بۇۇ قاۋىپسىزدىك كەڭەسى قۇرامىندا قىرىم اۆتونومياسى كىرەتىن ۋكراينانىڭ اۋماقتىق تۇتاستىعىنا قاتىستى ۇستانىمىن ءسوزسىز قۋاتتادى. بۇل تۋرالى ۋكراينانىڭ بۇۇ-داعى تۇراقتى وكىلى ۆلاديمير ەلچەنكو مالىمدەدى، دەپ حابارلايدى «112 ۋكراينا». ونىڭ ايتۋىنشا، مۇنداي ۇستانىمدى رەسەي فەدەراتسياسى عانا قولداماعان.

ء«بىز قۇرامىنا قىرىم دا كىرەتىن ۋكراينانىڭ تاۋەلسىزدىگى مەن اۋماقتىق تۇتاستىعىنا قاتىستى ۇستانىمىن قۇرمەتتەگەنى ءۇشىن، قاۋىپسىزدىك كەڭەسىنە العىس بىلدىرەمىز. ارينە، ءبىر عانا مەملەكەت مۇنداي ۇستانىم بىلدىرە المادى", - دەدى ەلچەنكو.

«ۋكراينانى قىرىمعا قارسى تەراكت جاساۋعا تالپىندى دەپ ايىپتاعان ولار نەگە دالەلدى العا تارتپايدى؟ ونى دالەلدەيتىن سۋرەتتەر نەمەسە ۆيدەولار قايدا؟ بوس سوزبەن ايىپتايدى", - دەدى ەلچەنكو. بۇنىڭ الدىندا بۇۇ قاۋىپسىزدىك كەڭەسى قىرىمداعى جاعدايدىڭ ۋشىعۋىنا بايلانىستى جابىق جينالىس وتكىزدى. وتىرىس ۋكراينانىڭ وتىنىشىمەن شاقىرىلدى.

رەسەي جانە ۋكراينا اراسى فەدەرالدىق قاۋىپسىزدىك قىزمەتىنىڭ قىرىمدا "ديۆەرسانتتاردى" ۇستاۋىنا قاتىستى حابارىنان سوڭ كۇرت سۋىپ كەتتى. ۇستالعاندار ۋكراينالىق بارلاۋ قىزمەتكەرلەرى دەلىنەدى. ولاردى ۇستاۋ كەزىندە ەكى رەسەيلىك وفيتسەر قازا تاپتى دەپ حابارلاندى.

پرەزيدەنت ۆلاديمير پۋتين ۋكراينا بيلىگىن تەرروردى قولدانۋعا كوشتى دەپ ايىپتاپ، دونباستاعى جانجالدى بەيبىت رەتتەۋ جونىندەگى "نورمانديالىق فورماتتاعى" كەزدەسۋدەن تاس تارتتى.