارىندا، اۋداندارىندا نەمەسە اۋىلدارىندا وتەتىن جينالىسقا كەلىپ، وزدەرىن قىزىقتىرعان سۇراقتارىن تالقىلاۋ جانە قۇجاتتارىن تاپسىرۋ  مۇمكىندىگىنە يە. جينالىستىڭ وتەتىن جەرى جانە مەرزىمى تۋرالى اقپارات الۋ ءۇشىن بارلىق اۋدان/قالا اكىمدىكتەرىمەن بايلانىسۋعا بولادى.

ايتا كەتەيىك، جەڭىلدەتىلگەن نەسيەگە كەز-كەلگەن شارۋا قول جەتكىزە الادى.

Abai.kz