تۇتىنۋشىلاردىڭ ۇلكەن سۇرانىسىنا يە بولعان ماكارون ونىم­دەرىنىڭ ءبىرى، كادىمگى ەت اسقاندا سالىناتىن «ارزۋ» جايمالارى تاراز قالاسىنداعى «تا-ماك» جشس-دا شىعارىلادى.

بۇل ءدامدى جايمالار از ۋاقىتتا نارىقتاعى باسەكەلەستەرىن ىعىستىرىپ، تاڭداۋلى ونىمگە اينالىپ ۇلگەردى. اتالمىش كا­سىپ­ورىننىڭ بىلتىرعى «قازاقستاننىڭ ۇزدىك تاۋارى» رەسپۋبليكالىق كورمە-بايقاۋىنىڭ «حالىققا ارنالعان ۇزدىك تاۋارلار» اتالىمى بويىنشا ءىى دارەجەلى ديپلومدى يەلەنۋى –  وسىنىڭ دالەلى.

نارىق زاڭى قاتال. وندىرىلگەن ءونىم ساپالى ءارى باعاسى قولجەتىمدى بولۋى ءتيىس. ونسىز باسەكەلەستىككە توتەپ بەرۋ قيىن. «تا-ماك» جشس وسىنداي سىناقتاردىڭ بارىنەن وتە ءبىلدى. گۇلميرا قوڭقاشەۆا باسقاراتىن سەرىكتەستىك 2004 جىلى ماكارون ونىمدەرىن شىعاراتىن تسەح اشىپ، ساپاسى يمپورتتىق بالاماسىنان كەم تۇسپەيتىن جايما ازىرلەۋ ءتاسىلىن ەكى جىلدىڭ ىشىندە مەڭگەرىپ، ءوندىرىستى ىسكە قوسادى. ءۇشىنشى جىلى تارازدا شىعارىلاتىن جايمالار ورتالىق، باتىس جانە شىعىس قازاقستان وبلىستارىنا كەڭ تارالا باستايدى. 2008 جىلى ماكارون ونىمدەرىنىڭ باسقا دا تۇرلەرىن شىعارۋدى قولعا الادى.

حالىقارالىق حاسسپ جۇيەسى - تاماق ونىمدەرىنىڭ قاۋىپسىزدىگىن قامتاماسىز ەتۋدىڭ جاڭا ستاندارتتارى جانە مالايزيالىق «حالال» ستاندارتى بويىنشا ەكولوگيالىق تازا ءونىم وندىرەتىن سەرىكتەستىك 2012 جىلى رەسەيدە وتكەن ازىق-تۇلىك كورمەسىندە التىن مەدالدى يەلەنەدى.  كاسىپورىننىڭ تاۋلىگىنە 10 مىڭ توننا ءونىم وندىرەتىن يتاليالىق اۆتوماتتى قۇرىلعىنى ىسكە قوسقانى دا وسى جىلى.  2014 جىلى ماسكەۋلىك كونسترۋكتورلىق بيۋرومەن بىرلەسىپ، جاڭا اۆتوماتتى قاپتاما جۇيەسىنىڭ تۇساۋىن كەستى.  ول الەم­دەگى ەشبىر تاۋار قاپتاماسىنا ۇقسامايدى. سونىڭ ارقاسىندا «ارزۋ» تاۋار تاڭباسىمەن ساتىلاتىن جايمالار دۇكەن سورەلەرىندە بىردەن ەرەكشەلەنىپ تۇراتىن بولدى.

«مەن ءۇشىن ەڭ باستىسى – ساپا. ءبىر وندىرۋشىلەرگە ءونىمنىڭ نەعۇرلىم مول شىعارىلىپ، جان-جاققا تىنىمسىز تارالىپ جاتقانى ۇتىمدى، ال مەندە ونداي كولەم قۋالاۋ دەگەن جوق. از شىعارسام دا تاپ-تۇيناقتاي، بارلىق تالاپقا ساي بولۋى ءتيىس.  سىنعان، مايىسقان قامىردى ەشقاشان وراتپايمىن. كومپانيا جۇمىسشىلارى  دا ونداي ءجۇردىم-باردىم ارەكەتكە بارا المايدى، ويتكەنى، باستى تالاپتان حاباردار. ەگەر سونى بىلە تۇرا ابايسىزدا جەرگە ءتۇسىپ قالعان قامىردى قوراپقا سالا سالسا، ونىسى بەينەكامەراعا ءتۇسىپ قالادى»، - دەيدى گۇلميرا قادىر­قىزى.

«تا-ماك» سەرىكتەستىگى «دامۋ» كاسىپكەرلىكتى دامىتۋ قورى قۇيعان ينۆەستيتسيانىڭ ارقاسىندا ءوز ونىمدەرىن ەكسپورتقا شىعارا باستادى.  «ارزۋ» ماركالى ماكارون ونىمدەرى گوللانديا، فرانتسيا جانە اقش-تىڭ «Mueller Aussenhandel e.K.»، «Monolith Süd GmbH» دەلدال كومپانيالارى ارقىلى گەرمانيا، رەسەي، قىرعىز مەملەكەتتەرى مەن وزبەكستان نارىعىنا شىعارىلۋدا.

بۇگىندە كاسىپورىن تۇتىنۋشىلارىنا «ەرتوستىك» دەگەن تاۋار تاڭباسىمەن جاڭا برەند ۇسىنۋدا. مۇنداي قادام ماكارون ونىمدەرىن شىعاراتىن ءوندىرىس ورىندارى اراسىنداعى باسەكەلەستىككە تىڭ سەرپىن بەرەتىنىن ايتادى سەرىكتەستىك باسشىسى. ەكىنشى جاعىنان جاڭا جوسپارلاردىڭ تۋىنداۋىنا جول اشپاق.

ورالحان ءداۋىت

abai.kz