وسىدان بىرنەشە جىل بۇرىن شەت ەلدىك ءبىر كومپانيادا جۇمىس ىستەگەنىم بار. قىزمەتكەرلەردىڭ بارلىعى، باسشىلارعا دەيىن تۇگەل مۇسىلماندار. بارلىعى دەرلىك ناماز وقيدى. ۇجىمدا زارينا دەگەن قىز بار ەدى. نامازدان قالمايدى. بىراق ءىس-ارەكەتى، بولمىسى مۇسىلمان قىزىنا لايىق دەۋگە كەلمەستەي. زارينا جۇمىسقا ءساندى كيىممەن كەلەتىن دە سومكەگە سالىپ العان ورامال، حيدجابىن تەك نامازعا بارعاندا كيەتىن. ءساندى ۇناتاتىنى سونشالىق، بەلىن جىلتىراتىپ، توپيكتىڭ نەبىر ءتۇرىن ۇستىنەن تاستامايتىن. كەيدە قىزمەت ورنىندا ەلۋدەن اسقان ەركەكتەردىڭ بار ەكەنىن ەسكەرمەستەن شورتىمەن كەلەتىنىن قايتەرسىز؟ بەلى، بالتىرى اشىق-شاشىق قىزعا باسشىلىق ۇندەمەيتىن. ويتكەنى باسشىمىز كەڭپەيىل ادام ەدى.  

ناماز ۋاقىتى تاياعاندا زارينا ۇستىندەگى لىپاسىن حيدجابقا اۋىستىراتىن. كۇنىنە ەكى قۇبىلاتىن قىزعا بىردەڭە دەۋدىڭ ءوزى قيىن ەدى. ويتكەنى ول ەسكەرتۋ جاساپ، يا اقىل ايتقان ارىپتەستى جاس دەمەي، كارى دەمەي، بەتىنەن الاتىن. تىم جاس دەيتىندەي ەمەس، 25-كە كەلگەن. كوسمەتيكانىڭ ءتۇر-ءتۇرىن ەركىن قولداناتىن. ماسەلە بۇندا دا ەمەس، ونىڭ ءدىندى قالاي تۇسىنەتىنىندە بولسا كەرەك. قىسقاسى، ونى تاڭەرتەڭ كورگەن ادام تۇستەن كەيىن كەزدەسسە تانىماي قالاتىن. زارينا تۇسكە دەيىن مويىن، بەل، سانىن جالتىراتىپ جۇرسە، ءتۇس اۋا حيدجابتى مۇسىلمان بولا قالادى.

بىردە شەت ەلدىك باستىق ودان قالام سۇرادى. زارينانىڭ باستىقتىڭ قالامىن ونىڭ ءوز قولىنا قايتارۋدىڭ ورنىنا انادايدان بەتىنە لاقتىرىپ جىبەرمەسى بار ما؟! باستىق ءتوزىمدى ەدى. «نەگە ۇيتەسىڭ؟» دەگەن جوق. ونىڭ بۇل ارەكەتىنەن كەيىن تىپتەن جيرەنىپ كەتتىك. ءسويتىپ، كەرەكتى كەزىندە بەلىن جالاڭاشتاپ، فيگۋراسىن كورسەتىپ، قاجەت كەزىندە نامازىن دا قازا جىبەرمەيتىن زارينادان  ارىپتەستەر تۇرپىدەي جيىرىلاتىن. سويلەگەن ادامنىڭ بەتىنەن الا تۇسەتىن دورەكى قىز كىمگە جاقسىن؟ ءوزى تاعى قانداي جىگىتتەرمەن دوستاسىپ جۇرگەنىن دە كوپشىلىكتەن جاسىرماي اڭگىمەلەيتىنىن قايتەرسىز؟ زارينانى جاقسى كورىپ، ۇنەمى قاسىنان تابىلاتىن گۇلفيا دەگەن قىزمەتكەر بولدى. ەكەۋىنىڭ مىنەزى ۇقساس. ەلۋدى ەڭسەرگەن اعايلار مەن اپايلار ءتىل قاتسا دا ەكى قىز تۇرپايى جاۋاپ قاتادى. وزىنە قاجەت كەزدە عانا سىپايى. قىز ۇزاتىپ، كەلىن ءتۇسىرىپ وتىرعان ءبىر اپاي بىردە الگى ەكەۋىنە مۇسىلمان ادامنىڭ ىلعي دا وزگەلەرگە ۇلگى بولارلىق جاقسى مىنەزدى بولۋى قاجەت ەكەندىگىن تۇسىندىرە باستاپ ەدى، گۇلفيا «شارۋاڭىز قانشا؟» دەپ قايتارىپ تاستادى. "شارۋاڭىز قانشا؟"  — گۇلفينىڭ ەڭ ءجيى قولداناتىن تىركەسى.

بۇنداي مىنەزدىلەرمەن ءبىر ورتادا جۇمىس ىستەۋدىڭ ءوزى قيىن عوي. بىرتە-بىرتە  ەكى دولىنىڭ مىنەزىنە شىداماعان ارىپتەستەر شەتىنەن وزگە جۇمىسقا اۋىسا باستادى. اقىرىندا جاڭا كادرلار كەلگەندە زارينا مەن گۇلفيا عانا قالىپتى ەسكى ورىندا.

ءيا، ناماز وقىپ، حيدجاب كيىپ، ءوزىن مۇسىلمانبىن دەيتىن پەندەلەردىڭ اراسىندا ءدىندى اياق استى ەتىپ جۇرگەندەرى دە بار ەكەن... دانا قامشىبەك

دەرەككوزى: Qamshy.kz

Abai.kz