ۇقك ۇلتتىڭ قاۋىپسىزدىگىن ويلايتىن ورگان با، الدە ۇلتقا قاۋىپتى ورگان با؟
قر پرەزيدەنتى ن. نازارباەۆتىڭ نازارىنا!
قۇرمەتتى نۇرسۇلتان ءابىشۇلى!
ءسىزدىڭ اتىڭىزعا تاقاۋدا «ۋاحابيزم مەن ءسالافيزمنىڭ بارلىق تارماعى – ەكسترەميستىك اعىم!» دەگەن اتپەن قازاقتىڭ ءيىر بۇتاقتى زيالىلارى قول قويعان اشىق حات جاريالاندى. اشىق حاتتا ەلىمىزگە دەندەپ ەنىپ كەتكەن سالافيزم تارماقتارىنىڭ قاۋىپتىلىگى حاقىندا ايقىن ماسەلەلەر كوتەرىلدى. اقتوبەدەن باستالىپ، الماتىدا ۇلاسقان سويقاننىڭ سوڭىندا ءوزىڭىز «تەراكتى» دەپ باعا بەرگەن سالافيلىك اعىمنىڭ وكىلدەرى تۇرعاندىعى باسا ايتىلىپ، سالافيلىككە سوت شەشىمىمەن تيىم سالۋ تالابى قويىلدى. اشىق حاتقا مىڭنان استام وقىرمان قول قويىپ ۇلگەردى، قول قويۋ قارقىندى تۇردە جالعاسۋدا.
شىنىندا دا، بۇل لاڭكەستىك ءدىني توپ ءسىز جيىرما بەس جىل بويى قابىرعاڭىز قايىسىپ ءجۇرىپ قالىپتاستىرعان ەتنوسارالىق ءھام ءدىني كونفەسسياارالىق توزىمدىلىك قۇندىلىقتارىن اياق-استى ەتۋگە تالپىنۋدا. ەلىمىزدىڭ تاۋەلسىزدىگى، مەملەكەتىمىزدىڭ تۇتاستىعى، قازاق حالقىنىڭ مادەنيەتى مەن سالت-ءداستۇرىن جوققا شىعارۋدا. حالىقتىڭ بىرلىگى مەن باياندى باقىتىنا سىزات ءتۇسىرىپ، «ماڭگىلىك ەل» يدەياسىنىڭ تامىرىنا بالتا شابۋدا. سالافيلەر وزدەرىنە قوسىلماعان جانە قولداماعان وزگە ازاماتتاردى «كاپىرگە» شىعارىپ، ولاردىڭ قانىن توگۋدەن شىمىركپەيتىنىن، ار-ۇجدانىنا قول سۇعۋدان تايىنبايتىنىن پاش ەتۋدە. مەملەكەتىمىزدىڭ زايىرلى قۇندىلىقتارىنا «تاعۇت»، ادەت-عۇرىپتارىمىزعا «بيدعات»، ىزگىلىككە نەگىزدەلگەن سالت-جورالارىمىزعا «حارام» دەپ جوسىقسىز جالا جاۋىپ، ۇلتتار مەن ۇلىستارعا، ءداستۇرلى دىندەرگە قۇتتى قونىس، بەيبىت ءورىس بولىپ وتىرعان قازاق ەلىن «كاپىرستانعا» بالاۋدا.
اقتوبە مەن الماتىداعى لاڭكەستىك وقيعالاردان كەيىن وسى ماسەلەگە قاتىستى قاۋىپسىزدىك كەڭەسىنىڭ وتىرىسىندا ءسىز «سودىرلىق سويقاننىڭ سالافيلەرگە تيەسىلى» ەكەنىن باسا ايتتىڭىز. ىلە-شالا ۇكىمەت باسشىسى ك.ءماسىموۆ «ەكى ايدىڭ كولەمىندە سالافيزمگە تيىم سالۋ جونىندە شەشىم قابىلداناتىنىن» جەتكىزدى. ءدىن ىستەرى كوميتەتىنىڭ توراعاسى ع.شويكين «سالافيزمگە تيىم سالۋ ماسەلەسى تالقىلانىپ» جاتقانىن حابارلادى. وسى ارالىقتا سالافي سودىرلارى الماتىدا، بالقاشتا، اقتوبەدە، ورالدا تەراكتى جاساۋعا بىرنەشە رەت ۇمتىلعانىمەن، ءوز پيعىلدارىن ىسكە اسىرا الماي، قۇرىقتالدى. ءابسوليۋتتى تيىم بولماسا، لاڭكەستىك وقيعالاردىڭ لەگى ءالى دە جالعاسا بەرەتىن ءتارىزدى.
