ريو وليمپياداسىنىڭ قولا جۇلدەگەرى وتگونتسەتسەگ گالبادراح مەملەكەت ماراپاتىن العان سوڭ  جۋرناليستەرگە قازاق تىلىندە سويلەۋدەن باس تارتىپتى.  بۇل تۋرالى «Nur.kz» پورتالى جازدى.

ريودا قازاقستان قورجىنىنا قولا جۇلدە سالعان پالۋان قىز قازاقستاندىقتارعا قازاق تىلىندە العىس ايتىپ، جانكۇيەرلەردى سۇيسىندىرگەن ەدى.

وليمپيادادا ەل بايراعىن بيىككە كوتەرگەن سپورتشىلارعا قۇرمەت رەتىندە ءوڭىر باسشىلارى استا-توك سىي-سىياپاتتارىن ۇلەستىرىپ جاتىر.

31 تامىز كۇنى وڭتۇستىك قازاقستان وبلىسىنىڭ اكىمى بەيبىت اتامقۇلوۆتىڭ قولىنان پاتەر كىلتى مەن قىمبات كولىك العان وتگونتسەتسەگ جۋرناليستەرگە قازاق تىلىندە سۇحبات بەرۋدەن باس تارتىپتى.

پالۋان قىزدىڭ بۇل ارەكەتىنە تۇسىنىكتەمە بەرگەن باپكەرلەرى: «سپورتشى ءتۇرلى شارالاردا ەل ىقىلاسى ءۇشىن قازاق تىلىندە كوپتەگەن سوزدەردى جاتتاپ كەلەدى» دەگەن.

الايدا وليمپيادادان ورالعاننان كەيىن تەلەارنالارعا قاتىسقان پالۋان قىز قازاق تىلىندە ءبىر اۋىز ءسوز ايتپاعان ەكەن. وسى جولعى كەزدەسۋدە دە ءتىلشىنىڭ «تىم بولماعاندا جاتتاعان ءسوزىن ايتقىزىپ، ۆيدەوعا ءتۇسىرىپ الايىق» دەگەنىنە باپكەرلەرى كونبەپتى.

ايتا كەتەيىك، ءوڭىر باسشىسى ب.اتامقۇلوۆ ريو وليمپياداسىنىڭ جەڭىمپازدارى – كۇمىس جانە قولا مەدال يەگەرلەرى جازيرا جاپپارقۇل مەن وتگونتسەتسەگ گالبادراحتى قابىلداپ، سپورتشىلاردى ماراپاتتاعان ەدى. وبلىس اكىمى حالىقارالىق باسەكەدە ەلىمىزدىڭ نامىسىن قورعاپ، كوك تۋىمىزدى جەلبىرەتكەن سپورتشى قىزدارعا «نۇرسات» شاعىن اۋدانىنان ەكى جانە ءبىر بولمەلى پاتەرلەردىڭ كىلتىن تابىستاپ، كاسىپكەرلەردىڭ اتىنان «Toyota Land Cruiser 200» جانە «Toyota Land Cruiser Prado» دجيپ اۆتوكولىكتەرىن مىنگىزدى.

«سىزدەر ريو وليمپياداسىندا ونەر كورسەتىپ جۇرگەندە بارشا جەرلەستەرىمىز وزدەرىڭىز ءۇشىن جانكۇيەرلىك تانىتىپ، كۇنى-ءتۇنى تىلەۋلەس بولدى. سوندىقتان بۇل سىي-سياپاتتى بۇكىل وڭتۇستىك جۇرتشىلىعىنىڭ اتىنان بەرىلگەن العىس دەپ بىلىڭىزدەر»، - دەدى ب.اتامقۇلوۆ.

ءوز كەزەگىندە، سپورتشى قىزدار – جازيرا مەن وتگونتسەتسەگ سالانى دامىتۋداعى قولداۋلارى ءۇشىن وبلىس اكىمىنە العىسىن ءبىلدىرىپ، 2020 جىلى توكيودا وتەتىن حالىقارالىق وليمپيادادا ەل ءۇمىتىن اقتاپ، بارىن سالاتىندىقتارىن جەتكىزدى.

نۇرزات توعجان

Abai.kz