بۇگىن شىمكەنتتەگى دەندروساياباقتا رەسپۋبليكالىق «مەكتەپكە جول» اكتسياسى ءوتتى. ەلىمىزدە بيىل توعىزىنشى رەت ۇيىمداستىرىلىپ وتىرعان شاراعا قالا اكىمى عابيدوللا ءابدىراحىموۆ، قالالىق ءماسليحات دەپۋتاتتارى، «نۇر وتان» پارتياسىنىڭ وكىلدەرى، ءبىلىم جانە تاربيە بەرۋ ۇيىمدارىنىڭ باسشىلارى مەن ۇستازدار قاۋىمى قاتىستى.

ەلباسىنىڭ وقۋ­شى­لار­­دىڭ مەكتەپكە تولىق بارۋىن قام­تا­ماسىز ەتۋ تۋرالى تاپسىرماسىنا سايكەس، اكتسيا اياسىندا شىمكەنتتەگى ءبىلىم مەكەمەلەرىندە الەۋمەتتىك كومەككە مۇقتاج بالالارعا كومەك بەرىلدى.

ياعني اكتسيا بارىسىندا قالانىڭ 29644 وقۋشىسىنا قولداۋ كورسەتىلدى. ونىڭ ىشىندە: جالپىعا مىندەتتى ءبىلىم قورىنان 5000 بالانىڭ ەسەپ-شوتتارىنا -12000 تەڭگەدەن، بارلىعى 60 ملن. تەڭگە اۋدارىلعان بولسا، قالا اكىمىنىڭ دەمەۋشىلىگىمەن 100 بالا مەكتەپ سومكەسىمەن قامتىلاتىن بولادى.

ستاتيستيكالىق مالىمەتتەرگە سۇيەنسەك، قالامىزدا الەۋمەتتىك كومەككە مۇقتاج 29644 بالا ەسەپكە الىنعان. وسىعان وراي، قالا اكىمدىگىنىڭ قولداۋىمەن كوپ بالالى وتباسىنان شىققان 18007 وقۋشىعا، 385 جەتىم جانە جارتىلاي جەتىم 5080 بالاعا، 979 مۇگەدەك، 5166 از قامتىلعان وتباسى بالالارى مەن 47 ورالمان وتباسىنىڭ بالالارىنا كومەك كورسەتىلدى.

وسىلايشا، اكتسياعا قالا اكىمدىگى، جەكە كاسىپكەرلەر، مەكتەپ اكىمشىلىگى قولداۋ كورسەتىپ، جەتىم جانە اتا-انا قامقور­لىعىنسىز قالعان بالالار­عا قامقور بولىپ، ولاردىڭ الەۋ­مەتتىك سەبەپتەر سالدارىنان مەكتەپكە بارا الماۋىنىڭ الدىن الدى.

Abai.kz