سەيسەنبى, 21 قىركۇيەك 2021
بيلىك 3348 0 پىكىر 30 تامىز, 2016 ساعات 11:17

حودجەنتتە «شىمكەنت» شاعىن اۋدانى بوي كوتەردى

بۇگىندە ءبىزدىڭ كوك بايراقتى ەلىمىز - قازاقستان رەسپۋبليكاسى ءوز تاۋەلسىزدىگىنىڭ مەرەيتويلى 25 جىلدىعىن تويلاۋعا جان-جاقتى دايىندىعىنا قىزۋ كىرىسىپ جاتقانى ءمالىم. قوعام ءومىرىنىڭ سان-سالاسىن قامتىعان وسىناۋ ۇلاعاتتى ءىستىڭ ەل مۇددەسى، ەلدىگىمىزدىڭ قۋاتى، البەتتە حالىقارالىق مارتەبەسىنىڭ ۇستەم بولۋى ءۇشىن ماڭىزى ەشقانداي تالاس تۋدىرماسا كەرەك. بيىلعى جىل سونداي-اق كەشەگى وداقتاس رەسپۋبليكالاردىڭ، قازىرگى ەگەمەن ەلدەردىڭ بارلىعىندا دەرلىك مەرەيتويلى كەزەڭ بولىپ وتىرعانى بەلگىلى. سوندىقتان باۋىرلاس مەملەكەتتەر ءبىر-ءبىرىنىڭ قۋانىشتارىن ءبولىسىپ، تورقالى تويلارىنا ورتاقتاسىپ جاتۋىن تۇسىنىستىكپەن قابىلداعانىمىز ابزال.

وسى ورايدا قازاقستاننىڭ تاجىكستانداعى ەلشىلىگى وڭتۇستىك قازاقستان وبلىسىنىڭ اكىمدىگىمەن بىرلەسىپ، دۋشانبە جانە حودجەنت قالالارىندا ءۇ.ج. 25-26 تامىزدا بىرقاتار رەسمي ءھام مادەني، سالتاناتتى ءىس-شارالاردى وتكىزدى.

تارقاتىپ ايتار بولساق، 25 تامىزدا تاجىكستانداعى  ەلشىمىز نۇرلان سەيتىموۆتىڭ قاتىسىپ قولداۋىمەن، وڭتۇستىك قازاقستان وبلىسى اكىمىنىڭ ورىنباسارى ۇ.سادىبەكوۆ باستاعان دەلەگاتسيانىڭ، شىمكەنت قالاسى جانە تاجىكستاننىڭ سوعدي وبلىسى، حودجەنت قالاسىنىڭ باسشىلىقتارىنىڭ كەلىسسوزدەرى، سونىمەن بىرگە دەلەگاتسيا قۇرامىنا ەنگەن بيزنەس وكىلدەرىنىڭ ىسكەرلىك كەزدەسۋلەرى جۇزەگە اسىرىلدى.

تاجىك اعايىندار ءبىزدىڭ ەلىمىزگە دەگەن دوستىعى مەن قۇرمەتىنىڭ بەلگىسى رەتىندە حودجەنت قالاسىندا جاڭادان بوي كوتەرگەن شاعىن اۋدان بولىگىنە «شىمكەنت» اتاۋىن بەرىپ، ونىڭ اشىلۋ ءراسىمى شىن نيەتتى كوتەرىڭكى كوڭىل كۇيدە  وتكىزىلدى. وسىلايشا، شىمكەنت-حودجەنت قالالارىنىڭ باۋىرلاستىق مارتەبەسى بۇرىنعىدان دا بەكي تۇسكەندىگىنىڭ كۋاسى بولدىق. قازاقستاندىق دەلەگاتسيا سوعدي وبلىسىنىڭ ونەركاسىپ ورىندارىمەن، قالانىڭ ءبىلىم مەكەمەلەرى، قوعامدىق ۇيىمدارى، سونداي-اق الەۋمەتتىك نىساندارىمەن تانىستى، ءارى تاجىريبە الماستى. ەكى تاراپتىڭ بيزنەس توپتارى اراسىندا جۇرگىزىلگەن كەلىسسوزدەر كەزىندە ىسكەرلىك بايلانىستاردى جانداندىرۋ، ءوزارا ءتيىمدى ىنتىماقتاستىقتى ودان ءارى ارتتىرۋ مۇمكىندىكتەرى دە تياناقتى تالقىلاندى.

