وڭتۇستىك قازاقستان وبلىسى، بايدىبەك اۋدانىنىڭ ورتالىعى - شايان ەلدى مەكەنىندە جىل باسىنان بەرى تىندىرىمدى تىرلىكتەر اتقارىلىپ، اۋىلدىڭ اجارى ارتا ءتۇستى. بۇل تۋرالى "اباي اقپارات" پورتالى بايدىبەك اۋدانى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

اتاپ ايتقاندا، شايانداعى ۇزىندىعى 6,2 شاقىرىم بولاتىن 15 كوشە اسفالتتالىپ، پايدالانۋعا بەرىلدى. اۆتوكولىكتەرگە ارنالعان 6 كوشە كەڭەيتىلىپ، 7 جولعا (ۇزىندىعى 3,5 شاقىرىم) جاڭادان اياقجول (تروتۋار) توسەلدى.

بايدىبەك اۋدانى ورتالىعىنىڭ ساۋلەتتىك كەلبەتىن جاقسارتۋ جۇمىستارى مۇنىمەن توقتاعان جوق. اباتتاندىرۋ جۇمىستارىن جۇيەلى قولعا الۋدىڭ ناتيجەسىندە، كوشە بويىنداعى جيەكتەر (بورديۋرلار) جاڭارتىلىپ، سۋ اعاتىن ارىقتار ورناتىلدى.

بايدىبەكتەگى ورتالىق كوشەلەر دە جاڭارعان. وندا بۇگىنگە دەيىن 10 ورتالىق كوشەنىڭ قاقپاسى (اركا) جاڭادان ورناتىلىپ، 10 گۇلزار بوي كوتەردى. مۇنان بولەك، مەكەمەلەردىڭ الدىندا اۆتوكولىكتەرگە ارنالعان 10 اۆتوتۇراق سالىندى.

سونداي-اق، اتالعان ەلدى مەكەن كوشەلەرىن كوركەيتىپ، كوگالداندىرۋ جۇمىستارى دا قارقىندى جۇرگىزىلدى.

ماسەلەن، جىل باسىنان بەرى اۋدان ورتالىعىنىڭ ورتالىق كوشەلەرىنە 2500 ءتۇپ اعاش وتىرعىزىلىپ، 7 مىڭ دانا راۋشان گۇلى مەن 13 مىڭ ءتۇپ گۇلدى وسىمدىكتەردىڭ تۇينەكتەرى ەگىلدى.

Abai.kz