تولە بي اۋدانىنىڭ اكىمى بولىپ جاقىندا تاعايىندالعان ب.پارمانوۆ ەلدى مەكەندەردىڭ تىنىس-تىرشىلىگىمەن تانىسۋدا. ەڭ الدىمەن ول 19 262 حالقى بار ءبىرىنشى مامىر اۋىلدىق وكرۋگىن ارالاپ، ونداعى الەۋمەتتىك سالالاردىڭ تازالىعى مەن اباتتاندىرۋ جۇمىستارىنا نازار اۋداردى.  

مۇنان سوڭ اۋدان باسشىسى  العاباس، تاعاينا ەلدى مەكەنىندەگى ءبىلىم بەرۋ مەكەمەلەرى مەن اكىمشىلىك عيماراتتارىن ارالادى. سونىمەن قاتار، تاعاينا اۋىلىنداعى قىزاناق وسىرەتىن جىلىجايدىڭ جۇمىسىمەن تانىستى. وڭتۇستىك كورەيانىڭ تەحنولوگياسىمەن جابدىقتالعان توو «جاسۋلاس» قىزاناق جىلىجايى  قازان ايىندا 1 گا جەردەن 70-80 توننا ءونىم شىعارۋدى جوسپارلاپ وتىر.

اۋدان اكىمى ساپارى بارىسىندا مال سويۋ، ءسۇت ءونىمىن قابىلدايتىن «فاتسەلي» سەلولىق تۇتىنۋ كووپەراتيۆىن ارالاپ كورىپ، ونداعى قىزمەتكەرلەرمەن تىلدەستى. اتالعان كاسىپورىن تاۋلىگىنە 3 توننا ەت، 1 توننا ءسۇت  ءوندىرىپ «فۋد –ماستەر شىمكەنت كومپانياسىنا» جونەلتۋدە.

جۇمىس ساپارى سوڭىندا اۋدان اكىمى اۋىل وكرۋگىنىڭ حالقىمەن كەزدەسىپ،  الداعى ۋاقىتتا بىرلەسە جۇمىس ىستەۋگە شاقىردى. سونداي-اق، ول  وبلىس اكىمىنىڭ جۇكتەگەن مىندەتتەرىن ورىنداپ، اۋىز سۋ ماسەلەسىن شەشۋدى، ىشكى جولداردى قايتا جوندەۋدەن وتكىزەتىنىن اتاپ ءوتتى.

Abai.kz