ۇكىمەت باسشىسى بەرگەن ەكى اي سىرعىپ ءوتتى. بىراق، ءالى سالافيزمگە تيىم سالار سوت شەشىمى شىققان جوق. ەلىمىزدەگى بىلىكتى ءدىني ساراپشىلاردىڭ باق-دا سالافي اعىمىنىڭ قاۋىپتىلىگى تۋرالى جان-جاقتى مالىمەتتەر بەرگەنىنە قاراماستان، كەيبىر مەملەكەتتىك ۆەدوموستۆولار سوت شەشىمىن شىعارۋعا قۇمبىل ەمەس سەكىلدى. ماعان جەتكەن مالىمەتتەرگە قاراعاندا، قر ىشكى ىستەر مينيسترلىگى، قر ءبىلىم جانە عىلىم مينيسترلىگى، قر پروكۋراتۋراسى، ءدىن ىستەرى كوميتەتى، وبلىس اكىمشىلىكتەرى سالافيزمگە تيىم سالۋدى قولداعانمەن، قر ۇقك-ءنىڭ وكىلدەرى سالافيزمگە تيىم سالۋعا ءۇزىلدى-كەسىلدى قارسى شىعىپ وتىر. بۇل نە قىلعان سىڭارجاقتىق؟ ۇقك ۇلتتىڭ قاۋىپسىزدىگىن ويلايتىن ورگان با، الدە ۇلتقا قاۋىپتى ورگان با؟ وسىنى حالىق تۇسىنبەي وتىر.
بۇلىكشى اعىم – سالافيلىكتى اشىق ايىپتاۋعا بارماي، ءتيىپ-قاشىپ قانا مالىمەتتەر بەرىپ وتىرعان ۇقك لاۋازىمدى تۇلعالارىنىڭ ءىس-ارەكەتىن قالاي تۇسىنۋگە بولادى؟ اتى دارداي بۇل اسا جاۋاپتى مەكەمە وكىلدەرى بۇگىن وسىلاي سىزدىقتاتىپ وتىرىپ، ەرتەڭ سالافيلىككە تيىم سالۋعا جول بەرمەيتىن شىعارىپ سالما قۇجات ازىرلەپ، ەلباسىنىڭ اتىنان ەلگە جاريا ەتپەسىنە كىم كەپىل؟! نەگە ۇقك ماسەلەنى شەشۋگە ەمەس، ودان قاشۋعا اسا ىنتالى بولىپ وتىر؟!
قۇرمەتتى نۇرسۇلتان ءابىشۇلى!
قوعامدا كوپ ورىن الاتىن لوببيزم دەرتى ۇقك-نە جۇققان سىڭايلى. ايتپەسە، سيريا، يراك، تاجىكستان، وزبەكستان، شەشەنستان جانە ت.ب. مەملەكەتتەردە بۇلىك تۋدىرىپ، اۋىزدىقتالعان ءدىني اعىمعا ءبىزدىڭ ەلىمىزدە نەگە تيىم سالىنبايدى؟ ۇقك ەلدى قان-قاقساتىپ، تالاي بەيكۇنا ادامنىڭ ءومىرىن جالماعان سالافيزم اعىمىنا تيىم سالۋعا نەگە قارسى؟ جالپى، قازىر مەملەكەتتىك ورگانداردا ءسالافيزمدى قولدايتىن ازاماتتاردىڭ جۇمىس ىستەيتىنى امبەگە ايان. ولاردىڭ تالايىن كۇندەلىكتى ومىردە كورىپ ءجۇرمىز. مەنىڭ پايىمداۋىمشا، ۇقك-ءنىڭ قۇرامىندا دا ءسالافيزمدى قولدايتىن قىزمەتكەرلەر بار. ۇقك-دەگى سالافيزم ەمميسارلارى قاۋىپسىزدىك كەڭەسىنە جالعان اقپاراتتار مەن كونتسەپتسيالارىن وتكىزۋدە. وسى سەبەپتەن دە شەشىمى كەزەك كۇتتىرمەيتىن اتالمىش ماسەلە ساعىزشا سوزىلىپ كەلەدى.
قۇرمەتتى نۇرسۇلتان ءابىشۇلى!
قاشاندا ۇلت پەن مەملەكەت بولاشاعى ءۇشىن ماڭىزدى ماسەلەلەردى شەشۋگە اتسالىسىپ، ءوزىڭىز شەشىم قابىلداپ كەلەسىز. كەيبىر مەملەكەتتىك ورگانداردى سالافيزم دەرتىنەن ايىقتىرىپ، ەلىمىزدىڭ كەلەشەگىنە اسا قاۋىپتى بۇل ءدىني اعىمعا تيىم سالۋ ماسەلەسىنە دە ءوزىڭىز نۇكتە قويادى دەگەن سەنىمدەمىن.
ءازىمباي عالي، ساياساتتانۋشى
(اۆتوردىڭ جەكە پىكىرى Abai.kz پورتالىنىڭ كوزقاراسىمەن سايكەسە بەرمەۋى مۇمكىن ەكەنىن ەسكەرتەمىز).
Abai.kz
