وبلىس بويىنشا تۇڭعىش جاعاجاي ۆولەيبولى سپورتى شاردارادا اشىلىپ وتىر. سپورتشىلار مەرەكەسى كۇنى اۋداندىق دەنە شىنىقتىرۋ جانە سپورت ءبولىمىنىڭ ۇيىمداستىرۋىمەن ەل تاۋەلسىزدىگىنىڭ 25 جىلدىعى اياسىندا اۋدان اكىمىنىڭ جۇلدەسىنە ارنالعان جاعاجاي ۆولەيبولىنان تۇڭعىش رەت وبلىستىق تۋرنير وتكىزىلدى. جارىس باستالماس بۇرىن اۋدان اكىمى ارمان ابدۋللاەۆ پەن جاعاجاي ۆولەيبولىنان وبلىس قۇراماسىنىڭ بازاسى بولىپ سانالاتىن №2 سپورت مەكتەبىنىڭ ديرەكتورى نۇرماحان مەلدەحانوۆ جاعاجاي ۆولەيبولى الاڭىنىڭ تۇساۋىن كەسىپ، جۇرتشىلىقتى مەرەكەمەن قۇتتىقتادى.

العاش رەت ۇيىمداستىرىلىپ وتىرعان جاعاجاي ۆولەيبولى تۋرنيرىنە بارلىق اۋداندار مەن شىمكەنت قالاسىنان كوماندالار كەلىپ قاتىستى. العاش بولىپ الاڭعا سارىاعاش اۋدانىنىڭ كومانداسى مەن قازىعۇرت اۋدانىنىڭ كومانداسى شىعىپ، ەسەپ  سارىاعاشتىقتاردىڭ پايداسىنا شەشىلدى. جالاڭاياعىمەن تولارساقتان قۇم كەشكەن سپورتشىلار ويىن كورىگىن كەشكە دەيىن قىزدىردى. اقداۋلەت ماماق جانە پەردالى قوقىش ەسىمدى ويىنشىلاردان قۇرالعان  قازىعۇرت اۋدانىنىڭ كومانداسىن ءىىى ورىنعا قالدىرعان شىمكەنت قالاسى مەن شاردارا اۋدانىنىڭ كوماندالارى اقتىق سىنعا شىعىپ، جەڭىس ءۇشىن باسەكەگە ءتۇستى. شاردارالىق ۆولەيبولشى جىگىتتەر ەربول ساكيەۆ پەن اسقار قاندىللاەۆتار جارىس سوڭىنا دەيىن جانقيارلىقپەن سايىسقا تۇسكەنىمەن، شىمكەنتتىك نۇردوس الداش پەن ۆلاديسلاۆ كۋنچەنكولار ايلاسىن اسىرىپ كەتتى. ناتيجەسىندە شاردارا اۋدانى اكىمىنىڭ جۇلدەسىنە ارنالعان جاعاجاي ۆولەيبولى ءتۋرنيرىنىڭ جەڭىمپازى بولىپ شىمكەنت قالاسىنىڭ كومانداسى تانىلدى. شاردارا اۋدانى ەكىنشى، قازىعۇرت اۋدانى ءۇشىنشى ورىنداردى يەلەندى.

جارىس سوڭىندا اۋدان اكىمى ارمان ابدۋللاەۆ جەڭىس تۇعىرىنا كوتەرىلگەن جەڭىمپاز كوماندالارعا اقشالاي سىيلىقتار، مەدالدار مەن كۋبوكتاردى سىيعا تارتتى. 

ەندى الداعى قىركۇيەك ايىندا جاعاجاي ۆولەيبولىنان وڭتۇستىك قازاقستان وبلىسىنىڭ ءى چەمپيوناتى شاردارا قالاسىندا وتكىزىلەتىن بولىپ شەشىلدى.

Abai.kz