كەشە وبلىس اكىمىنىڭ ورىنباسارى جاقىپ بوكەنباەۆتىڭ قاتىسۋىمەن جەر قويناۋىن زاڭسىز پايدالانۋدى توقتاتۋ بويىنشا وبلىس اكىمىنىڭ تاپسىرماسىنىڭ ورىندالۋى  اياسىندا جەرگىلىكتى پوليتسيا قىزمەتىنىڭ ەسەپ بەرۋ ءماجىلىسى ءوتتى.

جيىندا وبلىستىق جەرگىلىكتى پوليتسيا قىزمەتى باستىعىنىڭ ورىنباسارى م.زۇلپۇحاروۆ جانە وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى م.وتارشيەۆ بايانداما جاسادى.

ەسەپتى كەزدەسۋدە ۇسىنىلعان مالىمەت بويىنشا،  2016 جىلدىڭ 7 ايىندا وبلىس كولەمىندە جەر قويناۋىن ءوز بەتىنشە پايدالانۋدىڭ 85 دەرەگى انىقتالعان. ونىڭ ىشىندە، 38 دەرەك جەرگىلىكتى پوليتسيا قىزمەتىنىڭ جەكە ىزدەۋىمەن انىقتالىپ وتىر. 

سونىمەن قاتار، ەسەپتى جيىندا باسقارما باسشىسى م.وتارشيەۆ تاراپىنان شىمكەنت قالاسى اۋماعىنداعى قۇم، تاس، توپىراق ساتۋ ورىندارىنىڭ زاڭدىلىعىن قاراپ، ءتيىستى شارا كورۋ قاجەتتىگى جونىندە ماسەلە كوتەردى.

ءماجىلىس قورتىندىسى بويىنشا ءوڭىر باسشىسىنىڭ ورىنباسارى  بايانداماشىلار تاراپىنان ايتىلعان ۇسىنىستار نازارعا الىنىپ، ءتيىستى جۇمىستار جۇرگىزىلۋىن تاپسىردى.

ايتا كەتەيىك، وڭتۇستىك قازاقستان وبلىسىندا اۋىلشارۋاشىلىعى ماقساتىنداعى جەر قويناۋلارىن جانە تابيعي قويناۋلاردى زاڭسىز پايدالانۋشىلارمەن كۇرەس قارقىندى جۇرگىزىلىپ وتىرادى. قازاقستان رەسپۋبليكاسى بويىنشا وڭتۇستىك قازاقستان وبلىسى اتالعان ماسەلەگە ەرەكشە ءمان بەرىپ، مەملەكەت باسشىسىنىڭ وڭىرلەردەگى زاڭ بۇزۋشىلىقتاردى قىسقارتۋ تۋرالى تاپسىرماسى اياسىندا ارنايى رەيد جۇرگىزىپ وتىرادى. جوعارىداعى كەلتىرىلگەن دەرەكتەر سولاردىڭ ءبىرسىپاراسى عانا. باياندامادا ايتىلعانداي، ارنايى رەيد ناتيجەسىندە انىقتالعان سەكسەن بەس زاڭ بۇزۋشىلىقتىڭ 38-ءى جەرگىلىكتى پوليتسيا قىزمەتىنىڭ جەكە ىزدەستىرۋىمەن انىقتالعان.

دەرەككوزى: وقو اكىمىنىڭ ءباسپاسوز قىزمەتى 

اباي اقپارات