حودجەنتتەگى بەرەكەلى كەزدەسۋلەر اياقتالعان سوڭ كەلەسى كۇنى، ياعني 26 تامىزدا قازاقستاندىق دەلەگاتسيا تولىق قۇرامدا دۋشانبە قالاسىنا كەلىپ، ەل استاناسىندا س.ايني اتىنداعى مەملەكەتتىك وپەرا جانە بالەت تەاترىندا  وقو ونەر شەبەرلەرىنىڭ سالتاناتتى كونتسەرتى جوعارى دەڭگەيدە وتكەندىگىن ايرىقشا اتاپ وتۋگە تۇرارلىق. وبلىستىق فيلارمونيانىڭ ەلۋدەن اسقان مۇشەلەرىن قامتىعان وتاندىق ونەر مايتالماندارىنىڭ ۇلتتىق، اسىرەسە ايگىلى تۇلعالار مەن حالىق اندەرىمىزدى، كۇمبىرلەگەن كۇيلەردى توگىلتۋمەن بىرگە الەمدىك كلاسسيكالىق تۋىندىلاردى، سونىڭ ىشىندە تاجىك تىلىندە شىرقاعان اندەرى مەن بيلەرى ءزاۋلىم زالداعى جاستار مەن ۇلكەندەردىڭ قاراسى بىردەي كورىنگەن كورەرمەندەر تاراپىنان زور ىقىلاسپەن قابىل الىندى. اسىرەسە ەگدە جانداردىڭ جانارىنداعى جاستارى شەكارالاردى مويىندامايتىن ونەر قۇدىرەتىنىڭ تاعى ءبىر ايقىن ايعاعىنداي مويىنداتقانى قاپىسىز. وسىناۋ پامير تورىندەگى قازاق ونەرى مەرەكەسىنە تاجىكستاننىڭ جوعارى بيلىك وكىلدەرى، مەملەكەتتىك ورگاندارىنىڭ باسشىلىق قۇرامى، سونداي-اق وسى ەلدە ورنالاسقان شەتەلدىك ديپلوماتيالىق كورپۋستىڭ لاۋازىم يەلەرى شاقىرىلىپ، ىنتا-تىلەكتەرىمەن قاتىسقاندىعىن ايتار ەدىك.

دۇنيەجۇزىنە تاراعان قانداس تۋىستارىمىزدىڭ تاعى ءبىر تارماعى بۇگىندە باۋىرلاس تاجىك ەلىندە تۇرىپ، وزگە ۇلىستارمەن قاتار سامينوۆا زاۋرە قارىنداسىمىزدىڭ باسشىلىعىمەن «بايتەرەك» قازاق ۇلتتىق قوعامدىق بىرلەستىگىنىڭ جۇمىسىن ۇزبەي جۇرگىزىپ كەلەدى ەكەن. مىنە، وسى ۇيىمعا وڭتۇستىك قازاقستان وبلىسىنان ارنايى دايىندالعان سەگىز قاناتتى كيىز ءۇي جاساۋ-جابدىعىمەن، ۇلتتىق ۇلگىدەگى كيىمدەر، مۋزىكالىق اسپاپتار جانە كىتاپحاناسىنا بىرنەشە تومدىق جيناقتار مەن كىتاپتار سىيعا تارتىلىپ، مۇنداعى قانداستارىمىزدى مادەني، رۋحاني تۇرعىدا ءبىر سىلكىنتىپ، اتامەكەن اتىنان قولداۋ ماقساتىندا زور ماڭىزعا يە بولدى.

ەرەكشە اسەم بەزەندىرىلگەن سەگىز قاناتتى اقشاڭقاڭ كيىز ءۇي ىشىندەگى بارلىق جاساۋ-جابدىعىمەن الدىمەن ەل استاناسى دۋشانبە قالاسىنىڭ قاق تورىندە ورنالاسقان تەاتر عيماراتى الدىنا تىگىلىپ، مىڭداعان قالا تۇرعىندارى مەن قوناقتارىنىڭ، شەتەلدىك ديپلوماتتاردىڭ  ەركىن كورىپ تاماشالاۋى ءۇشىن نازارىنا ۇسىنىلىپ، ولاردىڭ تاراپىنان ايرىقشا قىزىعۋشىلىق تۋعىزعاندىعى اڭعارىلدى.

باۋىرلاس ەكى ەلدىڭ تاۋەلسىزدىگىنىڭ مەرەيتويىنا وراي ۇيىمداستىرىلعان كەڭ كولەمدى ءىس-شارالاردىڭ ناتيجەسى، ەڭ الدىمەن، ەكى ەل اراسىنداعى قارىم-قاتىناستاردى جانداندىرۋ مۇددەسىنە باعىتتالا وتىرىپ، سونىڭ ىشىندە ايماقارالىق رەسمي بايلانىستاردى نىعايتۋ ارقىلى ءوزارا پايدالى ىسكەرلىك، الەۋمەتتىك-ەكونوميكالىق، مادەني-گۋمانيتارلىق ىنتىماقتاستىقتىڭ مۇمكىندىكتەرى مەن جولدارىن كەڭەيتۋ ماقساتىندا ءتيىمدى ەكەندىگىن تاعى ءبىر بايقاتقاندىعىن ايتۋ لازىم.

ال بۇگىندە بەلگىلى سەبەپتەرمەن ءبىر-بىرىنەن الشاقتاڭقىراپ كەتكەن قاراپايىم حالىق وكىلدەرى، اسىرەسە جاستاردىڭ قازاق مادەنيەتىنە، ونەرىنە دەگەن قۇشتارلىعى مەن ايرىقشا ىقىلاسى باۋىرلاس ۇلتتار مەن ۇلىستار اراسىن جاقىنداستىرا ءتۇسۋدىڭ قانداي دا بولماسىن قادامدارى تۇبىندە ىزگىلىك قاعيداتتارىنىڭ بارشاسىنان بيىك تۇرۋى تيىستىگىن پاش ەتكەنى قاپىسىز.

 

مۇحتار كارىباي

دۋشانبە

Abai.kz    

 

0 پىكىر