7-18 قىركۇيەك ارالىعىندا ريودا وتەتىن پاراليمپيالا ويىندارىنىڭ باعدارلاماسى قارجى تاپشىلىعىنا بايلانىستى قىسقارۋى مۇمكىن، دەپ جازدى Wall Street Journal. بىراق سپورتتىڭ ناقتى قاي تۇرلەرى قىسقاراتىنى ازىرگە بەلگىسىز.

حالىقارالىق پاراليمپيادا كوميتەتىنىڭ ءباسپاسوز حاتشىسى كرەيگ سپەنستىڭ ايتۋىنشا، ريوداعى ويىنداردى ۇيىمداستىرۋشىلار وليمپيادا جانە پاراليمپيادا ويىندارىنا قاجەتتى 7,4 ملرد رەالدى (2.3 ملرد دوللار) جيناي الماعان. بۇل قارجىعا ويىنداردىڭ اشىلۋ جانە جابىلۋ سالتاناتى عانا ەمەس، سپورتشىلاردىڭ ءومىر ءسۇرۋى دە قارجىلاندىرىلادى.

بۇعان قوسا، ويىنداردىڭ ۇيىمداستىرۋ كوميتەتى الەم ەلدەرىنە پاراليمپيادا كوماندالارىن ريوعا اكەلۋگە قاجەتتى قارجاتتى ءالى بولمەگەن. كەيبىر شاعىن ەلدەر سپورتشىلارىن ءوز قاراجاتىمەن اكەلە الماي قالۋى مۇمكىن.

سوعان بايلانىستى ۇيىمداستىرۋشىلار پاراليمپيادا جارىستارىن جانە سپورتشىلار سانىن قىسقارتۋدى ويلاستىرىپ جاتىر. پاراليمپياداعا الەمنىڭ 176 ەلىنەن 4 مىڭنان استام سپورتشى قاتىسادى دەپ جوسپارلانعان ەدى.